Ըստ «Gallup»-ի՝ հանրության շուրջ 68%-ը ցանկանում է քաղաքական դաշտում տեսնել այլընտրանքային, նոր ուժերի

Analytical 7 February, 2024 20:50

ՀՀ վարչապետ Նիկոլ Փաշինյանի նկատմամբ վստահության մակարդակը նվազել է․ այս մասին են վկայում «Gallup International Association»-ի կողմից Հայաստանում անցկացված հարցումները, որոնք անցկացվել են հունվարի վերջին, իսկ արդյունքները հրապարակվել են երեկ։ Սակայն, Փաշինյանի անկում ապրող վարկանիշը միակ ուշագրավ ցուցանիշը չէ: Դիցուք՝ հարցված քաղաքացիների 29,3%-ը գտնում է, որ ներքաղաքական իրավիճակի լուծման համար ՀՀ-ում միանշանակ անհրաժեշտ են իրականացնել արտահերթ խորհրդարանական ընտրություններ: 2023թ.-ի նոյեմբերին արտահերթ խորհրդարանական ընտրություններին միանշանակ կողմ էր հարցված քաղաքացիների 23,3%-ը։ Խորհրդարանական ընտրությունների պահանջին զուգահեռ ուշադրություն է գրավում դաշտում գործող քաղաքական ուժերի ցածր վարկանիշը: «Եթե առաջիկա կիրակի օրը լինեն Խորհրդարանական ընտրություններ, ո՞ր կուսակցության կամ դաշինքի օգտին կքվեարկեք»՝ Գելափի հաջորդ հարցմանն ի պատասխան՝ քաղաքացիների պատասխանները բաշխվել են հետևյալ կերպ.

«Քաղաքացիական պայմանագիր» կուսակցություն- 16.1 տոկոս,

«Հայաստան» դաշինք– 4.7 տոկոս

«Հանրային ձայն» կուսակցություն- 3.6 տոկոս

«Պատիվ ունեմ» դաշինք- 2.9 տոկոս

Ստացվում է, որ հարցվածների գրեթե 68 տոկոսը չի պատրաստվում ձայն տալ այսօր դաշտում գործող քաղաքական ուժերից և ոչ մեկին: Սա նշանակում է, որ հանրության մեծամասնությունը ցանկանում է դաշտում տեսնել նոր, այլընտրանքային քաղաքական ուժերի՝ նոր դեմքերով, նոր գաղափարներով և ծրագրերով, որոնք դուրս կլինեն նախկին-ներկա, սև-սպիտակ կեղծ դիսկուրսից: Սոցիոլոգիական հարցումները վկայում են, որ դաշտում երրորդ ուժի ձևավորման դեպքում այդ ուժի կամ ուժերի պահանջարկն անչափ մեծ է լինելու, ինչպես որ մեծ են լինելու ընտրությունների միջոցով իշխանությունը վերցնելու շանսերը:

Երեկ հրապարակված հարցումների արդյունքներից պետք է առանձնացնել նաև այն քաղաքացիների թիվը, որոնք պատրաստ են հավանական պատերազմի դեպքում պայքարել հանուն Հայրենիքի: Հարցված քաղաքացիների 95,7%-ը նման պատրաստակամություն է հայտնել: Այսպիսով ցրվում է այն միֆը, որը համառորեն առաջ էր տանում Նիկոլ Փաշինյանը՝ փորձելով ստեղծել տպավորություն, թե պատերազմում պարտության պատճառներից մեկն այն էր, որ հայերը չեն ցանկացել կռվել սեփական հողի համար և արդյունքում «դասալիքների թիվը հասել է շուրջ 12 հազարի»: Հանրության մեծամասնությունը չի ցանկանում ՀՀ պետական շահերը զիջելու գնով խուսափել նոր պատերազմից, որով վերջին շրջանում Փաշինյանը փորձում է վախեցնել հայ ժողովրդին՝ ապագայում սպասվող զիջումներն առավել հեշտ մատուցելու նպատակով:

Ուշադրության է արժանի երեկ հրապարակված ևս մեկ տվյալ: Հետազոտության մասնակիցների 38,1 %-ի կարծիքով՝ ՀՀ Սահմանադրությունը պետք է մնա անփոփոխ։ 34,2 %-ը կարծիք է հայտնել, որ որոշ դրույթներ պետք է փոխվեն, որոնք, սակայն, որևէ կերպ չեն վերաբերվում ազգային ինքնության սիմվոլներին և Անկախության հռչակագրին: Հարցման մասնակիցների ընդամենը 13,4%-ն է կարծում, որ Հայաստանի Հանրապետությանն անհրաժեշտ է նոր Սահմանադրություն: Սա նշանակում է, որ հանրության մեծամասնությունը դեմ է՝ Ադրբեջանի թելադրանքով նոր Սահմանադրություն ընդունելուն, Արարատից, զինանշանից և ՀՀ օրհներգից հրաժարվելուն, և առավել ևս դեմ է՝ Անկախության հռչակագիրը խմբագրելուն, ինչն իր հերթին կազատեր Նիկոլ Փաշինյանի ձեռքերը՝ Արցախը դե-յուրե Ադրբեջանի մաս ճանաչելու հարցում: Հասկանալի է, որ այսպիսի ցուցանիշներով Նոր Սահմանադրություն ընդունելը Փաշինյանի համար գրեթե անհնարին խնդիր է դառնում:

Վերջին սոցհարցումներն ընդհանուր առմամբ ի ցույց են դնում այն ստագնացիան, որն այսօր առկա է քաղաքական դաշտում: Հանրության ճնշող մեծամասնությունը գիտակցում է երկրի առջև ծառացած մարտահրավերները, սակայն դրանց լուծումը չի կապում դաշտում գործող և ոչ մի քաղաքական ուժի հետ: Ստացվում է, որ ինչպես բազմիցս նշել ենք՝ փակուղուց միակ ելքը նոր քաղաքական ուժի ձևավորումն է, որին կհաջողվի շահել հանրության մեծամասնության վստահությունը և ի վերջո լուծել երկրի առջև ծառացած խնդիրների թնջուկը ՝ ի շահ Հայաստանի և Արցախի: