Բռնության սպառնալիքով ինքնիշխանությունից հրաժարվելու կոչերի համար քրեական պատասխանատվություն կսահմանվի
ՔաղաքականՀայաստանում քրեական պատիժ կսահմանվի ինքնիշխանությունից հրաժարվելուն՝ բռնություն գործադրելու կամ բռնություն գործադրելու սպառնալիքով ՀՀ ինքնիշխանությունը լրիվ կամ մասնակի սահմանփակելուն ուղղված գործողություններ կատարելու, ինչպես նաև ինքնիշխանությունից հրաժարվելուն ուղղված հրապարակային կոչերի համար:
Հայաստանի Հանրապետության քրեական օրենսգրքում լրացումներ կատարելու մասին օրենքի նախագիծն ԱԺ նիտում ներկայացրեց Արդարադատության նախարարի տեղակալ Լևոն Բալյանը:
Ներկայում գործող Քրեական օրենսգրքում քրեական պատասխանատվություն է նախատեսված սահմանադրական կարգը տապալելու, ներառյալ Սահմանադրության 1-ին հոդվածի գործողությունը փաստացի դադարեցնելու և դրան ուղղված բռնի կոչերի համար: Բալյանը նկատեց՝ այսինքն՝ գործող Քրեական օրենսգրքով ինքնիշխանությունից բռնի հրաժարվելուն ուղղված գործողությունների կամ հրապարակային կոչերի համար քրեական պատասխանատվություն նախատեսված չէ, մինչդեռ ինքնիշխանությունը պետության, որպես սուբյեկտի, հիմնական հատկությունն է:
Իսկ եթե կոչերը կատարվել են՝ հրապարակային ցուցադրվող ստեղծագործությունները կամ ԶԼՄ-ները կամ տեղեկատվական տեխնոլոգիաներն օգտագործելով, ապա կարող է սպառնալ մինչև 2-5 տարի ժամկետով ազատազրկում:
Նախագծի ընդունման դեպքում քրեորեն պատժելի արարքներ են համարվելու ինքնիշխանությունից հրաժարվելուն, բռնություն գործադրելու կամ բռնություն գործադրելու սպառնալիքով ՀՀ ինքնիշխանությունը լրիվ կամ մասնակի սահմանփակելուն ուղղված գործողություններ կատարելը, ինչպես նաև ինքնիշխանությունից հրաժարվելուն ուղղված հրապարակային կոչերը:
Բալյանը պարզաբանեց, որ արարքը պետք է զուգորդված լինի բռնի ուժով, այսինքն՝ որևէ գործողություն, որն ուղղված կլինի ինքնիշխանության դեմ, պետք է զուգորդված լինի բռնի ուժով:
ՔՊ խմբակցության պատգամավոր Սիսակ Գաբրիելյանի համար անհասկանալի էր ձևակերպումը: «Ո՞վ է բռնի ուժով ստիպում հրաժարվել ինքնիշխանությունից: Եթե, օրինակ, ես կոչ արեցի, հետո բռնի ուժով ի՞նչ եմ անում, եթե չունեմ իշխանական լծակներ, քաղաքական գործիչ եմ»,-հետաքրքրվեց պատգամավորը:
«Հայաստան» խմբակցության քարտուղար Արծվիկ Մինասյանը ևս ինքնիշխանության մասին խոսելիս նշեց, որ ձևակերպումն անհասկանալի է և հստակության կարիք կա: