Հնագետները վերստեղծել են իտալացու արտաքինը, ով դաժանաբար սպանվել է 700 տարի առաջ

Science and culture 6 January, 2023 16:16

Սիենայի և Ինսուբրիայի համալսարանների գիտնականները պարզել են, որ տղամարդը, ում կմախքը հայտնաբերվել է 2006 թվականին Իտալիայի հյուսիսում գտնվող եկեղեցում, դաժանաբար սպանվել է սրերի հարվածներով մոտ 700 տարի առաջ: Հետազոտությունը հրապարակված է Journal of Archaeological Science: Reports ամսագրում:

Հնագետները զոհի կմախքը հայտնաբերել են 2006 թվականին Իտալիայի հյուսիսային Վարեզե նահանգում գտնվող փոքր քաղաքի Սան Բիաջիո ին Չիտիլո եկեղեցում։ Նոր հետազոտության ընթացքում գիտնականները վերլուծել են տղամարդու մնացորդները՝ օգտագործելով ժամանակակից դատաբժշկական մեթոդները, ներառյալ 3D ռենտգեն սկանավորումը և գանգի վնասվածքների թվային մանրադիտակը, ինչպես նաև վերստեղծել են նրա արտաքինը:

Տղամարդն ապրել է XI-XIII դարերում և սպանության պահին եղել է 19-ից 24 տարեկան։ Նա սրով չորս հարված է ստացել գլխին։ Առաջին վերքը բավական թեթև է եղել, բայց հետո սկսել են ավելի շատ հարվածներ հասցնել, երբ փորձել է փախչել: Մարդասպանը հարվածներ է հասցրել թիկունքից։ Ի վերջո, հավանաբար հյուծված տղամարդը վերջնական հարված է ստացել գլխի հետևի մասում, որն անմիջապես մահվան պատճառ է դարձել։

Հեղինակների կարծիքով՝ դաժանությունն ու բազմաթիվ հարվածները հուշում են սպանության բարդ դրդապատճառի մասին՝ հարձակվողը վճռական է եղել ավարտել իր «գործը»։ Բոլոր վնասվածքները հասցվել են նույն զենքից, իսկ հարձակվողը գործել է միայնակ։

Տղամարդու ճակատի ապաքինված վերքը հուշում է, որ նա մարտական փորձ է ունեցել, իսկ նրա աջ ուսի թիակի առանձնահատկությունները վկայում են վաղ տարիքից նետաձգությամբ զբաղվելու մասին։ Հետազոտողներին չի հաջողվել պարզել զոհի ինքնությունը, սակայն թաղման վայրը հուշում է, որ նա կարող էչ լինել հզոր Դե Սիտիլիո ընտանիքի անդամ, որը կառուցել է եկեղեցին:

Medieval murder victim was killed by multiple sword blows to the head 700 years ago, study finds | Daily Mail Online