Մեր վերջնանպատակն է ստեղծել մեկ միասնական «E-Justice» հարթակ․ Մինասյանը՝ բոլոր դատավարությունների թվայնացման մասին

Արդարադատության նախարարությունը առաջիկա տարում աշխատելու է բոլոր դատավարությունների թվայնացման ուղղությամբ։

«Արմենպրես»-ին տված հարցազրույցում այս մասին ասաց Արդարադատության նախարար Գրիգոր Մինասյանը՝ պատասխանելով հարցին, թե նախարարությունն ի՞նչ քայլեր է ձեռնարկել կառավարման գործընթացում էլեկտրոնային տեխնոլոգիաների ներդրման ուղղությամբ:

«Արդարադատության նախարարությունը համակարգում է արդարադատության ոլորտի բոլոր համակարգերի թվայնացման գործընթացները: Անցնող տարվա ընթացքում մեկնարկել և այժմ բուռն ընթացքի մեջ են գտնվում քաղաքացիական դատավարության թվայնացման աշխատանքները: Վայոց Ձորում արդեն իսկ պիլոտային կարգով գործարկվել է քրեական գործերի մինչ դատական վարույթի էլեկտրոնային համակարգը»,- նշեց Մինասյանը։

Նախարարի խոսքով՝ քաղաքացիների կյանքն առավել հարմարավետ դարձնելու համար Հարկադիր կատարումն ապահովող ծառայության պաշտոնական կայքում ներդրվել է «Անձնական գրասենյակ» էլեկտրոնային հարթակը, որում գրանցվելով քաղաքացիները և իրավաբանական անձինք կարող են ծանոթանալ իրենց նկատմամբ հարուցված կատարողական վարույթներին, դրանց ընթացքին, կիրառված արգելանքներին, կատարել վճարումներ, հետևել դրամական միջոցների և այլ գույքի ապաարգելադրման և կատարողական վարույթի կարճման գործընթացին։

«Այս ուղղությամբ նաև աշխատում ենք քաղաքացիների կողմից իրենց պարտավորությունների մարման դեպքում նրանց հաշիվների ապաարգելադրման ժամկետը նվազագույնի հասցնելու ուղղությամբ: ՀՀ բանկերի մեծամասնության հետ պիլոտային ծրագրի ներդրման արդյունքում այդ ժամկետը հասել է մինչև 1 օրվա՝ նախկին 7 և ավել օրերի փոխարեն»,- հավելեց Մինասյանը։

Մեկ այլ նորամուծություն է Պրոբացիայի ծառայության աշխատանքն ամբողջությամբ թվայնացնող «e-probation» հարթակը, ինչը թույլ կտա ինքնաշխատ եղականով գեներացնել պրոբացիայի շահառուին վերաբերող անհրաժեշտ տվյալները: Ներդրվել է «Քրեակատարողական բժշկության կենտրոն» ՊՈԱԿ-ի «e-health» էլեկտրոնային առողջապահության համակարգը: Նախարարի խոսքով՝ ծրագրի շրջանակներում դատապարտյալ պացիենտների բժշկական օգնության և սպասարկման հետ կապված գործողությունների ամրագրումները կկատարվեն տվյալ հարթակի միջոցով:

Նախարարությունը առաջիկա տարում աշխատելու է բոլոր դատավարությունների թվայնացման ուղղությամբ, միաժամանակ շարունակելու և ավարտին է հասցնելու ընթացիկ ծրագրերը:

«Մեր վերջնանպատակն է ստեղծել մեկ միասնական «E-Justice» հարթակ, որտեղ մուտք գործելով քաղաքացին կարող է ստանալ արդարադատության համակարգի բոլոր ծառայությունները, հեշտ և արագ իրացնել իր իրավունքները»,- եզրափակեց Մինասյանը։

Կարեն Խաչատրյան

Related Articles By destroying Kanach Zham Church in Shushi, Azerbaijan violated decision of UN Court of Justice: Caucasus Heritage Watch Prime Minister of Armenia receives the Minister of Justice of Georgia Oral hearings in 'Armenia vs. Azerbaijan' case to continue at UN Court of Justice on April 15 Ruben Rubinyan receives delegation led by Minister of Justice of Georgia Justice minister on returning Azerbaijani who crossed Armenia border: Political decision enabling correct positioning Judge Nawaf Salam elected President of International Court of Justice Justice minister: Extensive work being done to protect rights of Armenians held in Azerbaijan captivity