Ոստիկանները զբոսայգում ծխող քաղաքացուց հարցրել են անուն-ազգանունը, հեռախոսահամարը և օրեր անց ուղարկել տուգանքի որոշումը. Հետք

Hetq.am-ը գրել է.

Մեծամորի բաժնի ոստիկանները 2023թ. դեկտեմբերի 18-ին մոտեցել են Արմավիրի կենտրոնական զբոսայգում ծխող Ռաշիդ Ավդոյանին և նախազգուշացրել, որ չի կարելի ծխել: Քաղաքացին ներողություն է խնդրել՝ հայտարարելով, որ նախազգուշացնող ցուցանակ չկա՝ ծխելն արգելելու վերաբերյալ, ու չի իմացել արգելքի մասին: Ոստիկաններն ասել են, որ այս անգամ միայն նախազգուշացնում են, հաջորդ անգամ կտուգանեն: Հեռանալու ժամանակ ոստիկանները հարցրել են քաղաքացու անուն-ազգանունն ու հեռախոսահամարը: Օրեր անց քաղաքացին ստացել է որոշումը՝ 50 000 դրամ տուգանվելու մասին:

Ռաշիդի համար անակնկալ է եղել իրեն վարչական պատասխանատվության ենթարկելու մասին որոշումը: Այդ տարածքում միշտ ծխել է: Ոստիկանների այցի ժամանակ այլ քաղաքացիներ ևս ծխել են տարածքում, քանի որ երբևէ չեն հանդիպել արգելող գրությունների: Ըստ քաղաքացու՝ ոստիկանները պարզաբանել են, թե տարածքում տեսախցիկներ կան տեղադրված, դրանցից են օգտվում: Մինչդեռ այդ տեսախցիկները ոչ թե քաղաքացիներին տուգանելու համար են տեղադրված, այլ՝ անվտանգության:

Ռաշիդի փոխանցմամբ՝ ոստիկաններն իրեն չեն հայտնել, որ տուգանում են, այլ հայտարարվել է նախազգուշացման մասին, ինչն ընդունել է: Մինչդեռ առանց անձը հաստատող փաստաթղթի, անուն, ազգանուն և հեռախոսահամարով ոստիկանները նույնացրել են քաղաքացուն՝ պատշաճ չտեղեկացնելով այդ մասին:

Ռաշիդ Ավդոյանը նշում է, որ ինքը որևէ փաստաթուղթ չի ստորագրել, այդ թվում՝ վարչական իրավախախտման արձանագրության տակ: Նախ՝ ոստիկանները չեն առաջարկել ստորագրել, հետո էլ իրեն չի բացատրվել վարչական պատասխանատվության ենթարկելու և բողոքարկելու կարգը: Որոշումը ստանալուց հետո է միայն իմացել, որ տուգանվել է:

Ռաշիդ Ավդոյանին տուգանել են «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի 6-րդ հոդվածի 1-ին մասի դ կետի պահանջները խախտելու համար, այն է՝ արգելվում է ծխախոտային արտադրատեսակների, ծխախոտային արտադրատեսակների փոխարինիչների (բացառությամբ բժշկական նպատակով օգտագործվող ծխախոտային արտադրատեսակների փոխարինիչների) օգտագործումը համայնքի կողմից երեխաների համար նախատեսված խաղահրապարակներում և խաղային պուրակներում:

Քաղաքացին փոխանցում է, որ ինքը ծխել է զբոսայգում՝ երեխաների համար նախատեսված խաղահրապարակից հեռու:

Ներքին գործերի նախարարության մամուլի խոսնակ Նարեկ Սարգսյանը «Հետք»-ին փոխանցեց, որ դեկտեմբերի 18-ին քաղաքացին ինքն է իր անձնական տվյալները՝ բնակության հասցե, ծննդյան տարի, փոխանցել է ոստիկանության ծառայողներին։ Հեռախոսահամար հարցնելու անհրաժեշտություն չի եղել։

