Անցնող շաբաթվա ամենակարևոր լուրերի ընտրանին

Аналитический 19 Ноябрь, 2023 11:00

Ձեր ուշադրությանն ենք ներկայացնում անցնող շաբաթվա ամենակարևոր լուրերի ընտրանին: Եվ այսպես՝

Նոյեմբերի 13

ՀՀ Անվտանգության խորհրդի քարտուղար Արմեն Գրիգորյանը հեռախոսազրույց է ունեցել Իրանի Հանրապետության Ազգային անվտանգության բարձրագույն խորհրդի քարտուղար Ալի Աքբար Ահմադյանի հետ։ Հեռախոսազրույցի ընթացքում կողմերը քննարկել են Հայաստանի և Իրանի միջև տնտեսական հարաբերությունների զարգացման հեռանկարները։

Վարչապետ Նիկոլ Փաշինյանն ընդունել է գերմանական «Gerkan, Marg and Partners» ճարտարապետական կազմակերպության ներկայացուցիչներ Թոբիաս Քայելին և Յոհան Ռաբեին։

Նոյեմբերի 14

ՀՀ ֆինանսների նախարար Վահե Հովհաննիսյանը հայտնել է որ ՊՆ 2024 թվականի բյուջեի ծախսերը կկազմեն 555 մլրդ դրամ, ինչը 37,7 մլրդ դրամով ավելի է 2023 թվականի համեմատ։

Նոյեմբերի 15

ԱԺ-կառավարություն հարցուպատասխանի ընթացքում Նիկոլ Փաշինյանը հերթական անգամ բողոքեց ՀԱՊԿ-ից՝ նշելով, որ ՀԱՊԿ-ն պատշաճ արձագանք չի տվել Հայաստանի անվտանգային մարտահրավերներին, և դա կրկնվել է մի քանի անգամ: Վարչապետը նշեց, որ հանրության համար էլ պարզ չէ, թե ինչու են ամեն անգամ գնում ու նույն բաները կրկնում` չստանալով ոչ մի արձագանք ու թողնում հետ գալիս:

Նույն օրը Նիկոլ Փաշինյանն ընդունել է Վրաստանի պաշտպանության նախարար Ջուանշեր Բուրչուլաձեի գլխավորած պատվիրակությանը: Վարչապետի պաշտոնական կայքի հաղորդագրության համաձայն՝ Ն․ Փաշինյանը նշել է, որ Հայաստանի և Վրաստանի հարաբերությունները շարունակում են դինամիկ կերպով զարգանալ և հավելել, որ տարբեր ոլորտներում արձանագրվում է համագործակցության ընդլայնում: Նիկոլ Փաշինյանի խոսքով` դա ՀՀ կառավարության համար ունի մեծ կարևորություն և առաջնահերթություն:

Բրյուսելում ՀՀ ԱԳ նախարար Արարատ Միրզոյանը հանդիպել է ԵՄ հարևանության և ընդլայնման հարցերով hանձնակատար Օլիվեր Վարհեիի հետ: Հանդիպման ընթացքում քննարկվել են ՀՀ-ԵՄ գործընկերության ընդգրկուն օրակարգի հարցեր: Զրուցակիցները մտքեր են փոխանակել առկա երկխոսության և փոխադարձ հետաքրքրություն ներկայացնող ոլորտներում համագործակցության ընդլայնման հնարավորությունների շուրջ: Այս համատեքստում կարևորվել է նաև նոյեմբերի 15-ին Հայաստան-ԵՄ քաղաքական և անվտանգային հարցերով երկխոսության երկրորդ բարձրաստիճան նիստի անցկացումը Բրյուսելում:

Հայաստանում 2024 թվականից կսկսվի բժշկական ապահովագրության համակարգի փուլային ներդրումը։ Այս մասին նոյեմբերի 15-ին Ազգային ժողովի նիստում հայտարարել է Հանրապետության առողջապահության նախարար Անահիտ Ավանեսյանը։

Երևանին անվտանգության ոլորտում Եվրամիության հնարավոր աջակցության վերաբերյալ Բրյուսելյան քննարկումներից հետո Հայաստանի կառավարությունը հաղորդեց՝ վարչապետ Նիկոլ Փաշինյանը չի մասնակցի հաջորդ շաբաթ Մինսկում կայանալիք ՀԱՊԿ-ի խորհրդի նիստին:

Նոյեմբերի 16

ՀՀ կրթության, գիտության, մշակույթի և սպորտի նախարար Ժաննա Անդրեասյանն ընդունել է Ֆրանկոֆոնիայի միջազգային խաղերի կոմիտեի տնօրեն Զեյնա Մինային։

Նոյեմբերի 17

Արդարադատության նախարար Գրիգոր Մինասյանը Աթենքում հանդիպել է Հանրային իրավունքի եվրոպական կազմակերպության ղեկավար (EPLO) Սփիրիդոն Ֆլոգաիտիսի հետ: Հանդիպմանը նախարարը ներկայացրել է արդարադատության ոլորտի բարեփոխումների օրակարգը: Քննարկվել է Հայաստանում Սահմանադրական բարեփոխումների ընթացքն ու այդ ուղղությամբ հնարավոր աջակցությունը:

Մայրաքաղաքի համար պատմամշակութային խոշոր արժեք ներկայացնող թաղամասի՝ Կոնդի վերակառուցման ծրագիրը այս շաբաթ գործնական ընթացք է ստացել: Գույքային միավորների օրինականացման համար արդեն իսկ առկա են քաղաքապետարան մուտքագրված 167 դիմում: Քաղաքապետարանի բարձրաստիճան պաշտոնյաները ուրբաթ կոնդեցիների հետ քննարկել են ծրագրի ու թաղամասի վերակառուցման հայեցակարգի հետ կապված հարցեր:

Հրդեհ էր բռնկվել ԵՊՀ 1-ին մասնաշենքի նկուղային հարկի սենյակներից մեկում, որից հետո պայթյուն եղել։ Ներքին գործերի նախարարությունը հայտնում են, որ աշխատակիցներից մեկը զոհվել է տեղում, երեք անձ տեղափոխվել են հիվանդանոց, այդ թվում՝ մեկը պարեկային ծառայության աշխատակից, որը ծխահարումով հոսպիտալացվել է, վիճակը գնահատվում է բավարար։

ՄԱԿ-ի Արդարադատության միջազգային դատարանը հրապարակել է միջանկյալ միջոց կիրառելու վերաբերյալ ՀՀ հայցն ընդդեմ Ադրբեջանի գործով որոշումը։

Հանրային ծառայությունները կարգավորող հանձնաժողովը (ՀԾԿՀ) հավանություն է տվել MTS Armenia (ապրանքանիշը՝ Viva-MTS, ռուսական МТС–ի դուստրը) ընկերության վերահսկողությունը Fedilco Group Limited կիպրական ընկերությանը հանձնելուն։ Հիմա հայկական օպերատորի 100% բաժնետոմսերի սեփականատերը Aramayo Investments Limited–ն է (գրանցված է Կիպրոսում, ներառված է МТС խմբում)։

Նոյեմբերի 18

Երևանում մեկնարկել է ԵԱՀԿ ԽՎ աշնանային նստաշրջանը։ ։ Հիշեցնենք, որ Հայաստանի Հանրապետության Ազգային ժողովը հյուրընկալելու է Եվրոպայի անվտանգության և համագործակցության կազմակերպության խորհրդարանական վեհաժողովի աշնանային նստաշրջանը՝ «ԵԱՀԿ-ն ճգնաժամի պահերին. խորհրդարանական վեհաժողովի դերը ներքին և արտաքին մարտահրավերները հակազդելու գործում» խորագրի ներքո:

Վարչապետ Նիկոլ Փաշինյանն ընդունել է ԵԱՀԿ Գլխավոր քարտուղար Հելգա Մարիա Շմիդին: Զրուցակիցներն անդրադարձել են Երևանում անցկացվող ԵԱՀԿ խորհրդարանական վեհաժողովի աշխատանքներին, օրակարգային հարցերին, ՀՀ կառավարության և ԵԱՀԿ-ի միջև համագործակցությանը: