Փաշինյանի թիմակիցների մանիպուլյացիաները. Կառլեն Մկրտչյան

Analytical 31 January, 2024 22:00

Շարունակելով ընթերցողի ուշադրությանը ներկայացնել այն պաշտոնյաներին, ովքեր, մեղմ ասած, անկեղծ չեն գտնվել հանրության հետ, փորձել են դիմել մանիպուլյատիվ հնարքների, խմբագրել սեփական հայտարարություններն ու քայլերը՝ այսօր կանդրադառնանք Կառլեն Մկրտչյանին:

Վերջինս 2021-ի հոկտեմբերին Նիկոլ Փաշինյանի կողմից նշանակվել էր համայնքապետի ԺՊ, իսկ դեկտեմբերին ՏԻՄ ընտրություններում արդեն ընտրվել այդ պաշտոնում։ Մամուլը գրել էր, որ Արտաշատ խոշորացված համայնքի ՔՊ-ով առաջադրված եւ ընտրված համայնքապետ Կառլեն Մկրտչյանը, ով մինչ ավագանու ընտրություններն արտաշատցիների շրջանում ուներ «մեր տղա» համբավը, բազմելով համայնքապետի աթոռին, ստանձնելով 39 համայնքի մլրդ. դրամի հասնող բյուջեի ղեկավարությունը, ըստ նշված լրատվամիջոցի աղբյուրի, դարձել է ինքնահավան, որոշումներ է կայացնում միայն իր ու մերձավորների շահերից ելնելով: Իսկ ավագանու նիստերից մեկի ժամանակ վերջինս սահմանափակել է ՀԿ-ների ղեկավարների մուտքը եւ զրկել ձայնի իրավունքից, ավելին, մեղմ ասած, վռնդել է դուրս, ինչը բարձրաձայնել է նաեւ ՀԿ-ի ղեկավարներից մեկը։

Ի դեպ, շատ էին խոսակցություններն այն մասին, որ Կառլեն Մկրտչյանի հաղթանակին նպաստել են նախկին իշխանությունները, ավելի հստակ՝ Արտաշատի վաղեմի «տիրակալ» Հովիկ Աբրահամյանը, առանց որի, դժվար թե, ՔՊ թեկնածուն կարողանար համայնքում այդքան ձայն հավաքել։ Ասվածի ապացույցներից մեկն էլ այն է, որ այս տարի՝ Հարության տոնին, Հովիկ Աբրահամյանը եկեղեցու բակում «ձու է կռվացրել» Կառլեն Մկրտչյանի հետ։ Փաստորեն, մինչ Նիկոլ Փաշինյանը Երևանում հայտարարում է, որ ոչ մի համագործակցություն նախկինների հետ չի լինելու, որ ոչ մի ձուկ, ոչ մի մուկ չի պլստալու` նրա քաղաքապետը նախկինների հետ ջան ասում, ջան լսում է։

Ինչպես գիտենք, Արցախից բռնի տեղահանված 19 054 արցախցի տեղավորվել է Արարատի մարզում, մեծ մասին օգնության է հասել նաև Արտաշատի համայնքապետարանը, սակայն հենց այստեղ է որ տրամաբանական հարց է առաջանում: Լավ, Մկրտչյանը կանգնած էր ՔՊ ձևավորման ակունքներում, սակայն, ինչպես գիտենք, ՔՊ–ի ծրագիրը ենթադրում էր Արցախի հարցի բնավ էլ ոչ այսպիսի լուծում: Ըստ այդմ, արդյոք համայնքապետի մոտ կոգնիտիվ դիսոնանս չի առաջանում այն գաղափարախոսության միջև, որը ՔՊ-ն դավանում էր, կամ առնվազն հրապարակավ ներկայացնում էր և այն հայտարարությունների ու մեսիջների միջև, որոնք այսօր հնչեցնում են իր թիմակիցները: Արդյո՞ք նրա մոտ հարցեր չեն առաջանում, թե ի վերջո որտեղ են սխալվել, որ այսօր ավելի քան 20 հազար արցախցի ապաստան են հայցում Արարատի մարզում: Կամ արդյոք հարցեր չեն առաջանում, թե ինչպես է ստացվել, որ թշնամին արդեն տարածքային պահանջներ է ներկայացնում հենց Արարատի մարզին: Ի՞նչ պետք է տեղի ունենա, որ համայնքապետերը հիշեն՝ իրենք առաջին հերթին քաղաքացիների առջև են պատասխանատու և նոր միայն սեփական քաղաքական թիմի, և որպես պաշտոնյա՝ առնվազն պարտավոր են քաղաքացիական դիրքորոշում հայտնել ստեղծված իրավիճակի վերաբերյալ:

Սակայն, սա թերևս հռետորական հարց է: Ուշագրավ են նաև Արտաշատի համայնքապետարանի գնումները: Կենցաղային աղբի հավաքման ծառայություն է գնվել մի ՍՊԸ-ից, որը հարկայինի կողմից տուգանքի է ենթարկվել:

Շարունակելի...