Ռուսաստանի հետ կապ ունեցող հաքերները կոտրել են Լիզ Թրասի հեռախոսը. ԶԼՄ

Մեծ Բրիտանիայի նախկին վարչապետ Լիզ Թրասի անձնական սմարթֆոնը կոտրել են հաքերները, որոնք իբր աշխատում են ռուսական հետախուզական ծառայությունների համար։ Այսպիսի հայտարարություն է արել շաբաթ երեկոյան իր կայքում բրիտանական Mail On Sunday թերթը։

Հրապարակման թղթակիցները վկայակոչում են թագավորության պետական ​​անվտանգության մարմինների աղբյուրները, որոնց համաձայն Թրասի հեռախոսը կոտրել են այն ժամանակ, երբ նա զբաղեցնում էր Մեծ Բրիտանիայի արտաքին գործերի նախարարության ղեկավարի պաշտոնը։ Հաքերային հարձակման փաստը բացահայտվել է հուլիսին՝ Թրասի վարչապետության համար պայքարին միանալուց քիչ առաջ։ Ըստ Mail On Sunday-ի զրուցակիցների, հարձակվողներին հասանելի են դարձել Թրասի նամակագրությունը վերջին մեկ տարվա ընթացքում, ներառյալ գաղտնի տեղեկություններ պարունակող հաղորդագրություններ, Լոնդոնի և նրա հիմնական դաշնակիցների միջև բանակցությունների մանրամասները, ինչպես նաև տեղեկություններ Ուկրաինային զենքի մատակարարումների մասին:

Միջադեպի մասին տեղեկությունը, իբր, թաքցվել է Բորիս Ջոնսոնի խնդրանքով, որը ղեկավարում էր Մեծ Բրիտանիայի կառավարությունը մինչև անցյալ ամիս։ Հրապարակայնությունը կարող էր խոչընդոտ հանդիսանալ Թրասի՝ վարչապետ դառնալու ճանապարհին, որը նա, այնուամենայնիվ, լքեց հոկտեմբերի 20-ին՝ պաշտոնը ստանձնելուց ընդամենը 50 օր անց:

Հրատարակությունը նշում է, որ աղբյուրների խոսքերն անուղղակիորեն հաստատում է այն փաստը, որ ամռանը Թրասը փոխել է հեռախոսահամարը, որն օգտագործում էր ավելի քան 10 տարի։

Այս թեմայով «Հրապարակ». Ինչու է հրաժարական տվել Լիզ Թրասը ՌԴ ԱԳՆ-ն «խայտառակություն» է անվանել Թրասի հրաժարականը Լիզ Թրասն իրեն մոլի սիոնիստ և Իսրայելի աջակից է անվանել