Անցած հաղթանակը մեր արժեհամակարգի շնորհիվ էր, որը ազգային էր և հայրենասիրական. Գագիկ Մանասյան

Երբ վերլուծում ենք մեր անցած տարիները` հասկանում ենք, որ մեր պետության մեջ վերափոխվել կամ ավելի ճիշտ ձևախեղվել են հոգևոր արժեքները: Այս մասին այսօր կայացած ասուլիսին ասաց Հայաստանի մտավոր սեփականության պաշտպանության ֆեդերացայի նախագահ Գագիկ Մանասյանը:

Նա առաջ է քաշում այն վարկածը, որ հասարակական կյանքը կարծես կառուցվել է ոչ թե ազգային մշակութային արժեքների հիման վրա, այլ առևտրավաշխառուական հարաբերությունների վրա. «Առևտրավաշխառուական հոգեբանությունը մտել է մեր կենցաղ և մեր հոգեբանության մեջ մենք կորցրել ենք մեր արժեհամակարգը: Ես պետք է նաև արձանագրեմ, որ անցած հաղթանակը, որ մենք ունեցել ենք, պատճառաբանվում է նրանով, որ մենք ունեցել ենք մի արժեհամակարգ, որը ազգային էր և հայրենասիրական և, որ ամենակարևորն էր` կար արդարարության սկզբունքը»,- ընդգծեց  Գագիկ Մանասյանը:

Նա այն կարծիքին է, որ այդ արժեհամակարգը մեզ ուղեկցեց մեր անկախության 1-2 տարիներին, այնուհետև, քիչ-քիչ այդ արժեհամակարգը 30 տարիների ընթացքում դարձավ ձևախեղված. «Այդ ընթացքում կորցրել ենք այն արժեքները, որոնք մեզ կարող էին օգնել ցանկացած իրավիճակում: Մենք լիարժեքորեն չենք օգտագործել մեր մտավոր կարողությունները, այսօր էլ կան հարյուրավոր ինտելեկտուալ մարդիկ, որոնք դուրս են հանրային կյանքից, որոնք գտնվում են կյանքի լուսանցքներում և չունեն որևէ ներգործություն մեր հասարակական-քաղաքական մտավոր կյաքնում»,- նշեց նա:

Գագիկ Մանասյանը խոսեց նաև իրենց հետագա ծրագրերի մասին՝ նշելով, որ մեծ ծրագրեր ունեն կապված Վրաստանի հետ. «Մենք մտածում ենք Վրաստանի հետ ստեղծել շատ սերտ հարաբերություններ, նույնիսկ՝ պետություններ առանց սահմանների, պետություններ, որոնց հարաբերությունները կհիմնվեն քրիստոնեական արժեքների և սկզբունքների վրա: Կարծում եմ, որ Վրաստանի հնարավորությունները՝ ճանապարհային, ծովային, մենք կարող ենք լավագույնս օգտագործել»,- նշեց բանախոսը: