Հայաստանում բնակավայրերի 66 տոկոսն ապահովված է լայնաշերտ ինտերնետով. երկիրը ինտերնետ հասանելիության առումով լավ դիրքերում է

Հայաստանում բնակավայրերի 66 տոկոսն ապահովված է լայնաշերտ ինտերնետով, ՀՀ բնակչության 96 տոկոսը հնարավորություն ունի օգտվելու ինտերնետից, այս մասին նշեց ՀՀ ԲՏԱ նախարարի տեղակալ Ավետ Պողոսյանը հեռավոր համայնքներում ինտերնետ հասանելիություն ապահովելու հնարավորությունների ստեղծման համար լուծումներ գտնելու նպատակով կազմակերպված «Ապահովելով հասանելիություն բոլորին` Եվրոպա և տարածաշրջան» խորագրով գագաթնաժողովին: 

«Կառավարությունն իր ուշադրության կենտրոնում է պահում բնակավայրերը լայնաշերտ ինտերնետով ապահովելու ծրագիրը, և 2021-2026 թվականների ծրագրում առկա է կետ բնակավայրերի մինչև 80 տոկոսը մինչև 2026 թվականը լայնաշերտ ինտերնետով ապահովելու վերաբերյալ: Այս միջոցառման նպատակը այդ հարցի շուրջ մասնագետներին համախմբելն և լուծումներ գտնելն է»,- ասաց փոխնախարարը:  

Նրա համոզմամբ՝ մինչև 2026 թվականը Հայաստանի բնակավայրերի 80 տոկոսը ապահովված կլինի լայնաշերտ ինտերնետով:  

«Այս պահին բնակավայրերի 66 տոկոսն արդեն իսկ ապահովված է լայնաշերտ ինտերնետով, միևնույն ժամանակ ուզում եմ նշել, որ բնակչության 96 տոկոսը հնարավորություն ունի օգտվելու լայնաշերտ ինտերնետից: Մենք խոսում ենք շատ հեռավոր փոքր բնակչություն ունեցող բնակավայերերի մասին, որտեղ ներդրումներ անելը տնտեսական տեսանկյունից նպատակահարմար չեն: Այս դեպքում լուծումը տեսնում եմ սուբսիդավորման կամ օպերատորներին՝ այդ բնակավայրերում ինտերնետ հասանելիություն ապահովել շահագրգռելու մեջ: Մենք այս պահին ունենք գործիքակազմ. կառավարությունը պատրաստ է սուբսիդավորել այն համայնքներին, որոնք նման հայտ ներկայացնեն: Այս պահի դրությամբ համայնքներից որևէ մեկը հայտ չի ներկայացրել, ինչը նշանակում է, որ ինտերնետ հասանելիությունը բավականան լավ վիճակում է գտնվում»,- նշեց Պողոսյանը:  

Նրա համոզմամբ՝ այս պահին ինտերնետ հասանելիության առումով Հայաստանը առաջատար դիրքեր է զբաղեցնում: Նման կարծիք հայտնեց նաև Ազգային ժողովի նախագահի տեղակալ Հակոբ Արշակյանը՝ նշելով, որ Հայաստանը ինտերնետ հասանելիության տեսանկյունից բավականին լավ դիրքերում է:  

«Պետք է արձանագրել, որ ինտերնետի հասանելիությունը մարդկությանը տվել է նոր տեխնոլոգիաների միջով այլընտրանքային կրթություն ստանալու հնարավորություն: Ինտերնետ հասանելիությունը տարբեր համայնքներում, սահմանամերձ գյուղերում հնարավորություն կստեղծի օգտվել կրթական տարբեր ռեսուրսներից՝ վերապատրաստվել, զարգանալ, լեզուներ սովորել: Այն նաև լայն հնարավորություններ է ստեղծել տրանսպորտային և լոգիստիկ համակարգի համար»,- նշեց Արշակյանը:

Եզրափակելով՝ Արշակյանն  ընդգծեց, որ Հայաստանը՝ հաշվի առնելով բոլոր հանգամանքները, չափազանց կարևորում է ինտերնետի հասանելիությունը համայնքներին:

Հայաստանի օպերատորների միության տնօրեն Քրիստինե Գյոնջյանն ասաց՝ ինտերնետ կապն այսօր առաջնահերթությունների շարքում է և ստեղծում է հավասար հնարավորություններ համայնքների համաչափ զարգացման համար: 

«Չնայած տեխնոլոգիաների գերարագ զարգացմանը՝ այսօր ամբողջ աշխարհում բնակվող 8 միլիարդ մարդուց 2.7 միլիարդը  դեռ ինտերնետ հասանելիություն չունի՝ կախված աշխարհագրական դիրքից, ենթակառուցվածքների պակասից և բնակչության սակավությունից: Իսկ հասանելիություն ապահովելու համար պահանջվում է նոր, ոչ ավանդական մոտեցումներ: Այս խնդրին լուծում տալու համար կազմակերպությունները ողջ աշխարհից կազմում են դաշինքներ՝ ռեսուրսները համախմբելու, ներդրումները կառավարելու, թվային բացը լրացնելու և թվային վերափոխմանը նպաստելու համար: Հայաստանի օպերատորների միությունը ևս իր նպատակների իրագործման ընթացքում կոչված է նպաստելու ինտերնետի ու հեռահաղորդակցության ոլորտների զարգացմանը, օրենսդրական դաշտի բարելավմանը, թվային գրագիտության բարձրացմանն ուղղված խնդիրների լուծմանը»,- ասաց Գյոնջյանը: 

Նա նշեց՝ իրենց բազմակողմանի գործունեության հիմքում երկրի հավասարաչափ զարգացումն է, ՀՀ ողջ տարածքում որակյալ կապի հասանելիության ապահովմանը նպաստելը և համացանցի անվտանգ կիրառությունը:  

Այս թեմայով Խաչատուրյանին իր հավատարմագրերն է հանձնել Հայաստանում Զիմբաբվեի նորանշանակ դեսպան Բրայթ Կուպեմբան Բացառիկ կադրեր. ինչպես են մեր հայրենակիցներին դիմավորում Հայաստանում` նախքան հաշվառման կետ հասնելը (տեսանյութ) Նախագահ Վահագն Խաչատուրյանն այցելել է Հայաստանում Չինաստանի դեսպանատուն Ինչպես են Հայաստանում դիմավորում Արցախից ժամանողներին «Եռաբլուր» այցելեց Հայաստանում ԱՄՆ դեսպանը. Նա չցանկացավ պատասխանել լրագրողների հարցերին Հայաստանում իշխանափոխություն անելու համար անհրաժեշտ է փոխել ընդդիմությանը. Վահե Դավթյան Ռուսաստանի հայերի միությունը պահանջում է Հայաստանում դադարեցնել բռնաճնշումները Փաշինյանների ընտանիքն իր ողջ կազմով, բացի նիկոլից, լքել են երկիրը. Նարեկ Սամսոնյան Միրզոյանը ԿԽՄԿ նախագահի հետ քննարկել է ԼՂ-ում Կարմիր խաչի հասանելիության անհրաժեշտությունը Ռուսների գլխավոր զենքը Հայաստանում ու Հայաստանի դեմ դա Փաշինյանն է, մնացածը խաղալիքներ են