Ինչ գործունեությամբ է աչքի ընկել Մեքսիկայում ՀՀ դեսպան Արմելլա Շաքարյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Մեքսիկայում ՀՀ արտակարգ և լիազոր դեսպան Արմելլա Շաքարյանի գործունեությանը:  Վերջինիս կենսագրությունը բավական ուշագրավ է՝

2004-2006թթ. ՀՀ ԱԳՆ միջազգային կազմակերպությունների վարչության ՄԱԿ-ի բաժնի 2-րդ քարտուղար,

2006-2010թթ. ԱՄՆ-ում ՀՀ դեսպանություն, հյուպատոս,

2013-2015թթ. ՀՀ ԱԳՆ միջազգային կազմակերպությունների վարչության ՄԱԿ-ի բաժնի 1-ին քարտուղար,

2015-2018թթ. Լոս Անջելեսում ՀՀ գլխավոր հյուպատոսության 1-ին քարտուղար,

2018-2021թթ. ՀՀ ԱԳՆ Ամերիկյան երկրների վարչության ԱՄՆ-ի և Կանադայի բաժնի վարիչ,

2021թ. հունվարի 27-ից Մեքսիկայի Միացյալ Նահանգներում Հայաստանի Հանրապետության արտակարգ և լիազոր դեսպան (նստավայրը՝ Մեխիկո),

2021թ. օգոստոսի 24-ից Կոստա Ռիկայի Հանրապետությունում, Պանամայի Հանրապետությունում, Նիկարագուայի Հանրապետությունում, Գվատեմալայի Հանրապետությունում, Էլ Սալվադորի Հանրապետությունում և Բելիզում Հայաստանի Հանրապետության արտակարգ և լիազոր դեսպան (նստավայրը՝ Մեխիկո)։

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է: Այս առումով պետք է նշել, որ չնայած Մեքսիկայում առկա է բավական կուռ հայկական համայնք, սակայն դեսպանատան հետ համագործակցության, համատեղ իրականացրած պրոյեկտների վերաբերյալ որևէ տեղեկություն առկա չէ: Հիմնականում այդ համագործակցությունը ընթանում է հայկական ցուցանմուշները մեքսիկական ցուցահանդեսներում ներկայացնելուն, դեսպանատունն իր կողմից աջակցում է նման նախագծերին:

Դեսպանատան հայանպաստ նախաձեռնություններից պետք է առանձնացնել՝ Մեքսիկայի Ազգային ինքնավար համալսարանում /UNAM/ տեղի ունեցած՝ Հայոց ցեղասպանության 107-րդ տարելիցին նվիրված պանելային քննարկումը։ Դեսպան Ա.Շաքարյանի հետ մեկտեղ քննարկմանը մասնակցում էին «Իստոր» ինստիտուտի տնօրեն Ժան Մեյերը, Կոլումբիայի համալսարանի էթնիկ ուսումնասիրությունների կենտրոնի տնօրեն Կլաուդիո Լոմնիցը և UNAM-ի «Tlatelolco» մշակութային կենտրոնի տնօրեն Խակոբո Դայանը:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Կարևոր հանդիպումներից առանձնացնենք հետևյալները; Շաբաթներ առաջ դեսպանություն էր այցելել Մեքսիկայի Կոնգրեսի Պատգամավորների պալատի Հայաստանի հետ բարեկամության խմբի նախագահ, կոնգրեսական Բերենիսե Խուարեսը։ Դեսպան Շաքարյանի հետ քննարկել են ադրբեջանական վերջին ագրեսիայից հետո տարածաշրջանում ստեղծված իրավիակը, ինչպես նաև հայ-մեքսիկական երկկողմ հարաբերությունները։ Բացի այդ, դեսպան Շաքարյանը այցելել է Մեքսիկայի Սենատ և հանդիպում ունեցել Սենատի նախագահ Օլգա Սանչես Կորդերոյի հետ: Շաքարյանը նաև այցելել է Մեքսիկայի Սենատ և հանդիպում ունեցել Եվրոպայի գծով արտաքին հարաբերությունների հանձնաժողովի անդամների հետ: Ապակենտրոնացված համագործակցությունը խթանելու շրջանակներում դեսպան  Շաքարյանը այցելել է նաև Գուանախուատո նահանգ։

Ինչ վերաբերվում է հանրային դիվանագիտությանը, ապա այստեղ բացերն ավելի քան ակնհայտ են: Դեսպանատան պաշտոնական ֆեյսբուքյան էջում որպես կանոն ԱԳՆ տարածած ռելիզներն են, փաստացի այս ընթացքում դեսպան Շաքարյանը հանդես չի եկել և ոչ մի հարցազրույցով, անդրադարձ չի կատարվել նաև Լաչինի միջանցքի ապօրինի շրջափակմանը: Ձեռքբերումներից կարելի է առանձնացնել թերևս միայն այն, որ փետրվարի 8-ին Մեքսիկայի Սենատը ընդունեց փաստաթուղթ, որով ճանաչում է Հայոց ցեղասպանությունը՝ վկայակոչելով մարդու համընդհանուր իրավունքների պաշտպանության անհրաժեշտությունը։ Սակայն, այս ձեռքբերումը առավել ճիշտ կլինի վերագրել ԱԳՆ և Մեքսիկայի հայ համայնքի ակտիվ ջանքերին՝ հաշվի առնելով երկու երկրների և ժողովուրդների միջև առկա ավանդական բարեկամությունը:

Ընդհանրացնելով փաստենք, որ համայնք-դեսպանատուն համագործակցությունը գտնվում է սաղմնային փուլում, իսկ Մեքսիկայի քաղաքական իսթեբլիշմենթի հետ հանդիպումները կրում են որպես կանոն արարողակարգային բնույթ, ինչը որևէ կերպ չի նպաստում երկու երկրների միջև հարաբերությունների խորացմանն ու զարգացմանը:

Այս թեմայով Մեքսիկայում ավտոբուսի շրջվելու հետևանքով նախնական տվյալներով 14 մարդ է զոհվել ԵՄ-ում Հայաստանի դեսպան. ՀԱՊԿ-ը լքեց մեզ ՀՀ ֆինանսների նախարարն ընդունել է ԵՄ դեսպան Վասիլիս Մարագոսին Հայոց ցեղասպանության ժխտումը հանգեցրել է աշխարհում նոր ոճրագործությունների. Շվեդիայում ՀՀ դեսպան Պանթուրիքիստական ծրագրերը շարունակվում են. ՀՀ-ում Սիրիայի դեսպան Հայաստանում Ֆրանսիայի դեսպան Օլիվիե Դըկոտինյին Հայոց ցեղասպանության տարելիցին նվիրված գրառում է արել Ռուբեն Ռուբինյանն ընդունել է ՀՀ-ում Հունաստանի արտակարգ եւ լիազոր դեսպան Խրիստոս Սոֆիանոպուլոսին Վահագն Խաչատուրյանն ընդունել է Սիրիայի արտակարգ և լիազոր դեսպան Նորա Արիսյանին Վահագն Խաչատուրյանին իր հավատարմագրերն է հանձնել Հայաստանում Հարավային Աֆրիկայի Հանրապետության դեսպան Շոայբ Կասուն Սինջարում եզդիների նահատակությունը Հայոց ցեղասպանության կրկնությունն է՝ մեկ դար տարբերությամբ․ Հայաստանում Ֆրանսիայի դեսպան