Ով որքան գումար է վերադարձրել բյուջե. 8 միլիարդի «թալանի» հետքերով

Վերլուծական 22 Հոկտեմբեր, 2022 20:49

Նիկոլ Փաշինյանն ու թիմը հեղափոխությունից հետո տարբեր առիթներով հիշատակում էին նախկին պաշտոնյաների կողմից իրականացված «թալանը» և հավաստիացնում, որ այդ գումարները լումա առ լումա վերադառնալու են պետական բյուջե: Սակայն, հեղափոխությունից անցել է շուրջ հինգ տարի, իսկ խոստացված գումարները բյուջե են վերադառնում իսկապես կոպեկ առ կոպեկ, սակայն, ոչ թե վերադարձի ամբողջականության իմաստով, այլ այն դանդաղության և չնչին չափերի, որով տվյալ գումարները վերադարձվում են պետությանը:

Դիցուք՝ հեղափոխությունից հետո Հայաստանի երրորդ նախագահ Սերժ Սարգսյանի եղբայրը՝ Ալեքսանդր Սարգսյանը, Ազգային անվտանգության ծառայության քննչական դեպարտամենտում քրեական գործի նախաքննության ընթացքում հարկային ստուգումների արդյունքում առաջացած հարկային պարտավորությունների կատարման նպատակով մինչ օրս ՀՀ պետական բյուջե է փոխանցել 3.165.448.706 ՀՀ դրամ: Դրանից ամիսներ անց հայտնվեց տեղեկություն, որ ՀՀ ոստիկանությունը 3,124,610,000 դրամ արժողությամբ Հավատարմագրային կառավարման ծառայություններ է գնել հանրությանը քաջ հայտնի «Սեքյուրիթի Դրիմ» ընկերությունից: Հիշեցնենք՝ այս ընկերությունը կապվում է Սերժ Սարգսյանի եղբոր՝ Սաշիկ Սարգսյանի անվան հետ: Շահեց այս դեպքում Սաշիկ Սարգսյանը, թե կորցրեց՝ դատեք ինքներդ:

Ըստ ՀՔԾ-ի՝ հարկեր չվճարելու տեսքով պետությանը 30 միլիոն դրամ էր վերադարձել «ՄԱՊ» ընկերությունը։ Այս փաստը բացահայտվել է բնապահպանության նախկին նախարար Արամ Հարությունյանի կողմից Աիլվա Համբարձումյանից 14 միլիոն դոլարի կաշառք ստանալու գործի քննության շրջանակում։ «ՄԱՊ»-ը գինի, կոնյակ, ալկոհոլային խմիչքներ արտադրող ձեռնարկություն է, ընկերության սեփականատերը նախկին պատգամավոր Ալեքսան Պետրոսյանն է։ «ՄԱՊ» գինու և կոնյակի գործարանը մեկ միլիոն դրամ է փոխանցել ՔՊ-ին որպես նվիրատվություն:

2018 թվականի մայիսին ԱԱԾ-ն հայտարարել էր, որ ձեռք բերված նախնական տվյալներով պարզվել է, որ «Ալեքս Հոլդինգ» ՍՊ ընկերությունը, հանդիսանալով ավելացված հարկ վճարող կազմակերպություն, դեռեւս 2016 թվականի վերջին, տեղական գյուղմթերքի գնաճ չառաջացնելու պատրվակով, համաձայնություն է ձեռք բերել ՀՀ ՊԵԿ նախկին ղեկավարության հետ` գյուղացիներից գնված գյուղմթերքի վաճառքը «Երեւան Սիթի» սուպերմարկետների ցանցից իրականացնել տարբեր անձանց անվամբ հիմնադրված ԱՁ-ներով, որոնց իրացման շրջանառության սահմանաչափը 115 մլն ՀՀ դրամ է, ինչը հնարավորություն է ընձեռել 20 տոկոս ԱԱՀ-ի եւ շահութահարկի փոխարեն վճարել ընդամենը 2 տոկոսի չափով շրջանառության հարկ: Ալեքսանյանը պետությանն է վերադարձրել 5,2 միլիարդ դրամ:

ՊԵԿ նախկին նախագահ Վարդան Հարությունյանի հետ առչնվող «Նորֆոլկ Քոնսալթինգ» ընկերության դեմ նույնպես քրեական գործ էր հարուցվել, գործը սակայն կարճվել է, իսկ ընկերությունը պետությանն է վերադարձրել 5 միլիոն ԱՄՆ դոլար: Ամիսներ անց կառավարության որոշմամբ Վարդան Հարությունյանի որդիների ընկերությունը՝ «Գրին Ֆարմեր»-ը ազատվեց 660 միլիոն դրամ արժեքով ապրանքների ներմուծումից, ԱԱՀ-ի վճարն էլ երեք տարով հետաձգվեց:

Հանրությանը «Սերժի Վաչո» մականվամբ հայտնի Վաչագան Ղազարյանը պետական բյուջե է վերադարձրել 2 մլրդ 847 մլն դրամ:

Հայաստանի նախկին վարչապետ և ԱԺ նախկին նախագահ Հովիկ Աբրահամյանը, որին Նիկոլ Փաշինյանը մեղադրում էր կոռուպցիոն ճանապարհներով միլիարդներ աշխատելու մեջ, պետությանը վերադարձրել է ընդամենը 170 մլն դրամ: Ի դեպ, Հովիկ Աբրահամյանը Մոնումենտի ընտրյալների թաղամասում մինչև այս տարվա մարտ ամիսը երկու առանձնատուն ուներ, որոնցից մեկը վաճառեց 5 մլն դոլարով:

ԵԿՄ նախկին նախագահ Մանվել Գրիգորյանը պետությանը նվիրաբերել էր Ակնալիճ համայնքում իրեն պատկանող «Ակնալճի կուղբաբուծական տնտեսություն» ընկերության շուրջ 330 հեկտար տարածքը։ Այն ընդգրկում է 5445 քմ մակերեսով շենք-շինություններ։ Մանվել Գրիգորյանի կողմից պետությանը նվիրաբերվող տարածքի շուկայական արժեքը գնահատվում է 5.084 մլրդ դրամ՝ ավելի քան 10.5 մլն դոլար։

Հրազդանի նախկին քաղաքապետ Արամ Դանիելյանը պետությանը փոխհատուցել է 102 մլն դրամ:

Մաքսայինի նախկին ղեկավար Արմեն Ավետիսյանի ընտանիքը հարուցված քրեական գործից հետո պետությանը տարածք է նվիրաբերել. «Գոլդեն փելտս» հյուրանոցը, որը վերջերս մեծ աղմուկով վաճառվեց:

Տվյալներ չկան այն մասին, թե որքան գումար են պետությանը վերադարձրել Փաշինյանի կողմից թալանի մեջ մեղադրվող երկրորդ և երրորդ նախագահները:

Ինչպես տեսնում ենք, թեև հեղափոխությունից հետո Նիկոլ Փաշինյանը հայտարարում էր, որ Հայաստանից ապօրինի կերպով դուրս բերված. ասել է թե՝ թալանված գումարները հասնում են 8 միլիարդ դոլարի, թեև խոստանում էր կոպեկ առ կոպեկ այդ գումարները հետ բերել՝ գրեթե հինգ տարվա ընթացքում պետական բյուջե վերադարձված գումարը ընդհանուր առմամբ շատ հեռու է այդ թվից, բացի այդ, մի շարք նախկին պաշտոնյաներ, ովքեր դեռ երեկ պետությանը հասցրած վնաս էին փոխհատուցում, այսօր բավականին լուրջ արտոնություններ են ստանում իրենց թալանչի անվանած կառավարությունից...