Ապացուցելու բան ունեի ինքս ինձ. Եվրոպայի չեմպիոն Սամվել Գասպարյան
ՍպորտԾանրամարտի Եվրոպայի առաջնության կրկնակի չեմպիոն Սամվել Գասպարյանի կարծիքով հարազատ պատերն օգնել են իրեն առավել լավ հանդես գալու ԵԱ-ում:
«Աննկարագրելի տպավորություններ ունեմ այս հաղթանակից հետո: Մենք մեզ խոսք էինք տվել, որ բոլորս պետք է մեդալ նվաճեինք: Անբացատրելի է այս ամենը, քանի որ առաջնությունը հայրենիքում է, ջանք ու եռանդ չէինք խնայել: Ինձ համար առավել կարևոր էր, քանի որ նոր քաշային կարգում էի հանդես գալիս: Նախորդ տարվա համեմատ ապացուցելու բան ունեի ինքս ինձ»,- «Արմենպրես»-ի հաղորդմամբ` լրագրողների հետ զրույցում ասաց Գասպարյանը:
Հայ ծանրորդը շեշտեց, որ ամեն ինչ կրկնակի ոգևորիչ է, ընտանիքի անդամները, հայրենակիցներn իրենց աջակցությամբ ոգևորել են մարզիկներին երևանյան մրցաշարում:
«Զգացել եմ, թե ինչպես են բոլորն աջակցում: Հարազատ պատերը մեզ օգնեցին՝ լավ հանդես գալու»,-ասաց նա:
Հայաստանի ծանրամարտի հավաքականի անդամ ՍամվելԳասպարյանը դարձավ Եվրոպայի առաջնության կրկնակի չեմպիոն: Նա պոկում վարժությունում երկու հաջող մոտեցմամբ բարձրացրեց 172 կգ և 175 կգ: Գասպարյանն այս ձևում դարձավ ոսկե մեդալակիր: Գյումրեցի մարզիկը ոսկի նվաճեց նաև հրում վարժությունում` բարձրացնելով 211 կգ և 220 կգ: Երկամարտի 395 կգ արդյունքով Գասպարյանը դարձավ Եվրոպայի չեմպիոն: