Ինչպե՞ս դիմել ՍԴ ընտրակաշառքի փաստերի հետ կապված. Ստեփան Սաֆարյան

2012-05-09 11:57:13

«Այս պահին դժվարանում եմ ասել իրավական հարթության վրա բողոքարկելու նպատակահարմարությունը կամ անհրաժեշտությունը, որովհետև դուք ինքներդ գիտեք, որ գոնե իմ կարծիքով ընտրություններում առաջին գործոնը եղել է փողը, որը շատ դժվար բռնվող արարք է, որովհետև և՛ կաշառք տվողը, և՛ կաշառք վերցնողը շահագրգռված են եղել այդ գործարքում, և բնականաբար՝ ո՛չ «Ժառանգությանը», ո՛չ իրավապահ մարմիններին տեղյակ չեն պահի»։ Այս մասին Լուրեր.com-ի հետ զրույցում, պատասխանելով հարցին, թե «կբողոքարկի՞ «Ժառանգություն»-ը ԱԺ ընտրությունների արդյունքները», ասաց «Ժառանգություն» կուսակցության ներկայացուցիչ Ստեփան Սաֆարյանը:

«Երկրորդը՝ վարչական ռեսուրսներներն են, որոնք ևս գործադրվեցին: Մնացած խախտումները չգիտեմ՝ որքանով էական ազդեցություն կարող են թողնել ընտրությունների արդյունքի վրա: Որովհետև ըստ էության, թիվ մեկ գործոնները իմ կողմից թվարկածներն են եղել, իսկ դա որքան էլ ցավալի, որքան էլ ազատ ընտրությունների այսպես ասեմ բացահայտ թշնամին է՝ այնուամենայնիվ չգիտեմ Սահմանադրական Դատարան ինչպե՞ս դիմել ընտրակաշառքի փաստերի հետ կապված, երբ վերցնողը և տվողը միասին են գործում», - ասաց Սաֆարյանը և հավելեց, որ «Ժառանգություն»-ը երկու օր է՝ համեմատում է ԿԸՀ արդյունքներն իր արձանագրությունների հետ: Նա նշեց նաև, որ երեկ «Ժառանգություն»-ը միջանկյալ գնահատական է տվել ընտրություններին, իսկ մոտ օրերս կուսակցության առաջնորդ Րաֆֆի Հովհաննիսյանն իր ասուլիսում գնահատականներ կտա թիմի և կուսակցության կողմից:

Անդրադառնալով նաև ՀՀԿ-ՕԵԿ-«Ժառանգություն» հնարավոր կոալիցիայի մասին խոսակցություններին՝ Ստեփան Սաֆարյանն ասաց. «Ես «ժառանգություն» կուսակցության ներսում նման խոսակցությունների ծանոթ չեմ: Ես չեմ կարծում, որ ես կուսակցությունում շատ ցածր կարգավիճակում եմ, որպեսզի նման բանի մասին տեղյակ չլինեմ: Ինձ որևէ քննարկում մինչ այս պահը հայտնի չէ: Յուրաքանչյուրը ազատ է իր դաշինքի մեջ»,- ասաց Սաֆարյանը և պատասխանելով հարցին, թե որ քաղաքական ուժի հետ է «Ժառանգությունը» կոալիցիան պատկերացնում, ասաց. «Եթե չկա քննարկում, ուրեմն չի պատկերացնում»:

Դիտվել է 699 անգամ:

Լրահոս
18 Դեկ
Ողջ լրահոսը...>>
Ամենաշատ ընթերցվածը