Վեդի քաղաքում 27-ամյա երիտասարդը մտել է արտադրամաս ու կրակոցներ արձակել (տեսանյութ)

Видео 15 Май, 2020 19:23

Մայիսի 8-ին Վեդի քաղաքի Արարատյան փողոցի քարի արտադրամասում կրակոցներ էին հնչել։ Մի երիտասարդ ինքնաձիգով մտել էր արտադրամաս ու կրակոցներ արձակել 50-ամյա մի տղամարդու ուղղությամբ։ Տարածքային քննչական բաժնում քրեական գործ էր հարուցվել սպանության փորձի հատկանիշներով։ Դեպքի վայրում հայտնաբերված փամփուշտներն ու պարկուճներն առգրավվել և ուղարկվել էին փորձաքննության։ Ոստիկանության Արարատի բաժնի ծառայողները, համագործակցելով մարզային վարչության և այլ ստորաբաժանումների ծառայողների հետ, անցան համալիր օպերատիվ-հետախուզական միջոցառումների իրականացմանը։ Հետևողական աշխատանքի արդյունքում նրանք պարզեցին կրակոցներ արձակած անձի ինքնությունը և անցան նրան հայտնաբերելու միջոցառումներին։ Մայիսի 13-ին Արարատի ոստիկանները օպերատիվ տվյալներ ստացան, որ կասկածվողը Արարատ քաղաքում է։ 27-ամյա երիտասարդը հայտնաբերվեց ու,մեքենայով հանդերձ, բերման ենթարկվեց ոստիկանության Արարատի բաժին։ Նույն օրը խուզարկվեց նրա վարած «Մերսեդեսը»։ Հայտնաբերվեց գործարանային համարով «Մակարով» ատրճանակ՝ լիցքավորված 9 մմ տրամաչափի երկու փամփուշտով։ Բերման ենթարկվածը ձերբակալվել է։ Օպերատիվ-հետախուզական միջոցառումներն ու քննչական գործողությունները շարունակվում են հանցագործության գործիք ինքնաձիգը հայտնաբերելու ուղղությամբ։