Ըստ՝ Ն. Սարգսյանի, արձանագրությունը կազմվել է տեղում, սակայն քաղաքացին հրաժարվել է իր օրինակը վերցնել։ Նրան տեղում ասվել է, որ դեկտեմբերի 25-ին վարչական վարույթով լսումներ են լինելու, սակայն Ռ. Ավդոյանը հրաժարվել է ծանուցագիրը վերցնել ու ներկայանալ լսումներին։

Նարեկ Սարգսյանից հետաքրքրվեցինք՝ կա՞ որևէ ապացույց, որ քաղաքացին ծանուցվել է վարչական վարույթի մասին, ինչին ի պատասխան Ն. Սարգսյանը փոխանցեց, որ տեղում է ծանուցվել, լրացուցիչ ծանուցագիր չի ուղարկվել։

Եթե ընդունենք նախարարության պարզաբանումը, ինչը հակասում է քաղաքացու հայտնած տվյալներին, ապա բաց է մնում կարևոր հարցը՝ ինչպե՞ս է ապացուցվելու, որ քաղաքացին իրականում տեղյակ է եղել, որ իր դեմ վարչական վարույթ է հարուցվել, և պատշաճ ծանուցվել է դրա մասին։

Ռաշիդ Ավդոյանը պնդում է, որ իրեն չեն տեղեկացրել վարույթի, տուգանելու մասին։ Չեն հարցրել նաև բնակության հասցեն։ Ինքն է ասել, որ Արմավիրի կողքի գյուղից է, տեղեկացված չէ արգելքի մասին, սակայն ոչ գյուղի անունն է նշել, ոչ տան հասցեն։

Արմավիր խոշորացված համայնքի ղեկավար Դավիթ Խուդաթյանից հետաքրքրվեցինք, թե Արմավիրի զբոսայգիներում կա՞ն ծխելու համար առանձնացված վայրեր կամ տեղադրվա՞ծ են ծխելն արգելելու վերաբերյալ գրություններ:

Համայնքի ղեկավարը պարզաբանեց, որ առանձնացված տարածքներ չկան: Զբոսայգիներում ցուցանակներ ևս տեղադրված չեն, սակայն պարբերաբար թղթեր են փակցնում, որ ծխելն արգելվում է:

«Ճիշտն ասած՝ այս պահին չգիտեմ՝ դրանցից քանիսն է մնացել կամ չի մնացել, բայց մի քանի անգամ ինքնակպչուն թղթերով փակցրել ենք, կարծում եմ որոշները պահպանվել են»,- ասում է Դավիթ Խուդաթյանը:

Այս թեմայով Մեր տնտեսությունը չունի որակ. Ժողովուրդը տուգանքի մատերիալ չէ. Հայկ Ֆարմանյան (տեսանյութ) Թումանյանի անվան զբոսայգում, կկայանա «Երևանի բալետային փառատոն» նախագիծը Նիկոլ, օրերի հարց է, չես պատկերացնում, թե շարքային ոստիկանները ոնց են նողկում քեզնից. Զոհրաբյան (տեսանյութ) Հունիսի 2-5-ը, Թումանյանի անվան զբոսայգում, կկայանա «Երևանի բալետային փառատոն» նախագիծը Անի Գևորգյանի և բնակիչների ահազանգից հետո Կիրանց սկսել են մթերք ուղարկել (տեսանյութ) Քուրիկ ջան. ոստիկանները՝ ԱԺ կին պատգամավորներին այսպես են դիմում (տեսանյութ) Բա ով ա որոշում, օրենքով ստեղ մենակ ես եմ որոշում. ոստիկանները ճնշում են գործադրում պատգամավորի նկատմամբ (տեսանյութ) Թուրքիան Իրան է ուղարկել ավելի քան 30 լեռնագնացից բաղկացած որոնողափրկարարական թիմ Եկանք, որ Լենա տատիկին շնորհավորենք, ոստիկանները մեր առջև ճանապարհը փակեցին. Արսեն Գրիգորյան (տեսանյութ) Շարժման առաջնորդը խոստացավ՝ բուռն օրեր են սպասվում, մեծ հանրահավաք է լինելու (տեսանյութ)