Այս իրավիճակում իշխող կուսակցության պատգամավորները խոսում են ընդամենը, «խաղաղության գործընթացի դանդաղեցման» մասին
ԲլոգոսֆերաՔաղաքական գիտությունների դոկտոր, պատմաբան Արմեն Այվազյանը Ֆեյսբուքի իր էջում գրել է․
2020 թ. սեպտեմբերի 27-ից սկսած ու մինչև այսօր Հայաստանի (ներառյալ Արցախի) դեմ արդյունավետորեն իրականացվում է դասական ցեղասպանություն. գրավվել են ու հայաթափվել բազմաթիվ հայկական շրջաններ, քաղաքներ ու գյուղեր, այդ թվում՝ Հադրութը, Շուշին, Քարինտակը, Տողը, Ավետարանոցը, Վերին և Ներքին Շորժաները... Ամբողջ Արցախը պաշարված է ու գտնվում է սպիտակ կամ կարմիր ջարդի եզրին... Նույն վտանգը կախված է Սյունիքի և ՀՀ սահմանամերձ մյուս շրջանների գլխին։ Այդ ամենի մասին թշնամին բազմիցս ինքն է բացեիբաց հայտարարել։
Ահա այս իրավիճակում իշխող կուսակցության պատգամավորները խոսում են ընդամենը... «խաղաղության գործընթացի դանդաղեցման» մասին (https://news.am/arm/news/740339.html)։
Սրանց բառապաշարից ու մտքից իսպառ դուրս են ընկել (երբևէ չեն էլ եղել) «զորահավաք», «զորավարժություններ», «աշխարհազոր», «ինքնապաշտպանություն», «ազգային-ազատագրական պայքար», «ամրաշինություններ», «ամրաշրջաններ», «դիմադրություն», «հայրենի հող» և շատ ուրիշ այդքան տեղին ու անհրաժեշտ բառեր ու բառակապակցություններ, որոնք ամեն օր պետք է լսեինք իշխանության ներկայացուցիչների շուրթերից։ Եթե, իհարկե, այդ իշխանությունը ՀԱՅԿԱԿԱՆ լիներ։ Բայց իշխանությունն օտարի դրածոն է, ուստիև բնական է, որ այժմ ստիպված ենք լսել միայն
այս ու այն օտարին ուղղված օգնության ապարդյուն կոչերը, դիմումներն ու աղերսանքները, որոնք մեզանում ծնում են միայն անօգնականության զգացումներ, իսկ դրսում՝ խղճահարություն և զզվանք։
ՈՉ ՈՔ ՉԻ ԿԱՆԳՆԵՑՆԵԼՈՒ ԹՈՒՐՔԻՆ, ԵԹԵ ՄԵՆՔ ՉԿԱՆԳՆԵՑՆԵՆՔ։ Այս տարրական ճշմարտությունը ոչ մի կերպ չի ուզում հասկանալ ՀՀ բթացած, ապազգայնացած ու ապազգայնացված բյուրոկրատիան։ Եթե որոշ չինովնիկներ էլ հասկանում են, ապա թքած ունեն, որովհետև իրենց առաջնային անձնական պարտավորություններն այլ հարթություններում են։
Այնինչ ՀԱՅԿԱԿԱՆ իշխանությունն արդեն վաղուց գործարկած կլիներ մեր աշխարհառազմավարական պայմանների համար համապետական և համաժողովրդական ինքնապաշտպանության միակ ճիշտ և ընդունելի մեխանիզմը՝ Ազգ-բանակ մոդելը։
Երկրի անվերադարձ գահավիժումը կասեցնելու համար ժամանակ շատ քիչ է մնացել։ Հասցնել է պետք։