«Վիտամին»–ից Չարենց. «Առաջին անգամ սիրահարվել եմ 5 տարեկան հասակում»
ՀասարակությունՉարենցը՝ նույն ինքը՝ Կարեն Սահակյանը, ArmStar.am-ի հետ անկեղծ զրուցել է տղա-աղջիկ հարաբերությունների, կանանց և այլ հետաքրքիր հարցերի շուրջ:
Կարեն, Ձեր ելույթներում բազմիցս նշում եք, որ չեք հասկանում այն աղջիկներին, ովքեր …. ապա թվարկում եք մի ամբողջ շարք. այդ դեպքում ո՞ր աղջիկներին եք հասկանում:
-Այնպես չէ, որ ես կանանց չեմ հասկանում: Դրանք պարզապես բեմական կատակներ են, բոլորին հայտնի խոսքեր՝ վերցված այն իրավիճակներից, որոնցում երբեմն հայտնվում են մարդիկ: Իրականում ես բոլոր կանանց էլ հասկանում եմ:
Ձեր հումորային համարից հետո, որտեղ խոսվում էր աղջիկ-տղա ընկերության մասին, շատերը եզրակացրեցին, որ դրանք հասցեագրված են ինչ-որ մեկին: Դուք ի՞նչ կասեք:
-Թող այդպես մտածեն (կատակում է), բայց դա այդպես չէ: Ես բեմը չեմ օգտագործում, որպեսզի ինչ-որ աղջկա կամ կնոջ որևէ բան փոխանցեմ
Այնուամենայիվ, Դուք ևս կարծու՞մ եք, որ աղջիկ-տղա սովորական ընկերություն գոյություն չունի:
-Այո, գուցե ես այդ կարծիքին եմ իմ փորձից ելնելով, չնայած կան մարդիկ՝ աղջիկ և տղա, ովքեր շփվում են իրար հետ և ոչ մի զգացմունք չունեն: Համենայնդեպս, ինձ հետ այդպես չի եղել…
Կարեն, երիտասարդ եք, ունեք երկրպագուներ, որոնց թվում հավանաբար կան այնպիսիք, ովքեր Ձեզ սիրո խոստովանություններ են գրում, ինչպե՞ս եք արձագանքում:
-Հիմնականում փորձում եմ չարձագանքել, որովհետև կարծում եմ՝ դա պարզապես խաբկանք է, քանի որ հեռուստացույցն ու իրական կյանքը տարբեր բաներ են: Ես գիտեմ, որ դա անցողիկ է, կանցնի երկու ամսից, մեկ տարուց, բայց անպայման կանցնի, ինչպես ցույց է տալիս փորձը, որովհետև նոր մարդիկ են եթեր դուրս գալիս և նրանք սկսում են տարվել ուիշով: Ես դա նորմալ եմ համարում:
Ըստ Ձեզ, ո՞րն է Ձեր զենքը կանանաց դուր գալու հարցում:
-Ի՞մ զենքը: Չգիտեմ, տարբեր մարդիկ տարբեր բաներ են ասում՝ այդ թվում արտաքինի և ձայնի առումով: Բայց ես չեմ օգտագործում իմ զենքերը: Ես ներկայանում եմ այնպիսին, ինչպիսին կամ:
Կարեն, Ձեր սիրտն ազատ է, ինչպիսի՞ն պետք է լինի այն աղջիկը, ով կդառնա Ձեր սրտի տիրուհին:
-Չափանիշներով չեմ առաջնորդվում, որովհետև հաճախ ոչ մի բան չի համապատասխանում քո չափանիշներին: Կարևորը, որ իմ կեսը լինի…
Կանանց արտաքինի մեջ ի՞նչն է Ձեզ ամենից շատ դուր գալիս:
-Նախևառաջ մազերը. ինձ դուր են գալիս սև վարսերը, նաև աչքերը. սիրում եմ կապույտ և սև աչքեր:
Իսկ կանանց բնավորության ո՞ր հատկանիշներն եք ամենից շատ գնահատում:
-Հավատարմությունը, ընկերական լինելու հատկությունը, որ ամբողջովին կարող ես իրեն վստահել, նրբությունը, կանացիությունը, այն ամենը, ինչ կնոջը տարբերում է տղամարդուց:
Ի՞նչն է Ձեզ վանում կնոջ մեջ:
-Երևի թե ամենաշատը տգիտությունը: Կարևոր չէ, որ նա շատ սիրուն է, պետք է նաև մի քիչ գրագետ լինել: Եթե մարդու հետ ոչ մի թեմայի մասին չես կարող զրուցել, դա արդեն վանող է:
Ե՞րբ եք առաջին անգամ սիրահարվել:
-5 թե 6 տարեկան էի: Սիրահարվել էի մեր մանկապարտեզի աղջիկներից մեկին… մի օր էլ փախանք մանկապարտեզից ու գնացինք մեր տուն: Դուռը ծեծեցինք, մաման բացեց, ասեցի. «Մամ ջան, ինքն իմ ընկերուհին ա»: Մամաս զարմացած ներս հրավիրեց: Հիշում եմ՝ նստեցինք, միրգ ու խմորեղեն կերանք, հետո նա մեզ երկուսիս ետ տարավ մանկապարտեզ ու մի լավ զայրացավ… Արդեն 20 տարի է, ինչ այդ աղջկա հետ որևէ կապ չունեմ:
Կնշե՞ք, թե կանանց կողմից Ձեզ համար արված ամենախենթ քայլը որն է եղել:
-Չեմ ուզում որևէ դեպք առանձնացնել ու նշել, որովհետև կարդացողը հաստատ կիմանա, որ իր մասին է խոսքը, իսկ ես դա չեմ ուզում:
Երբևէ որևէ մեկը կոտրե՞լ է Ձեր սիրտը:
-Իհարկե, առանց դրա չի լինի…
Ի՞նչ անել, եթե կինը չի պատասխանում Ձեր զգացմունքներին:
-Ինձ մոտ նման դեպք չի եղել, բայց կարծում եմ, որ պետք է հանգիստ թողնել այդ աղջկան: Ասում են՝ այն ինչ քոնն է, քեզ մոտ էլ կվերադառնա: Հանգիստ թողնելն էլ պայքարելու ձև է:
Ըստ Ձեզ՝ ո՞ր կնոջ հետ չի կարելի ամուսնանալ:
Ցանկացած կնոջ հետ էլ կարելի է ամուսնանալ: Տգեղ կին չի լինում, պարզապես պետք է, որ նա գտնի իր կեսը: Օրինակ, նախանձ կինը շատ հանգիստ կարող է ամուսնանալ նախանձ տղամարդու հետ:
Իսկ անձամբ Դուք ո՞ր կնոջ հետ չէիք ամուսնանա:
-Նախանձ կնոջ (ծիծաղում է):
Ե՞րբ Ձեզ կտեսնենք ամուսնացած կարգավիճակում:
-Ինձ շատ են ասում, որ ես ուշացել եմ, բայց ես այդպես չեմ կարծում: Մարդ որ տարիքում էլ ամուսնանա, դա իր համար ամենահաջողն է: Դեռ ընտրյալ չունեմ, չգիտեմ:
Քանի ՞երեխա կցանկանաք ունենալ:
-Երեք՝մեկ տղա, երկու աղջիկ: Աղջիկ երեխա շատ-շատ եմ սիրում:
Կարեն, ի՞նչ կմաղթեք հայ կանանց:
-Ես լինում եմ տարբեր երկրներում ու միշտ վերադառնալիս ասում եմ, որ մեր աղջիկներն ամենասիրունն են աշխարհում: Ուզում եմ, որ գնալով այդ երևույթը շատանա, ուզում եմ, որ նրանք միշտ գեղեցիկ և խնամված լինեն, նաև խելացի, նվիրված, կանացի և երջանիկ, թող իրենց հոգսերն էլ մի քիչ թեթևանան: