Ունեմ ոչ թե 3400, այլ 0.36 բիթքոին, որը հայտարարագրում դոլարի վերածած եմ նշել. Հայկ Սարգսյանի պարզաբանումը հայտարարագրի վերաբերյալ. Tert.am

Общество 13 Июнь, 2020 13:43

ԱԺ «Իմ քայլը» խմբակցության պատգամավոր Հայկ Սարգսյանը Tert.am-ի հետ զրույցում անդրադարձել է իր հայտարարագրին, որը, նրա բնորոշմամբ, սխալ է մեկնաբանվել:

«Նշվել է, թե նվեր ստացած առանձնատուն ունեմ, իրականում դա այն առանձնատունն է, որտեղ ես ծնվել եմ, հայրս գնել է դեռ 80-ականներին, երբ ես ծնված չէի: Այսինքն՝ նվեր ստացած առանձնատունը որևէ կապ չունի իմ պաշտոնի կամ պաշտոնավարման հետ»,- նշեց նա:

Հարցին՝ ինչո՞ւ է հիմա նա հայտարարգրել, Սարգսյանը պարզաբանեց. «Հայտարարագրի մեջ պետք է նշեմ՝ ունե՞մ անշարժ գույք, թե չունեմ, ես հայտարարագրի մեջ նշել եմ անշարժ գույք: Այնտեղ գրված է աղբյուրը, ես նշել եմ նվիրատվություն: Նվիրատվությունով հորեղբայրս այդ տունը փոխանցել է ինձ, բայց դա չի նշանակում, որ ես նվեր եմ ստացել նոր առանձնատուն, մեր տունը, որը 30-40 տարի մենք ունենք ուղղակի դարձել է իմ անունով: Դա է իրականում տեղի ունեցել»:

«Ինչ վերաբերում է նկարներում շրջանառվող մեքենային, դա որևէ կապ չունի իմ հայտարարագրած մեքենայի հետ: Իմ հայտարարգրում նշված մեքենան 2005 թվականի արտադրության E կլասի մեքենա է, որը մենք ունենք դեռևս 2009 թվականից»,- ասաց պատգամավորը:

Ինչ վերաբերում իր հայտարարագրած բիթքոինին, Սարգսյանն ասաց՝ այդ բիթքոինը ինքը չի գնել: «Դեռևս 2017 թվականից ունենք բիթքոին արտադրող սարքավորումներ, իրենք արտադրում են օրեկան շատ քիչ՝ 0.0000 բիթքոին, դա կուտակվում է և ընթացքքում կարողանում ես վաճառել: Այս պահին ունեմ մոտավոր 0.36 բիթքոին: Հայտարարագրում դա վերածել եմ դոլարի և նշել, որ ունեմ 3400 դոլարի բիթքոին: 0.36 բիթքոինը վերածում ես դոլարի այսօրվա կուրսով ստացվում է 3400 դոլար»,- ասաց նա: