Լևոն Տեր-Պետրոսյանը «սահմանազատվեց» Քոչարյանից և Սարգսյանից (տեսանյութ)

Վերլուծական 27 Սեպտեմբեր, 2022 20:15

Երեկ ուշ երեկոյան ռեզոնանսային հարցազրույցով հանդես եկավ ՀՀ առաջին նախագահ Լևոն Տեր-Պետրոսյանը: Հարցազրւյցի անհրաժեշտությունն, ըստ Տեր-Պետրոսյանի, ի հայտ էր եկել ՀՀ նախկին նախագահների և Ամենայն Հայոց Կաթողիկոսի օրեր առաջ տեղի ունեցած համատեղ հանդիպումից հետո: Թեև Պետրոս Ղազարյանի հետ զրույցում կարմիր թելի պես անցնում էր Նիկոլ Փաշինյանի պաշտպանության և վերջինիս այլընտրանք չլինելու թեզը՝ Տեր-Պետրոսյանի հարցազրույցի հիմնական մեսիջները ուղղված էին Ռոբերտ Քոչարյանի և Սերժ Սարգսյանի հետ իր ունեցած հակասություններն ի ցույց դնելու և վերջիններիցս «սահմանազատվելուն»:

Դիցուք՝ ըստ Տեր-Պետրոսյանի հանդիպումից առաջ ինքը տեքստ էր նախապատրաստել, որը այնուհետև պետք է ընդունվեր, սակայն մերժվեց: Իսկ տեքստի գլխավոր մեխը հետևյալն էր՝ նախագահները և կաթողիկոսը պետք է փաստեին, որ գլխավոր խնդիր են համարում ազգային համախմբման կայացումը ու ընդդիմության և իշխանության միջև երկխոսության սկզբնավորումը: Փաստացի Քոչարյանն ու Սարգսյանը մերժել են այս տարբերակը: Հարցազրուցից հետո էլ հայտարարություն տարածեց ՀՀԿ փոխնախագահ Արմեն Աշոտյանը, ով նախ կոռեկտ չհամարեց փակ հանդիման մանրամասների հրապարակայնացումը, մյուս կողմից հաստատեց, որ իրենք Փաշինյանի շուրջ համախմբվելու ֆորմատին դեմ են:

Հաջորդ կետը՝ Տեր-Պետրոսյանը փաստում է, որ հանդիպման ընթացքում ինքը շեշտել է, որ փողոցային պայքարը և հեղափոխության միջոցով Փաշինյանին հեռացնելը հղի է նոր քաոսով, ըստ էության մյուս նախագահները այնուամենայնիվ չեն հրաժարվել միասնական վարչապետի թեկնածու առաջադրելու և Փաշինյանին հեռացնելու մտքից: Եվ սրանով էր պայմանավորված Տեր-Պետրոսյանի այն հայտարարությունը, որ որոշ մարդիկ լուծում առաջարկելու փոխարեն արդեն իսկ կռիվ են անում, թե ով է լինելու հաջորդ վարչապետը: Այսինքն` Տեր-Պետրոսյանը Քոչարյանին և Սարգսյանին տողատակով մեղադրում է աթոռակռիվ մղելու մեջ, իսկ իրեն դիրքավորում է որպես ռեալ քաղաքական օրակարգ առաջարկող:

Մյուս կետը, որում, ինչպես երևում է, չեն հատվել առաջին, երկրորդ և երրորդ նախագահների տեսակետները: Տեր-Պետրոսյանը հայտարարեց, որ ընդդիմության մեծագույն մասը կարծում է, որ եթե Փաշինյանից կարողնան ազատվել, ապա մենք կկարողանանք խուսափել ցավոտ լուծումներից, որոնք սպասվում են Ադրբեջանի և Թուրքիայի հետ։ Մինչդեռ ըստ նրա՝ ով էլ գա, նույնը, գուցե և ավելի վատ փաստաթուղթ ստորագրի: Տեր-Պետրոսյանը հայտարարում է, որ ինքը պատրաստ է աջակցել Փաշինյանին և կիսել պատասխանատվությունը ապագա ստորագրող նոր կապիտուլյացիայի համար, ինչին, ըտս երևույթին, պատրաստ չեն հանդիպման մյուս մասնակիցները և դրանով իսկ, ըստ Տեր-Պետրոսյանի, երկիրը տանում են նոր ցնցումների:

Ոչ պակաս ուշագրավ է նաև Տեր-Պետրոսյանի այն պնդումը, որ Արցախի հարցը լուծված է, իսկ ՌԴ-ն որի ձեռքում էր գտնվում այդ հարցի լուծման բանալին՝ այսօր ի վիճակի չէ անվտանգային հարցեր լուծել անգամ բուն Արցախում: Գաղտնիք չէ, որ թե երկրորդ, թե երրորդ նախագահները ՌԴ հետ հարաբերությունները որակապես նոր մակարդակի բարձրացնելու անհրաժեշտության մասին են խոսել, մինչդեռ Տեր-Պետրոսյանը դա համարում է սխալ հաշվարկ և կոչ անում նայել ԵՄ կամ ԱՄՆ կողմը:

Վաղը ասուլիս է տալու նաև երկրորդ նախագահ Ռոբերտ Քոչարյանը և չի բացառվում, որ Տեր-Պետրոսյանը Էջմիածնում տեղի ունեցած հանդիպումից հետո շտապել էր առաջինը բացել որոշ խաղաքարտեր: Մի կողմից` թեև խոսվում է միասնականության և համատեղ պայքարելու պատրաստակամության մասին՝ Տեր-Պետրոսյանը այս հարցազրույցով ապացուցում է, որ նախկին նախագահների միջև տարաձայնությունները շատ ավելի շատ են: Եթե վաղը Փաշինյանը նոր կապիտուլյացիա ստորագրի, ապա ինքը` Տեր-Պետրոսյանը, կկարողանա հայտարարել, որ զգուշացնում էր, սակայն ընդդիմադիր դաշտի մյուս խաղացողները նախընտրեցին «աթոռակռիվը»: Ինչևէ, այս հարցազրույցով առաջին նախագահը գնդակը փոխանցեց Ռոբերտ Քոչարյանի և Սերժ Սարգսյանի դաշտ, ակնհայտ է, որ նրանց արձագանքը չի ուշանա...