Ստորագրվել է Հայաստանի և Թուրքմենստանի միջև մշակույթի բնագավառում 2023-2025 թթ համագործակցության ծրագիրը

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր ընդունել է Թուրքմենստանի մշակույթի նախարար Ատագելդի Շամուրադովի գլխավորած պատվիրակությանը:

Մայիսի 30-ից հուլիսի 2-ը ՀՀ-ում անցկացվում են Թուրքմենստանի մշակույթի օրեր, և պատվիրակությունը Հայաստան է ժամանել մշակութային ծրագրի շրջանակում:

Հանդիպմանը ներկա են եղել նախարարի տեղակալներ Արթուր Մարտիրոսյանը, Արայիկ Խզմալյանը և Ալֆրեդ Քոչարյանը, ինչպես նաև ՀՀ-ում Թուրքմենստանի արտակարգ և լիազոր դեսպան Մուհամետգելդի Այազովը:

Հանդիպման ընթացքում Ժաննա Անդրեասյանը և Ատագելդի Շամուրադովը ստորագրել են «Հայաստանի Հանրապետության կառավարության և Թուրքմենստանի կառավարության միջև մշակույթի ու արվեստի բնագավառում 2023-2025 թվականների համագործակցության ծրագիրը»:

Ողջունելով հյուրերին՝ Ժաննա Անդրեասյանը նշել է, որ հանդիպումը լավ առիթ է՝ հայ-թուրքմենական բարեկամական հարաբերությունները ևս մեկ անգամ ընդգծելու և մշակութային համագործակցության լայն շրջանակում մատնանշելու համատեղ անելիքները:

Կարևորելով «Թուրքմենստանի մշակույթի օրերը Հայաստանում» ծրագիրը, որը նախատեսվում էր իրականացնել դեռևս 2020 թ., սակայն կորոնավիրուսի համաճարակով պայմանավորված՝ հետաձգվել էր, նախարարը նշել է, որ համատեղ նախագծերի իրականացումը և փորձի փոխանակման հնարավորությունները նպաստում են երկկողմ հարաբերությունների ամրապնդմանը: Ժաննա Անդրեասյանը, մասնավորապես, կարևորել է Երևանի Կոմիտասի անվան պետական և Թուրքմենստանի ազգային կոնսերվատորիաների համագործակցությունը, որի շրջանակում իրականացվում են մի շարք մշակութային միջոցառումներ: Այս համատեքստում նախարարը նշել է, որ այս տարի պետական մակարդակով նշվում է հայտնի կոմպոզիտոր Արամ Խաչատրյանի 120-ամյակը: 2024 թվականին նշվելու է կինոռեժիսոր Սերգեյ Փարաջանովի 100-ամյակը, որի նախապատրաստական աշխատանքները նույնպես սկսվել են:

ԿԳՄՍ նախարարն անդրադարձել է նաև 2019 թ. նոյեմբերի 5-7-ը Թուրքմենստանում կայացած Հայաստանի մշակույթի օրերին, որի շրջանակում տեղի են ունեցել մի շարք ցուցադրություններ, համերգ, փորձի փոխանակման և վարպետության դասեր:

Թուրքմենստանի մշակույթի նախարար Ատագելդի Շամուրադովը  շնորհակալություն է հայտնել ջերմ ընդունելության և Հայաստանում Թուրքմենստանի մշակույթի օրերը բարձր մակարդակով կազմակերպելու համար:

Նա կարևորել է Երևանի Կոմիտասի անվան պետական և Թուրքմենստանի ազգային կոնսերվատորիաների, Երևանի պետական և Թուրքմենստանի Մախթումկուլիի անվան պետական համալսարանների միջև համագործակցության ընդլայնումը, մշակութային և կրթական մի շարք միջոցառումների անցկացումը:

Ատագելդի Շամուրադովը նաև նշել է, որ հայ և թուրքմեն մշակույթի գործիչներն ավանդաբար կազմակերպում են համատեղ միջազգային գիտաժողովներ և գրական ընթերցումներ: Այս համատեքստում անդրադարձ է եղել թուրքմեն հայտնի գրող Մախթումկուլի Ֆրագիի ստեղծագործությունների հայերեն թարգմանություններին:

Նշենք նաև, որ Թուրքմենստանի մշակույթի նախարար Ատագելդի Շամուրադովի գլխավորած պատվիրակությանը երեկ այցելել է Ս. Փարաջանովի թանգարան, իսկ «Թուրքմենստանի մշակույթի օրերը Հայաստանում» ծրագրի փակումը նախատեսվում է անցկացնել հունիսի 2-ին Արտաշատ քաղաքում:

Related Articles US plans to impose sanctions on Azerbaijan for military aggression against Karabakh in 2023 Why it is recommended to download applications on trusted platforms: In 2023, Google rejected publication of more than 2 million dangerous applications on Google Play Global military spending in 2023 surges amid war, rising tensions and insecurity – SIPRI report Armenia Security Council 2023 activity report is presented to premier 817 people seek asylum in Armenia in 2023 Human Rights Defender's office published 2023 annual report and annual activity report of national preventive mechanism In 2023, the SME Loan Portfolio of Ameriabank Reported More Than 30% Growth 7,825 Karabakh residents who left Armenia since September 2023 have not returned, new data say In 2023, Armenia-EU political dialogue deepened significantly- Deputy Foreign Minister summarizes the year Mirzoyan: Unprecedented number of senior French officials visited Armenia in 2023