Նրանք Փաշինյանին լեգիտիմ են համարում, մենք՝ ոչ․ Մարտիրոսյանը՝ արտախորհրդարանական ուժերի կողքին չլինելու մասին
ՔաղաքականԱզգային Ժողովրդավարական Բևեռը (ԱԺԲ) հանրության մեջ ընկալվում է որպես ՌԴ-ի դեմ դիրքավորված քաղաքական ուժ․ թվում է, այս հատման կետում, պիտի նրանք լինեին հակառուսական օրակարգ ունեցող հայաստանյան այն արտախորհրդարանական ուժերի թվում (Հայաստանի Եվրոպական կուսակցություն, Հանրապետություն, Քրիստոնեա-ժողովրդավարական կուսակցություն և այլն) , որոնք պարբերաբար հանդիպումներ են ունենում Նիկոլ Փաշինյանի հետ։
Մինչդեռ ԱԺԲ-ի քաղաքական ուղեգիծը գերազանցապես ընդդիմադիր դիրքերից է, այդ թվում՝ իշխանությունների դեմ քննադատության հստակ ուղերձներով։
«Իսկ ինչու՞ է թվում, որ պետք է լինեինք իրենց որպես պրոարևմտյան ներկայացնող արտախորհրդարանական մյուս ուժերի կողքին: Իրենք Նիկոլ Փաշինյանին լեգիտիմ են համարում, մենք` ոչ: Իրենք իրականում խորքում այլ օրակարգ են սպասարկում, մենք` ոչ: Իրենք Հայաստանի պատմության մեջ ամենառուսաստանաստրուկ հայկական ռեժիմի հետ են գործակցում և արդարացնում դրան, մենք` ոչ: Այնպես որ, մենք և նրանք իրականում շատ տարբեր ուժեր ենք»։
Այս մասին ԼՈՒՐԵՐ․ com-ի հետ զրույցում նշեց «Ազգային-Ժողովրդավարական Բևեռի» խորհրդի անդամ, քաղաքագիտության դոկտոր Հայկ Մարտիրոսյանը։ Հիշատակելով ԱԺԲ-ի՝ սեպտեմբերի 21-ին կազմակերպած հավաքը իր ասածի հերթական վկայությունն էր․ «ՀԱՊԿ-ից դուրս գալու պահանջով ցույցին իրենք էլի փորձ արեցին լեգիտիմացնելու երկիրը ամեն գնով ՀԱՊԿ-ում պահող ռեժիմի պարագլխին»:
Քաղաքետի պնդմամբ, իրենք շատ տարբեր, հայաստանակենտրոն ուժ են և հասկանում են, որ Հայաստանն Արևմուտքին այլընտրանք չունի և որ Հայաստանը կործանել են բոլոր նրանք, ովքեր նրանց պես մշտապես խաբել են ժողովրդին:
«Փրկության ելքը Ռուսաստանի ճիրաններից պոկվելն է: Դրա առաջին փուլը Հայաստանում իշխող թուրք-ռուսական ռեժիմից ազատվելն է: Երկրորդ փուլը, որ պետք է գրեթե զուգահեռ լինի` ԱՄՆ և Ֆրանսիայի հետ բացառիկ դաշնակցային հարաբերությունների արագ հաստատումն է: Այս օրակարգը մենք ենք գեներացրել և հրապարակ բերել և այն, առկա պայմաններում, միայն մենք ի վիճակի, ունակ և կարող իրականություն դարձնել»,-ընդգծեց Հայկ Մարտիրոսյանը:
Արա Ալոյան