Կենտրոն վարչական շրջանի նորանշանակ ղեկավարն «իրական և տեսանելի փոփոխություններ» է խոստանում

Կենտրոն վարչական շրջանի նորանշանակ ղեկավար Պետրոս Պետոյանը գրել է․

«Սիրելի ընկերներ և հարազատներ, ինձ համար միշտ շատ կարևոր է եղել, թե ինչ միջավայրում եմ ապրում ես և ինչպիսի քաղաքում են մեծանում իմ երեխանները: Միշտ ծայրահեղ հոգատարությամբ և բծախնդրությամբ եմ վերաբերել Երևանին, ակտիվ ու պահանջատեր եմ եղել որպես քաղաքացի ու կարևորել հանրային շահը: 

Երկար տարիներ ստեղծել և ղեկավարել եմ Հայաստանի առաջատար մարքեթինգային հետազոտական ընկերություններից մեկը IMR-International Marketing Research, որը նույնպես ինձ օգնել է լինել իրազեկ՝ մարդկանց կարիքների և խնդրիների առաջնահերթության վերաբերյալ, որոնք ես հնարավորության դեպքում բարձրաձայնել եմ և փորձել շտկել:

Որոշում կայացնելը բարդ էր, բայց ես մի պարզ մոդել ինձ համար ֆիքսեցի, որ եթե ես հիմա իմ աշխատանքային փորձը, կառավարչական հմտությունները, կրթությունը աշխարհայացքը և վերջապես Երևանի նկատմամբ սերն ու հոգատարությունը չներդնեմ ի օգուտ մեր միջավայրի բարելավմանը, ապա հետագայում չեմ կարող լիարժեք պահանջատեր լինել։

Այսպիսով ես ընդունել եմ պարոն Ավինյանի առաջարկը ստանձնելու Կենտրոն վարչական շրջանի ղեկավարի պաշտոնը: 

Ես փորձելու եմ լինել մաքսիմալ հետևողական բոլոր խնդիրներին և անել հնարավորինս, որպեսզի իրական և տեսանելի փոփոխություններ ունենանք:

Ակնկալում եմ բոլոր իմ ընկերների և գործընկերների աջակցությունը այս ճանապարհին, քանի որ կարծում եմ, որ իմ շրջապատում շատ կան իմ պես մտածող և իրենց քաղաքը սիրող մարդիկ:

Կենտրոնի բնակիչներին նույնպես խնդրում եմ լինել մաքսիմալ ակտիվ , քանի որ միայն միասին կկարողանանք լուծել խնդիրները և բարելավել  մեր շրջապատը»: