Rolls-Royce-երով շրջող Ալբերտիչը «մեքենա չունի», բայց միլիարդով փող ու լիքը անշարժ գույք ունի. Mediahub.am

Mediahub.am

Ազգային ժողովի «Քաղաքացիական պայմանագիր» խմբակցության օլիգարխ պատգամավոր, նախկինների թվերից հարստացած, նախկինների հետ մտերիմ շփումների մեջ եղած ու այսօր նախկինների դեմ պայքարող Խաչատուր Սուքիասյանը ՔՊ-ի ամենահարուստ պատգամավորն է՝ Գուրգեն Արսենյանից էլ հարուստ։ Նա իր 2023 թվականի հայտարարագրում միանգամից 34 անշարժ գույք է հայտարարագրել՝ հողամասեր, բազմաբնակարան շենքերում բնակարաններ, հասարակական նշանակության շինություններ և այսպես շարունակ, որոնց թվարկելը մի քանի էջ կկազմի։ 

Այս ամենի կողքին, սակայն, Խաչատուր Ալբերտիչը՝ ինչպես իրեն դիմում են իր նախկին ու ներկա ենթակաները, զարմանալիորեն չի հայտարարագրել որևէ ավտոմեքենա, տրանսպորտի որևէ միջոց։ Սուքիասյանը, որը տնօրինում է հսկայական ավտոպարկի՝ բաղկացած մեկը մեկից ճոխ ու թանկարժեք մեքենաներից, ինքն էլ ԱԺ է գալիս մոտ կես միլիոն դոլար արժողությամբ Rolls-Royce Cullinan ամենագնացով, իր հայտարարագրի՝ տրանսպորտի միջոցներին վերաբերող դաշտում որևէ ավտոմեքենա չի նշել։ Գեթ մեկ Rolls-Royce էլ չի հայտարարագրել, չնայած նրան, որ ՔՊ-ի օլիգարխ պատգամավորը դեռ նախկինների թվերից միշտ ձգտել է առաջինը Հայաստան ներկրել  նոր թողարկված Mercedes-ի, Bentley-ի ու Rolls-Royce-ի թանկարժեք մոդելները` յուրահատուկ մրցակցության մեջ գտնվելով քաղաքի մյուս հարուստների հետ։ Բայց, ըստ հայտարարագրի, ստացվում է՝ մետրոյով կամ ավտոբուսով է աշխատանքի գնում Խաչատուր Սուքիասյանը։ 

Գործարար պատգամավորը նաև հսկայական բաժնեմասեր ունի 12 խոշոր ընկերություններում, որոնք փաստացի իրեն են պատկանում և դրանց անվանական թվարկումը ևս բավականին երկար կտևի։

Անցյալ տարվա ընթացքում նա նաև 550 մլն դրամի չափով փոխառություն կամ, այսպես ասած, պարտքով փող է տվել եղբորը՝ Ռոբերտ Ալբերտի Սուքիասյանին։ Վերջինս, հիշեցնենք, 2021 թվականի հուլիսի 18-ին ձերբակալվել, ապա կալանավորվել էր Երևանի կենտրոնում՝ Ամիրյան 18 հասցեում զենքի գործադրմամբ խուլիգանություն կատարելու մեղադրանքով, սակայն մի քանի ամիս անց՝ 55 մլն դրամ գրավի դիմաց ազատ էր արձակվել։ 

Սուքիասյանը նաև գորգերի և արվեստի գործերի տարբեր նմուշներ է հայտարարագրել՝ 5-15 մլն դրամ արժողությամբ, որոնք նա ձեռք է բերել 1995-98 թվականներին՝ ժառանգության կամ նվիրատվության տեսքով։ Իսկ 2021 թվականին էլ 23 մլն դրամով գնել է ձեռքի ժամացույց, որի մոդելը, սակայն, նշված չէ, ավելի շուտ՝ թաքցված է։ 

Ինչ վերաբերում է Խաչատուր Սուքիասյանի դրամական միջոցներին, ապա նա 2023 թվականի վերջին իր բանկային հաշիվներին ունեցել է 65 մլն 797 հազար 877 դրամ, իսկ որպես կանխիկ դրամ՝ հայտարարագրել է 6 միլիարդ 693 միլիոն 369 հազար 217 դրամ, 1 մլն 913 հազար 385 դոլար, 185 հազար եվրո։ Փաստորեն, իրենց քաղաքական առաջնորդ, Սուքիասյանի «սիրելի» Նիկոլ Փաշինյանը առավոտից երեկո կոկորդ է պատռում, որ պետք է պայքարել անկանխիկի դեմ, քեշով փող չպետք է պահել, բայց իր թիմակից պատգամավորը մոտ 7 միլիարդ դրամի կանխիկ գումար է պահում տանը, մոտ 2 միլիոն էլ՝ դոլարով։

Պատգամավոր Սուքիասյանի տարեկան եկամուտը 2023 թվականին կազմել է 828 մլն 907 հազար 264 դրամ, որից ընդամենը 10 մլն 518 հազար 630 դրամն է Ազգային ժողովից ստացած իր աշխատավարձը, մնացածը շահաբաժնից գոյացած կամ վարձակալության դիմաց ստացած գումարներ են։

Վահե Մակարյան

Այս թեմայով Սերոբ Գասպարյանի տանը տանկ ու իսկանդեր են փնտրել՝ չեն գտել, բայց կալանավորել են. Hraparak.am «Անբացատրելի ամաչում էի, բայց օգտագօրծեցի պահն ու այնքա՜ն մեծ բավականություն ստացա». Աննա Մանուչարյանը երգում է Արսեն Գրիգորյանի նվագակցությամբ Խոշոր ավտովթար Տաշիրում. բախվել են «ԴԱՖ» բեռնատարն ու 2 մարդատար մեքենա. կա 1 զոհ, 5 վիրավոր Այո´, Հայաստանի 200 քկմ տարածքն օկուպացված է, բայց մենք այն հետ չենք բերելու ռազմական ճանապարհով. Փաշինյան (տեսանյութ) Ինչ ունեցվածք ունի արդարադատության նորանշանակ փոխնախարարը Քշում են ոչ սթափ, առանց վարորդական իրավունքի. Պահպանվող հատուկ տարածք է տեղափոխելով 179 մեքենա Մայր տաճարն ունի նոր՝ բրոնզաձույլ խաչ Վաշինգտոնը մտավախություն ունի, որ Ուկրաինան կարող է պարտվել այս ձմռանը․ Politico Անտիբիոտիկ եք օգտագործո՞ւմ, բա մեղրը ո՞նց եք պահում, բայց չեմ առնելու, ՀԴՄ չեք տալիս. Փաշինյան (տեսանյութ) Ստեփանակերտի քաղաքապետին պատկանող մեքենան առգրավել են. նա միայն բակում զբոսնելու թույլտվություն ունի