Դինոզավրերը «գրավել են» Լենինի թանգարանը
Գիտություն և ՄշակույթՄոնղոլիայի մայրաքաղաք Ուլան Բատորը վերջնականապես հրաժեշտ է տալիս կոմունիստական ժառանգությանը, գրում է Gazeta.ru-ն: Մոնղոլական կառավարության որոշմամբ՝ շենքը, ուր նախկինում Լենինի թանգարանն էր տեղակայված, այժմ վերածվելու է դինոզավրերի թանգարանի:
Իրականում Վլադիմիր Իլյիչ Լենինին դինոզավրերի հետ փոխանակելը քաղաքական նպատակներ կամ խորհրդրանիշը ծաղրի ենթարկելու մտադրություններ չունի: Ուլան Բատորի 40 թանգարաններից սա միակ իրական թանգարանային կառույցն է, որն ի վիճակի է տեղավորել խոշոր չափի թանգարանային նմուշներ: Լենինի թանգարանը Ուլան Բատորում բացվել էր 1980թ., և ողջ Մոնղոլիայում դարձել էր թանգարանին վայել միակ կառույցը, իսկ նրա ճարտարապետը պետական մրցանակ էր ստացել իր աշխատանքի համար: Սակայն 1990-ական թթ. սկզբից այն փակվել էր և իր նպատակին չէր ծառայում:
Այժմ այս շինությունը ծառայելու է որպես Գոբի անապատում հայտնաբերված դինոզավրերի ոսկորների թանգարան: Անապատի 1/3-ը պատկանում է Մոնղոլիային, իսկ մյուս մասը՝ Չինաստանին: Եվ եթե չինական հատվածում գտնված նախնադարյան կենդանիների ոսկորները վաղուց արդեն աշխարհին հայտնի են դարձել, ապա մոնղոլական անապատների ոսկորները դեռևս գիտնականների կողմից լավ չեն ուսումնասիրվել:
«Աշխարհի մեկ այլ կետում ուղղակի մեծ բարեբախտություն է գտնել գոնե մեկ հատ առանձին, խիստ վնասված և կրծոտված դինոզավրի ոսկոր, իսկ այստեղ մեզ ամբողջական կմախքներ են հանդիպում, ինչը շատ հազվագյուտ բան է»,-ասում է մոնղոլական Դինոզավրերի ուսումնասիրության ինստիտուտի հիմնադիր Բոլորտսետսեղ Մինջինը:
Հնէաբանները կարծում են, որ 70 մլն տարի առաջ Գոբի անապատում բարեբեր հարթավայր է եղել, ուր ապրել են շատ դինոզավրեր: Սակայն անապատային ուժգին քամիների պատճառով հարթավայրը անհետացել է երկրի երեսից՝ նպաստելով տարածաշրջանում դինոզավրերի ոչնչացմանը: