Որոշ քաղաքական ուժեր առաջադրվել են իրենց գովազդելու և մոռացության չմատնվելու համար․ քաղտեխնոլոգ

«Ցանկացած քաղաքական ուժ կարող է ռեսուրս ունենալ, բայց դա քիչ է, դու կարող է լավ ռեսուրս ունենաս, բայց հաջողություն՝ ոչ»,- ԼՈՒՐԵՐ.com-ի հետ զրույցում նման կարծիք հայտնեց քաղտեխնոլոգ Արմեն Բադալյանը՝ անդրադառնալով քաղաքապետի առաջիկա ընտրություններին։ 

«Այն ուժերը, որոնք մասնակցում են ընտրություններին կարելի է երկու մասի բաժանել՝ պայմանական ազդեցություն ունեցող ուժեր և ավելի քիչ ազդեցիկ ուժեր։ Առաջի խմբի մեջ Տիգրան Ավինյանն է, Հայկ Մարությանը, «Մայր Հայաստան» դաշինքը, «Ապրելու երկիր», «Հանրային ձայն» կուսակցությունը։ Այս կուսակցությունները ունեն ռեսուրսների տարբեր ձևեր` վարչական, ֆինանսական, քաղաքական և այլն, իսկ մնացած կուսակցությունները այսպես ասած՝ երկրորդ տեղում են»,- ասաց Բադալյանը:

Մեր զրուցակցի խոսքով՝ ցանկացած ընտրություններում թե՛ նախկինում, թե՛ այժմ օգտագործվել է մի ռեսուրս, որը կոչվում է նկարչություն. «Աժմ իշխանական թևը ինչքանով կօգտագործի այդ նկարչությունը և դա ինչպես կազդի ընտրության արդյունքի վրա չենք կարող գուշակել, բայց այդ ռեսուրսը կարող է փոփոխություններ մտցնել վերջնական արդյունքի մեջ։ Չպետք է զարմանալ, որ լինի քաղաքական ուժ, որ ռեսուրս ունենա, բայց անգամ չկարողանա հաղթահարել 5%-ը և դուրս մնա»,- ասաց նա:

Ըստ Բադալյանի՝ կան քաղաքական  ուժեր, որոնք տարբեր նպատակներով են առաջադրվել` իրենց գովազդելու, մոռացության չմատնելու կամ ապագայում քաղաքական դաշտում դերակատարություն ունենալու համար։  

«Այժմ, թե ինչ քաղաքական պատկեր կլինի ոչ ոք չի կարող ասել, մոտավորապես սեպտեմբերի 14-15-ի կողմերում սոցիոլոգիական հարցումների միջոցով կարող է պարզեցվի իրավիճակը»,- եզրափակեց քաղտեխնոլոգը: 

Լիլիթ Զալիբեկյան