«Ամբողջ օրը մղկտալով ման եմ գալիս, բայց քեզ չեմ գտնում, ի՛մ հերոս բալա». Հրանտ Չիլինգարյանի ծնունդը Եռաբլուրում են շնորհավորում (տեսանյութ)

Պատերազմում անմահացած Հրանտ Չիլինգարյանը այսօր՝ մարտի 30-ին, կդառնար 20 տարեկան: Հերոսի հարազատները նրան շնորհավորելու էին եկել Եռաբլուրում, տորթ, մոմեր ու ծաղիկներ էին բերել:

Հերոսի մայրը չի կարողանում զսպել արցունքները, չի համակերպվում իրականության ու անդառնալի ցավի հետ:

«Ա՛յ կյանքիդ մեռնեմ, ա՛յ համով բալա, ա՛յ հարգված բալա, բոլորի կողմից սիրված բալա՛: Բոլորը քո լույսով ապրում էին, ցա՛վդ տանեմ, ով զանգում էր, առաջին հերթին քեզնից էր հարցնում, ցավդ տանի մաման: Հերդ, որ մի քիչ նեղված էր լինում, ասում էիր՝ պա՛պ ջան, ոչինչ, անցողիկ բան է, լավ է լինելու: Տես՝ ինչ է դարձել, էս ինչ ես արել, Հրա՛նտ, էս ինչ բերեցիր մեր գլխին, Հրա՛նտ»:

Մայրը որդուն փնտրում է ամենուր, նրան նորից տեսնելու հույսը չի կորցնում. «Ամբողջ օրը մղկտալով ման եմ գալիս, բայց քեզ չեմ գտնում, ցա՛վդ տանեմ, բա ես որտե՞ղ ման գամ...  Ես քեզ եմ ուզում, բալե'ս, ուզում եմ տուն գաս: Ասա՝ ինչ անեմ, ի՛մ Հրանտ բալա, ի՛մ հերոս բալա»:

Հրանտը կռիվ է մղել Մատաղիսում, հերոսաբար մարտնչել է մինչև վերջ, զոհվել՝ ԱԹՍ-ի հարվածից. «Հրանտը զոհվել է հոկտեմբերի 14-ին, կռիվ են մղել 52 հոգով, 10-ը վիրավորվել են, 40-ը՝ զոհվել: Զոհվելու մասին լուրը կամավոր ընկերներից ենք իմացել, դին ուշ ենք գտել՝ ԴՆԹ թեստավորման միջոցով»,- ԼՈՒՐԵՐ.com-ի հետ զրույցում ասաց Հրանտի դասղեկ Հերմինե Թադևոսյանը:

Հրանտը, որ բանակ էր զորակոչվել 2019 թվականի հուլիսի 9-ին, խոհարար էր, սովորել էր Երևանի N1 արհեստագործական պետական ուսումնարանում: Հերոսին հետմահու պատվոգիր է շնորհվել:

«Հրանտը եղել է ուշիմ, խելացի, դաստիարակված, պարզ ու շիտակ, ընկերասեր, սիրված ու հարգված էր բոլորի կողմից և փոխադարձաբար հարգել ու սիրել է նրանց: Մեծ ձգտում ուներ ու հասնում էր իր նպատակին, որոշ ժամանակ, մինչև բանակ գնալը, աշխատեց: Բանակ է գնացել մեծ հպարտությամբ, միշտ զանգում էր, բոլորիս հիշում, բոլորիս հանդեպ հոգատար էր ու ուշադիր»,- ընդգծեց Թադևոսյանը:

Հարազատների միակ սփոփանքը լրատվամիջոցների միջոցով իրենց տղայի ու նրա հերոսությունների մասին պատմելն է:

Արփինե Հակոբյան

Այս թեմայով Զոհված հերոս Մխիթար Գալեյանի ընտանիքը կանգնած է Սրբազանի կողքին (տեսանյութ) Բաքվում բացվել է «Արևմտյան Ադրբեջան հեռուստատեսության» շենքը․ Monument Watch-ը ահազանգում է Պիտի կտրես այն ձեռքը, որ ստորագրել է՝ Արցախն Ադրբեջան է. Տեր Հովհաննես (տեսանյութ) Մենք հայրենիք ունենք փրկելու. գոյության խնդիր է արդեն. Արցախում նահատակված Հայկազ Մկրտչյանի մայր (տեսանյութ) Վիրահատությունից դեռ չապաքինված` նահատակ հերոս Արամ Ղուլարյանի հայրը` Վազգենը, եկել է միանալու երթին (տեսանյութ) Զոհված հերոսի մոր կոչը հանրությանը Ռուսաստանը ցանկանում է իր սահմանապահներին տեղակայել Հայաստան-Ադրբեջան սահմանին. Թոմաս դը Վաալ Այս երթը մեզ տալու է երկու բան՝ պատիվ և հայրենիք․ Բագրատ Սրբազան (տեսանյութ) Այս շարժումը հայրենիք ունեցողներինն է՝ զերծ որևէ գույնից ու կողմից, սա գողացված ուրախության շրջան է Ադրբեջանում երկրաշարժ է տեղի ունեցել