Դեռ՝ առանց անունների. 3 անձին սպանողին՝ տնային կալանք, ոստիկանի ուղղությամբ դատարկ շիշ նետողին՝ «ուղեգիր» դեպի ՔԿՀ. 168.am

Right 1 July, 2024 9:24

168.am-ը գրել է.

Վերջին տարիներին փաստաբանների շրջանում խիստ նորաձև է դարձել իրենց համար բարենպաստ, գոհացուցիչ դատական որոշման կամ ակտի դեպքում սոցիալական ցանցի էջում դիֆերամբ ձոնել այդ որոշումը կայացրած դատավորին:

Դատավորին իր կատարած աշխատանքի համար շնորհակալություն հայտնելը կանխավճարի նման մի բան է դարձել: Հետո այդ փաստաբանները հայտնվում են «Կարեն Անդրեասյան փրոդաքշըն»-ի պրոյեկտներից մեկում՝ «Փաստաբանները շնորհակալություն են հայտնում դատավորներին» խորագրով:

Կարեն Անդրեասյանի շոուբիզնեսյան անցյալը ճիշտ քայլեր է հուշում նրան: Այդ փոքր տեսահոլովակների նպատակն այն է, որ հանրությանը ցույց տան, թե որքան անկախ է դատական համակարգը, և, որ դրա համար բոլորն իրեն պետք է շնորհակալություն հայտնեն:

Հասկանալի է փաստաբանների մոտիվացիան: Բոլորն են ուզում, որ հնարավորինս շատ մարդիկ տեսնեն՝ ինչքան լավ են իրենք պաշտպանում իրենց վստահորդներին: Դա և՛ նոր վստահորդներ ներգրավելու եղանակ է, և՛ փաստաբանների հիերարխիայում վեր բարձրանալու միջոց: Սակայն այդ PR ակցիայի մեջ այնպիսի դատավորների անուններ շրջանառելը, ովքեր կենցաղային էպիզոդիկ գործով ի օգուտ որևէ փաստաբանի պաշտպանյալի որոշում են կայացնում, մեղմ ասած, ծիծաղելի է, եթե ոչ՝ վտանգավոր:

Երբեմն այնպիսի դատավորների անուններ են շրջանառվում, ովքեր ստաբիլ քաղաքական հնչեղ կամ ոչ այնքան գործերով կատարում են իշխանության քաղաքական պատվերը՝ ամենաաննշան գործերով անգամ կալանավորելով Նիկոլ Փաշինյան-Կարեն Անդրեասյան-Մնացական Մարտիրոսյան-Արգիշտի Քյարամյան-Աննա Վարդապետյան շղթայի համար անցանկալի անձանց, որ ակամայից ուզում ես հարցնել՝ ժողովուրդ, լա՞վ եք: Իսկ «սկզբունք, արդարություն, տրամաբանություն, ի վերջո, արդար դատաքննություն» հասկացությունները որտե՞ղ թաղեցիք:

Հիմա՝ ավելի առարկայական, բայց դեռ՝ առանց անունների:

Եթե վիճակագրությունը նայես, ապա նման դատավորների գոհունակության առարկա դարձած որոշումները հիմնականում վերաբերում են թմրանյութերի, վթարների, խուլիգանության, կենցաղային գողությունների, անգամ սպանության փորձերի և սպանությունների հետ կապված գործերին, բայց ոչ երբեք՝ օրինակ, ամենաանմեղ քաղաքական ակցիաների ժամանակ «խուլիգանության» մեջ մեղադրվող որևէ գործի:

Այսպես՝ Երևանի քրեական դատարանում կա դատավոր, ով 3 անձի սպանության մեջ մեղադրվողին տնային կալանք խափանման միջոցն է տալիս, բայց օրինակ՝ ցույցերի ժամանակ ոստիկանների ուղղությամբ դատարկ շիշ նետողին կալանավորում է:

Ի դեպ, այդ դատավորը պարբերաբար իշխանության սրտի այս կամ այն թեկնածուի համար որպես ուղեկցող՝ հայտնվում է առաջխաղացման ցուցակներում, անգամ Ազգային ժողով (ԱԺ) է գնում, բայց բաղձալի առաջխաղացումը չի ստանում: Թեպետ, ասում են, վերջերս մազ էր մնացել՝ հայտնվեր Վճռաբեկ դատարանում, և միայն վերջին պահին է ԱԺ-ի «Քաղաքացիական պայմանագիր» կառավարող խմբակցությունը ստացել այլ անվամբ հաղորդագրություն:

Որևէ մեկը հարցրե՞լ է՝ այդ ինչպե՞ս է պատահում, որ 3 անձի սպանության մեջ մեղադրվողի խափանման միջոցը տնային կալանքն է լինում, իսկ ոստիկանի ուղղությամբ շի՛շ նետողը դեպի քրեակատարողական հիմնարկ «ուղեգիր» է ստանում: Ընդ որում, այդ դատավորը տնային կալանքը տալիս է այն ժամանակ, երբ մի անգամ Վերաքննիչ դատարանը բեկանում է այդ որոշումը, և վերջինս կրկին է որոշում 3 անձին սպանողին տնային կալանք տալ, ինչը ևս մեկ անգամ հետո բեկանվում է Վերաքննիչ դատարանում: Հիմա այստեղ շահագրգռվածություն կա՞, թե՞ չէ՞… Կարգապահականի թեմա՞ է, թե՞ չէ, որովհետև այդ որոշումը կայացնողն իրենց սրտի դատավորն է:

Առհասարակ նիկոլական իշխանության օրոք ամենահեշտը թմրանյութերի հետ կապված գործերով կալանքի որոշում չստանալն ամենահեշտ բանն է, իսկ այսօր թմրանյութերի շրջանառության ահռելի ծավալի պայմաններում, բնականաբար, այդպիսի գործերի պակաս դատավորների մոտ չկա:

Փաստաբանները հաստատ լավ են գիտակցում, որ 1-2 գործով դատավորի մասին կարծիք ու գնահատական չի ձևավորվում, որ պետք է նայել համակցության մեջ, տարատեսակ ու տարաբնույթ, այդ թվում՝ իշխանության քիմքին ոչ հաճելի գործերով դատավորի դրսևորած վարքագծին ուշադրություն դարձնելով, և այս իրենց համար կարևոր, բայց ընդհանուր առմամբ ոչինչ չասող ու ոչ մի նշանակություն չունեցող փառաբանության ցույցերն առ կոնկրետ գործերով դատավորներ սոսկ րոպեական ազդեցություն են ունենում, ու որևէ կապ չունեն իրերի իրական դրության հետ:

Այնպես որ մի՛ արեք, պարոնայք, սիրուն չէ: Ու առհասարակ, երբ հաջորդ անգամ կպատրաստվեք որևէ դատավորի իր կատարած աշխատանքի համար շնորհակալ լինել, մի հատ նայեք՝ ցույցերի ժամանակ խուլիգանության հոդվածով քանի անձի է նրանցից յուրաքանչյուրն ուղարկել ՔԿՀ-ներ:

Իսկ առհասարակ բողոքի ակցիաներին հաջորդող իրադարձությունները վաղուց փաստել են՝ Երևանի քրեական դատարանում բոլորն են «կոտրվել», ով էլ չի «կոտրվել», նրան(ց) վաղուց քաղաքական գործեր չեն մակագրվում: