Ինչպիսի՞ն կլինի Dorians-ի՝ եվրատեսիլյան «Lonely Planet» երգի տեսահոլովակը
ՀասարակությունBRAVO.am-ն ուրախ է տեղեկացնել, որ առաջիկա օրերին պատրաստ կլինի «Lonely Planet» երգի վերջնական տարբերակը, որով «Dorians» խումբը ներկայացնելու է Հայաստանը «Եվրատեսիլ 2013»-ում:
Հիշեցնենք, որ երգը գրել է Black Sabbath-ի կիթառահար, լեգենդար ռոք-երաժիշտ Թոնի Այոմին: Երեկվանից Թոնի Այոմիի ձայնային ինժեներ Մայք Եքզեթերը Լոնդոնում աշխատում է երգի վերջնական տարբերակի վրա:
Երեկ ուշ երեկոյան Երեւանում տեղի են ունեցել երգի տեսահոլովակի նկարահանումները: Ռոք-խմբի մենակատար Գոռ Սուջյանը մեզ հետ զրույցում ասել էր, որ հնարավոր է' նկարահանումները տեւեն մինչեւ լույս. «Շատ կարճ ժամանակահատված ունենք «Եվրատեսիլ»-ին պատրաստվելու համար, այդ իսկ պատճառով անգամ այս ուշ ժամին աշխատանքային պրոցեսի մեջ ենք: Պետք է այսօր անպայման ավարտենք նկարահանումները, որպեսզի առաջիկա օրերն էլ տրամադրենք մոնտաժային աշխատանքներին»:
«Եվրատեսիլյան» մեր երգի տեսահոլովակի ռեժիսորը Վարդան Զադոյանն է, որը նաեւ գրել է «Lonely Planet»-ի խոսքերը, բեմադրող օպերատորը՝ Սուրեն Թադեւոսյանը: Նկարահանումներն իրականացել են տաղավարային պայմաններում, իսկ սցենարը դեռ գաղտնի է պահվում: