Չբացել

Վերջին տարիները ամենածանր ու ճակատագրական տարիներն էին մեր նորանկախ պետականության համար: Ժողովուրդը համազգային պայքար մղեց հանուն Արցախի, որի արդյունքում Նիկոլ Փաշինյանը ստորագրեց խայտառակ կապիտուլյացիոն ակտը: Այսօր արդեն Հայաստանում իշխանությունները իրագործում են մի օրակարգ, որը չի երաշխավորելու խաղաղություն, փոխարենը բերելու է նորանոր միակողմանի զիջումների: Իսկ միակողմանի զիջումները բերում են պետականության խարխլում և թուլացում, ինչը Ադրբեջանի նման թշնամու առկայության դեպքում հանգեցնում է պարտադիր պատերազմի: Նիկոլ Փաշինյանը, ով նախկինում հայտարարում էր սահմանների որոշման հարցում փոխադարձության սկզբունքի մասին , այսօր միակողմանի զիջումների գնալով շտապում է հանձնել հայկական հողերը:

Այս համատեքստում պետք է արձանագրենք հետևյալը

1) 2015 թվականի դեկտեմբերի 22-ից ուժի մեջ մտած Սահմանադրության 205-րդ հոդվածի հանաձայն՝ Հայաստանի Հանրապետության տարածքի որևէ փոփոխությանը վերաբերող հարցերը լուծվում են բացառապես  հանրաքվեի միջոցով. նշված տարածքները գտնվում են ՀՀ ինքնիշխան իրավազորության ներքո, հետևաբար Նիկոլ Փաշինյանը իրավասու չէ միանձնյա որոշել դրանց ճակատագիրը

2) Փաշինյանի ստեղծած սահմանազատման հանձնաժողովը չունի որևէ իրավական կարգավիճակ և չի կարող ՀՀ ինքնիշխան տարածքները հանձնելու որոշում կայացնել

3) Բոլորս պետք է ֆիքսենք, որ այս պայքարը ոչ թե քաղաքական պայքար է, այլ համազգային և վերաբերվում է յուրաքանչյուր հայի: Սա հայի արժանապատիվ  տեսակի պայքարն է արժեհամակարգից զրկված մարդկանց նկատմամբ:

4) Մենք պետք է հստակ արձանագրենք նաև աշխարհաքաղաքական խաղացողների վերաբերմունքը՝ հավաքական արևմուտքը ողջունում է և դրդում հողերը հանձնելուն, իսկ ՌԴ-ն դեռևս որևէ հայտարարություն այս մասով չի արել:

5) Սահմանազատման և սահմանագծման գործընթացը անչափ կարևոր է խաղաղության հասնելու համար, բայց այն պետք է իրականացվի ելնելով ՀՀ անվտանգության ապահովման տրամաբանությունից և ներառի երաշխավորի ինստիտուտ՝ հստակ սահմանված գործառույթներով:

Ստեղծված իրավիճակում այլ բան չի մնում, քան պայքարել ՀՀ ինքնիշխան Հանրապետության ամեն մի սանտիմետրի և հայի՝ իր հողում ապրելու իրավունքի համար: Որպեսզի դա իրականություն դառնա, մենք կոչ ենք անում

1) Ուսանողությանն և երիտասարդներին՝ որպես մեր հանրության ամենաակտիվ հատված և կորիզ, ինքնակազմակերպվել և միանալ պայքարին, որը մղվում է առաջին հերթին հենց իրենց վաղվա օրվա և ապագայի՝ սեփական երկրում արժանապատիվ ապրելու և արարելու հնարավորության համար

2) Մտավորականներին՝ որպես հանրության շրջանում առավել բարձր հեղինակություն ունեցող անհատների հանդես գան հասցեական գնահատականներով և կանգնել պայքարող ժողովրդի կողքին

3) Մշակույթի գործիչներին, սպորտի աշխարհի ներկայացուցիչներին և հանրային կարծիք ձևավորող անհատներին՝  չլռել և սատարել մեր ժողովրդի արդար պահանջներին

4) ԶՈՒ-ն ՝ որպես մեր պետության անվտանգության երաշխավոր՝ զերծ մնալ ապօրինի հրամաններ կատարելուց և հիշել, որ ծառայում են ՀՀ-ին, և ոչ թե անձերին

5) ՀՀ ներքին գործերի նախարար Վահե Ղազարյանին՝ զերծ մնալ խաղաղ ցուցարարների դեմ բիրտ ուժ կիրառելու հրամաններ տալուց և հավատարիմ մնալ սպայի բարձր կոչմանը

6) Սփյուռքի մեր հայրենակիցներին՝ կամ վերադառնալ Հայաստան և կողք կողքի պայքարել մեր պետության փրկության համար, կամ ինքնակազմակերպվել տեղերում և իրենց բողոքի ձայնը բարձրացնել:

7) Հայաստանի բոլոր մարզերի և քաղաքների բնակիչներին՝ միանալ Տավուշում պայքարող  հայրենակիցներին, քանի որ Տավուշից հետո գալու է Գեղարքունիքի, Սյունիքի, Վայոց Ձորի և մյուս մարզերի հերթը: Թշնամին չի հագենալու, նրա ախորժակը պետք է զսպենք մենք՝ մեր միասնական պայքարով