Առաջարկում ենք թույլատրել քաղաքացիներին ակոսափող հրազենի փամփուշտների լիցքավորումը. Վիլեն Գաբրիելյան

Բովանդակային փոփոխություններում մի կարեւոր կետ կա, այդ կետը վերաբերում է ակոսափող հրազենի փամփուշտների լիցքավորմանը: Մենք առաջարկում ենք թույլատրել քաղաքացիներին ակոսափող հրազենի փամփուշտների լիցքավորումը Կառավարության կողմից հատուկ սահմանված կարգով: Ոստիկանության մեր գործընկերներն այս պահի դրությամբ որոշակի ռիսկ են տեսնում, գտել ենք կոմպրոմիսային տարբերակ: Այս մասին ասել է հիմնական զեկուցող Վիլեն Գաբրիելյանը՝ ներկայացնելով «Զենքի շրջանառության կարգավորման» մասին օրենքի եւ հարակից օրենքների նախագծերի փաթեթի առաջինից երկրորդ ընթերցում ընկած ժամանակահատվածում կատարված տեխնիկական եւ բովանդակային բնույթի փոփոխությունները:

Այս մասին տեղեկանում ենք Ազգային ժողովի մամուլի ծառայությունից։

Նախագիծը երկրորրդ ընթերցմամբ ընդունելու հարցը քննարկվել է Պաշտպանության եւ անվտանգության հարցերի մշտական հանձնաժողովի սեպտեմբերի 29-ի նիստում: Հեղինակներն են Վիլեն Գաբրիելյանը, Արմեն Խաչատրյանը եւ Անդրանիկ Քոչարյանը:

Հեղինակների կարծիքով՝ այս նախագծով բարձրացնում են հասարակության պաշտպանվածությունը: Նախագիծը կարգավորում է ՀՀ-ում զենքի եւ ռազմամթերքի շրջանառությունը, նպաստում է որսորդության, սիրողական եւ սպորտային հրաձգության, ինչպես նաեւ ռազմամարզության զարգացմանը, ներդրվում է զենքի հետ վարվելու մշակույթը, որն ուղղված կլինի քաղաքացիների մարտունակության բարձրացմանը:

Նախագիծը ստացել է դրական եզրակացություն:

Հանձնաժողովը երկրորդ ընթերցմամբ քննարկվել է նաեւ ««Զինվորական ծառայության եւ զինծառայողի կարգավիճակի մասին» ՀՀ օրենքում լրացումներ կատարելու մասին» օրինագիծը: Առաջարկվում է պարտադիր զինվորական ծառայությունից ազատել այն քաղաքացիներին, որոնք որպես օտարերկրյա քաղաքացի ՀՀ քաղաքացիություն են ձեռք բերել որեւէ մարզաձեւում Հայաստանի հավաքականի թիմում հանդես գալու համար եւ մինչեւ 2021 թ. մայիսի 1-ը պարտադիր զինվորական ծառայությունից տարկետման իրավունքը կորցրել են:

ԿԳՄՍ փոխնախարար Կարեն Գիլոյանը նշել է, որ առաջին ընթերցումից հետո Կառավարությունը ներկայացրել է մի շարք խմբագրական բնույթի առաջարկներ, որոնք ընդունվել են:

Հարակից զեկուցող, հանձնաժողովի անդամ Վահագն Ալեքսանյանը, կարեւորելով նախագծի ընդունումը, գործընկերներին կոչ է արել կողմ քվեարկել:

Հանձնաժողովականները դրական եզրակացություն են տվել օրենքի նախագծին:

Քննարկվել է նաեւ Կառավարության հեղինակած ««Ոստիկանության մասին» օրենքում լրացում կատարելու մասին» օրենքի նախագիծը երկրորդ ընթերցմամբ ընդունելու հարցը:

«Առաջարկվող լրացմամբ նախատեսվում է «Ոստիկանության մասին» օրենքում սահմանել դրույթ, որի համաձայն՝ Կառավարության կողմից սահմանված կարգով կիրականացվի անչափահասների հաշվառումը: «Ոստիկանության մասին» օրենքի որեւէ հոդվածում անչափահասներին հաշվառման վերցնելու վերաբերյալ դրույթ ամրագրված չէ: Ներկայում իրավախախտում եւ հանցագործություն կատարած անչափահասների կամ անչափահասի վարքագծի վրա բացասական ներգործություն ունեցող ծնողների վերաբերյալ հաշվառում իրականացվում է դեռեւս 1996 թ. ՀՀ ՆԳ նախարարի 633 հրամանով»,- ասել է ՀՀ ոստիկանության պետի տեղակալ Արա Ֆիդանյանը:

Հաշվի առնելով նախագծի վերաբերյալ Ազգային ժողովի աշխատակազմի փորձագիտական եւ վերլուծական վարչության եզրակացությունը եւ ՀՀ արդարադատության նախարարության կարծիքը՝ առաջարկվել է լրամշակել օրինագիծը՝ կատարելով որոշակի տեխնիկական եւ խմբագրական փոփոխություններ:

Հարակից զեկուցող Պաշտպանության եւ անվտանգության հարցերի մշտական հանձնաժողովի նախագահի տեղակալ Արմեն Խաչատրյանը նշել է, որ ներկայացված նախագծով Կառավարությանը պատվիրակվում է սահմանել անչափահասներին հաշվառման վերցնելու կարգը: Մինչ այս պահն այն իրականացվել է 1996 թ. ՆԳ նախարարի հրամանով, ինչը ներկայիս օրենսդրությամբ չի կարող նորմատիվ իրավական բնույթ կրել եւ բավականին լուրջ խնդիրներ է առաջացրել ոլորտի կարգավորման համար:

Նախագիծն արժանացրել է դրական եզրակացության:

Այս թեմայով ՔՊ-ի նոր նախագծով արգելվում է ատել թշնամուն և խտրական վերաբերմունք դրսևորել․ «Հրապարակ» «Ժողովուրդ». Ինչ ազգակցական կապ ունեն Վիլեն Գաբրիելյանն ու Դավիթ Տոնոյանը Իմ ու Աշոտի անունից երաշխավորում եմ ցանկացած գերի եղբոր հետ փոխանակման մեր պատրաստակամությունը. Վիլեն Գաբրիելյան Պատրաստակամություն եմ հայտնում փոխանակվել յուրաքանչյուր մեր ռազմագերու հետ. Վիլեն Գաբրիելյան Ասենք՝ Շուշին մերը չի էլ, հետո ի՞նչ. Վիլեն Գաբրիելյան Ամոյան Ռոմանն ինձ համար առաջին հերթին ՀՀ քաղաքացի է, ով ոչնչով առավել չէ ՀՀ մյուս քաղաքացիներից. Վիլեն Գաբրելյան