Արջի քոթոթի սպանության դեպքի առթիվ Շրջակա միջավայրի նախարարությունը դիմել է ոստիկանություն
Право![Արջի քոթոթի սպանության դեպքի առթիվ Շրջակա միջավայրի նախարարությունը դիմել է ոստիկանություն](/timthumb.php?src=disc/29-05-21/f3aa88505efb72b4ee54e50e648c4998.jpg&w=780)
Արմավիրի մարզում գորշ արջի քոթոթի դաժան սպանության դեպքի առթիվ ՀՀ շրջակա միջավայրի նախարարությունը դիմել է ՀՀ բնապահպանության և ընդերքի տեսչական մարմին, ՀՀ ոստիկանության Արմավիրի մարզային վարչություն՝ դեպքը մանրամասն ուսումնասիրելու, հանգամանքները պարզելու և համապատասխան միջոցներ ձեռնարկելու համար։
«Անընդունելի է Հայաստանի «Կարմիր գրքում» գրանցված որևէ կենդանատեսակի հանդեպ ոտնձգությունը, քանի որ Հայաստանի բնաշխարհը բնակեցնող յուրաքանչյուր կենդանի մեր երկրի էկոհամակարգի անքակտելի մասն է, կենսաբազմազանության պահպանության կարևորագույն օղակ։ Առավել քան առաջնային է կարմիրգրքյան տեսակների պահպանությունն ու պաշտպանությունը, քանի որ դա բխում է ՀՀ բոլոր քաղաքացիների շահերից։ Խիստ դատապարտում ենք նման վերաբերմունքը կենդանիների նկատմամբ»,-ասվում է ՀՀ շրջակա միջավայրի նախարարության տարածած հաղորդագրության տեքստում:
Ավելի վաղ լրատվամիջոցներից մեկն ահազանգել էր Արմավիրի մարզում գորշ արջի քոթոթի դաժան սպանության վերաբերյալ։ Համացանցում հայտնվել էր լուսանկար, որտեղ 2 քաղաքացի հպարտ ու երջանիկ տեսքով լուսանկարվել են արջի արնաքամ քոթոթի հետ։ Ըստ ամենայնի՝ հենց նրանք են սպանել այդ քոթոթին:
Հայաստանի Հանրապետության կենդանիների «Կարմիր գրքում» գրանցված գորշ արջ սպանելու համար նախատեսված է պատասխանատվություն ՀՀ քրեական օրենսգրքով՝ տուգանք՝ նվազագույն աշխատավարձի 400-600-պատիկի չափով, կամ կալանք՝ 2-3 ամիս ժամկետով՝ 1-ից 5 միլիոն դրամ վնասի վերականգնմամբ։
Նախարարությունը ՀՀ բոլոր քաղաքացիներին հորդորում է նման դեպքերում անհապաղ ահազանգել ՀՀ Ոստիկանություն, ՀՀ բնապահպանության և ընդերքի տեսչական մարմին/EPMIB (թեժ գիծ՝119) կամ դիմել Շրջակա միջավայրի նախարարություն։
![](disc/29-05-21/e18da595f58dcb5bdbcf6a575a3da085.jpg)
![](banners/armflix.jpg)