Հակոբ Սերոբյանն ամփոփել է մրցաշրջան 2023-ը․ 17 ոսկե, 8 արծաթե եւ 11 բրոնզե մեդալ

Հարություն Մերդինյանը կպայքարի օլիմպիական ուղեգրի համար: Աշխարհի գավաթ փուլերում եւս մեկ ուղեգիր նվաճելու մեծ հավանականություն ենք տեսնում:

Այս մասին լրագրողների հետ հանդիպմանն ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը, որն ամփոփել է մրցաշրջան 2023-ը եւ խոսել օլիմպիական տարվա անելիքների, նպատակների մասին:

«2023 թվականը հաջող տարի էր մեզ համար: Չէի ասի շատ հաջող, քանի որ սպասելիք ունեինք աշխարհի առաջնությունից, բայց չստացվեց: Աշխարհի առաջնությունում Արթուր Դավթյանից սպասում էինք մեդալ: Ինքներս էլ մեզ համար բարձրացրել ենք մեր նշաձողը, Արթուրն էլ չեմպիոնություն էր ուզում, բայց չստացվեց վնասվածքի պատճառով: Ճիշտ է, Արթուրն ասում է, որ վնասվածքն իրեն չխանգարեց, բայց ես մարզումներին տեսնում էի, որ ցատկերն անում էր մեկ անգամ, վնասվածքը խանգարեց:

Մեզ համար տարին սկսեց աշխարհի գավաթի խաղարկություններով, որոնք վարկանիշային էին աշխարհի առաջնության համար: Արթուր Դավթյանը երեքին մասնակցեց, երեքում դարձավ չեմպիոն:

Մեզ համար շատ հաջող ստացվեց երիտասարդների աշխարհի առաջնությունը: Սպասում էինք, որ Համլետ Մանուկյանը հաղթելու է, բայց մենք կրկնակի անակնկալ ունեցանք՝ կրկնակի աշխարհի չեմպիոն: Նախ Թուրքիայում էր եւ երկրորդ ոսկե մեդալը նվաճեց Համլետը: Նժույգ թափերում երկրորդ տեղում Մամիկոն Խաչատրյանն էր: Սա շատ բարձր արդյունք է: Երրորդ անակնկալն այն էր, որ թիմային պայքարում 4-րդ տեղը գրավեցինք: Անսպասելի էր: Երիտասարդների աշխարհի առաջնությունում մեզ համար նոր բացահայտումներ եղան, որ կարող ենք թիմային պայքարում բարձր արդյունք գրանցել: Դրանից հետո սկսել ենք աշխատել թիմի վրա:

Նույն մրցավայրում՝ Անթալիայում անցկացվեց նաեւ մեծահասակների Եվրոպայի առաջնությունը, որտեղ Արթուր Դավթյանը փայլեց: Այստեղ ունեցանք ոսկե, արծաթե եւ բրոնզե մեդալներ: Արթուր Դավթյանը ոսկե եւ բրոնզե մեդալակիր, Վահագն Դավթյանը՝ արծաթե: Տարբեր մրցաշարերում ունեցանք չեմպիոններ եւ մեդալակիրներ: Միակ բացթողումը աշխարհի առաջնությունն էր, որտեղ չկարողացանք մեդալ նվաճել: Այստեղ մեր գլխավոր խնդիրը լուծեցինք՝ օլիմպիական ուղեգիր նվաճեցինք: Ըստ ծրագրի բազմամարտում Արթուր Դավթյանը նվաճեց ուղեգիր:

2023 թվականին նվաճել ենք 36 մեդալ՝ 17 ոսկի, 8 արծաթ եւ 11 բրոնզ: Միջազգային մրցաշարերը չենք հաշվել:

Մեր ապագան եւ հույսը երիտասարդներն են, որոնք շատ լավ արդյունքներ գրանցեցին:

Այս տարին մեզ համար նշանավորվեց նաեւ 2027 թվականի Եվրոպայի առաջնությունը Երեւանում անցկացնելու համաձայնագրով: Սա լավագույն հնարավորությունն է մեզ համար, քանի որ 20 տարի մենք գործիքի խնդիր չենք ունենա, մեր հասարակությունը մոտիկից կծանոթանա մարզաձեւի հետ: Այս հարցում շնորհակալ եմ ֆեդերացիայի նախագահ Գագիկ Վանոյանին, կառավարությանը՝ մեծ աջակցություն ցուցաբերելու համար:

Երեւանում անցկացվելիք Եվրոպայի առաջնությանը կմասնակցենք թիմով: Արդեն կարող ենք եւ ամեն ինչ կանենք, որ մեր ազգի պատիվը բարձր պահենք:

2024 թվականի ծրագրերում եւս մեկ օլիմպիական ուղեգրի համար պայքարելն է: Տարին կսկսենք աշխարհի գավաթի խաղարկություններով, որը լինելու է վարկանիշային Փարիզ-2024-ի համար: Ամեն գործիքի վրա խաղարկվելու է երկու ուղեգիր գավաթի փուլերի ընդհանուր արդյունքներով՝ միավորներով: Այստեղ մեծ հնարավորություն ունեն Վահագն Դավթյանը եւ Արթուր Ավետիսյանը օղակների վարժությունում: Նրանց շանսերը մեծ են, քանի որ շատերն արդեն ունեն ուղեգիր եւ դուրս են պայքարից: Նժույգ թափերում եւս երկու ուժեղ մասնակից ունենք՝ Հարություն Մերդինյանը եւ Գագիկ Խաչատրյանը կպայքարեն ուղեգրի համար:  Բարդությունն այն է, որ աշխարհի գավաթի 4 խաղարկություն է, մենք մասնակցելու ենք երեքին: Մեկը Բաքվում է: Չեմ կարող ասել կգնանք, թե ոչ: Եթե երկրի ղեկավարությունը գտնի՝ կարող ենք գնալ, կգնանք:  Եվրոպայի առաջնությունում խաղարկվելու է մեկ ուղեգիր բազմամարտում: Այստեղ մեր հնարավորություններն այդքան էլ մեծ չեն:

Այս ամենից հետո՝ առաջ, դեպի Փարիզ: Պատրաստվելու ենք, ինչպես կարող ենք, ինչ հնրավորություն ունենք: Արթուրից բացի, եթե եւս մեկն էլ ունենանք, ամբողջությամբ առանձին ծրագրով շարժվելու ենք առաջ: Արդեն ունենք մեր հավաքների, մարզումների ծրագիրը, մինչեւ Օլիմպիական խաղեր պետք է լինենք Փարիզում:

Արթուրի առաջին խնդիրը վնասվածքները բուժելն է: Իսրայելի թիմի բժիշկը շատ լավ մասնագետ է: Նրան, բոլորին կդիմենք, որ լիարժեք ապաքինվի: Նրան ասել եմ, որ աշխարհի գավաթի փուլերին, մյուս մրցաշարերին կարող է չմասնակցել, բայց Եվրոպայի առաջնությանը կմասնակցի»,- ասաց Հակոբ Սերոբյանը:

Սեպտեմբերի 30-ին Բելգիայի Անտվերպեն քաղաքում անցկացված աշխարհի առաջնությունում Տոկիոյի Օլիմպիական խաղերի բրոնզե մեդալակիր աշխարհի չեմպիոն, Եվրոպայի կրկնակի չեմպիոն Արթուր Դավթյանը բազմամարտում նվաճեց Փարիզ-2024-ի անվանական ուղեգիր:

Related Articles US plans to impose sanctions on Azerbaijan for military aggression against Karabakh in 2023 Why it is recommended to download applications on trusted platforms: In 2023, Google rejected publication of more than 2 million dangerous applications on Google Play Global military spending in 2023 surges amid war, rising tensions and insecurity – SIPRI report Armenia Security Council 2023 activity report is presented to premier 817 people seek asylum in Armenia in 2023 Human Rights Defender's office published 2023 annual report and annual activity report of national preventive mechanism In 2023, the SME Loan Portfolio of Ameriabank Reported More Than 30% Growth 7,825 Karabakh residents who left Armenia since September 2023 have not returned, new data say In 2023, Armenia-EU political dialogue deepened significantly- Deputy Foreign Minister summarizes the year Mirzoyan: Unprecedented number of senior French officials visited Armenia in 2023