Ադրբեջանի «մուտիլովկաները» ցույց են տալիս, որ իրականում այդ երկիրը գոհ չէ 44-օրյա պատերազմի արդյունքներից․ Հովիկ Աղազարյան
ՔաղաքականՎերջին շրջանում Ադրբեջանի հռետորաբանությունը ավելի ու ավելի ջղաձիգ է դառնում․ այդ երկրի ռազմաքաղաքական ղեկավարության տարբեր ներկայացուցիչներ շարունակում են մեղադրանքներ հասցեագրել Հայաստանին՝ հընթացս ներկայացնելով նորանոր պահանջներ։
Նախօրեին, օրինակ, Ադրբեջանի ՊՆ-ն հայտարարություն տարածեց, թե իբր Վարդենիսի շրջանում զինտեխնիկայի և մարդկային ուժի կուտակում է արձանագրել՝ զգուշացնելով, այսպես կոչված, նոր էսկալացիայի վտանգի մասին։
Հարցին, թե ո՞րն է Բաքվի այս քայլերի շարժառիթը, ԱԺ ՔՊ խմբակցության պատգամավոր Հովիկ Աղազարյանը ԼՈՒՐԵՐ․ com-ի հետ զրույցում ընդգծեց․
«Ադրբեջանի գործողությունները կամ այսպես ասած «մուտիլովկաները» նշանակում են մի բան․ Ալիևի վարչակազմը գոհ չէ Արցախյան 44-օրյա պատերազմի արդյունքներից և հիմա ցանկանում է կրակը անթեղ պահել, որպեսզի ցանկացած ժամանակ այն բորբոքի։ Ճիշտ է, մենք ապրում ենք օրհասական օրերում, բայց համենայն դեպս ՀՀ իշխանությունների արտաքին քաղաքականությունը և պահանջները հստակ են»։
Մինչդեռ, ըստ իշխանական պատգամավորի, Ադրբեջանը ցանկանում է շեղել ու մոլորեցնել միջազգային հանրությանը․
«Այսինքն Ադրբեջանը ցույց է տալիս, որ կառուցողական չէ և այլ հավակնություններ ունի։ Խաղաղության պայմանագրի ստորագրումը բարդ ու տևական գործընթաց է, բայց Բաքվի քայլերը դրան ոչ թե նպաստում են, այլ խոչընդոտում։ Հայկական կողմը, անկախ ամեն ինչից, իր նպատակների, հայտարարություննների և գործողությունների մեջ ազնիվ է ու բաց»։
Արա Ալոյան