Ընդհանուր առմամբ բավականին ճշգրիտ գնահատական է տրված ընտրություններին, այն պրոբլեմներին, որ առկա էին ընտրությունների ընթացքում։ Այս կարծիքը ԵԽԽՎ երեկ ներկայացված զեկույցի վերաբերյալ Լուրեր.com–ի հետ զրույցում հայտնեց ՀԱԿ արտաքին հարաբերութունների հանձնաժողովի ներկայացուցիչ Վլադիմիր Կարապետյանը։

Անդրադառնալով զեկույցի բովանդակությանը՝ նա նշեց, որ դրա համաձայն՝ երկու կարևոր իմպերատիվները, որոնք անհրաժեշտ էին, որպեսզի լիներ նորմալ ընտրություն,  այն է` ընտրացուցակների հարցն ու ընտրողների վրա ճնշումների առկայությունը, չեն համապատասխանել այն խոստումներին, որ Հայաստանը տվել էր։

«Բավականին խիստ գնահատական է տրված, և կարծում եմ, որ այն լինելու է նաև դոմինտանտ առաջիկայում միջազգային հանրության կողմից մեր ընտրությունները գնահատելիս», – համոզմունք հայտնեց Կարապետյանը։

ՀԱԿ ներկայացուցիչը հավելեց նաև, որ ընտրողների վրա ճնշումները, ընտրակաշառքը, ինչպես նաև ցուցակների անճշտությունները և ուռճացված լինելը և նման ձևով ցուցակները ներկայացնելու միտումը, որպեսզի կրկնակի քվեարկությունը հնարավոր լինի, եղել է ամենուրեք։

«Այդ խնդիրները առկա են եղել ընտրությունների ժամանակ, և իշխանությունները հատուկ որևէ բան չեն արել այդ խնդիրները լուծելու համար», – կարծում է նա։

Լրագրողի հարցին, թե ինչպես կգնահատի ԵԽԽՎ–ում ՀՀ պատվիակության ղեկավար Դավիթ Հարությունյանի այն տեսակետը, որ ԵԽԽՎ–ն հայտնվել է սուր ճգնաժամի մեջ և արժեքների կազմակերպությունից վերածվել է շահերի կազմակերպության, ՀԱԿ ներկայացուցիչը նշեց, որ «Հարությունյանի միակ առաքելությունը վերջին շրջանում դարձել է սուտ ասելու միջոցով պաշտպանել այս իշխանությանը»։

«Ոչ ոք չի մոռացել իր հատուկ դերակատարումը քաղբանտարկյալների ազատազրկումը ձգձգելու և Եվրոպայի խորհրդում այդ խնդիրը հետապնդելու հարցում։ Ինքը կորցրել է ժողովրդի վստահությունը՝ ներկայացնելու Հայաստանի մոտեցումը։ Իր խոսքերը որևէ արժեք չունեն», – եզրափակեց Կարապետյանը։

Հիշեցնենք, որ երեկ Ալբանիայի մայրաքաղաք Տիրանայում տեղի է ունեցել Եվրոպայի Խորհրդի Խորհրդարանական Վեհաժողովի Մշտական հանձնաժողովի հերթական նիստը, որտեղ ներկայացվել է մայիսի 6-ին կայացած ՀՀ ԱԺ ընտրությունների ԵԽԽՎ դիտորդական առաքելության զեկույցը, որտեղ բավականին կոշտ գնահատականներ են տրված  կայացված ընտրություններին։ Մասնավորապես՝ զեկույցում տեղ են գտել ընտրացուցակների անճշտությունների և ցուցակների ուռճացվածության վերաբերյալ դիտարկումներ։