Դանի Ալվեսը կալանավորվել է
Սպորտ«Բարսելոնայի» նախկին պաշտպան և աշխարհի ամենաշատ պարգևատրված ֆուտբոլիստներից մեկը՝ Դանի Ալվեսը, ձերբակալվել է դեկտեմբերի 30-ին Բարսելոնայի «Sutton» գիշերային ակումբում երիտասարդ կնոջ նկատմամբ սեռական ոտնձգություն կատարելու կասկածանքով:
Դա տեղի է ունեցել տեղական ժամանակով առավոտյան ժամը մոտ 10-ին։
Հունվարի 20-ի առավոտյան Ալվեսը պետք է ներկայանար Կատալոնիայի մայրաքաղաքի Լես-Քորթս ոստիկանական բաժանմունք՝ հարցաքննության։ Ձերբակալությունից հետո Դանիին կտեղափոխեն դատարան, որտեղ նրա նկատմամբ կընտրեն ժամանակավոր խափանման միջոց, գրում է Sports.ru-ն՝ հղում անելով Cope-ին։
Դիմումատուի խոսքով՝ 39-ամյա Ալվեսը, ով Բրազիլիայի հավաքականի կազմում Կատարի աշխարհի առաջնությանը մասնակցելուց հետո հանգստանում էր Բարսելոնայում, գիշերային ակումբում խնջույքի ժամանակ մոտեցել է մի երիտասարդ կնոջ և առանց նրա համաձայնության, ձեռքը մտցրել նրա ներքնազգեստի մեջ: Ըստ տուժողի ցուցմունքի՝ երբ իրեն հաջողվել է փախչել ֆուտբոլիստից, ինքն այդ մասին հայտնել է ընկերներին և գիշերային ակումբի անվտանգության աշխատակիցներին, ովքեր դիմել են կատալոնական ոստիկանություն։
Մեղադրանքներից հետո Դանին հաստատել է, որ դեկտեմբերի 30-ին եղել է «Sutton» ակումբում, սակայն հերքել է, որ իր կողմից ոչ պատշաճ վարքագիծ է դրսևորվել. «Ես երբեք չեմ ներխուժել մարդկանց անձնական տարածք: Սա ինձ ու իմ սիրելիներին վնասելու փորձ է»,- ասել է նա։