Հայաստանի իշխանությունները հետևողաբար քայքայել են Հայաստանի ԶՈՒ մարտունակությունը. Քոչարյան

Վերջին երեք տարվա ընթացքում հետեւողաբար քայքայվել է Հայաստանի ԶՈՒ մարտունակությունը: Այդ մասին հայտարարել է Հայաստանի երկրորդ նախագահ Ռոբերտ Քոչարյանը «Պոզներ» հաղորդման եթերում:

Նախկին նախագահը հիշեցրել է, որ բոլոր փորձագետների կարծիքով՝ հայկական բանակն առավել մարտունակ բանակն է Հարավային Կովկասում:

«Նոր իշխանությունը 2018 թվականի իրադարձություններից հետո ունեցել է պաթոլոգիական վախ եւ անվստահություն բանակի նկատմամբ, մի շարք պատճառներով, այդ իշխանության մարդիկ չեն ծառայել, բանակին չեն վստահել, վախեցել են,  ընթացել է առաջին ղարաբաղյան պատերազմի հերոսներին որակազրկելու գործընթաց, սկսվել է դատավարություն Մարտի 1-ի գործով, այսպես կոչված` կոռուպցիոն գործեր, որոնցում չեն բացահայտվել կոռուպցիոն տարրեր»,-ասել է Ռոբերտ Քոչարյանը` նշելով. որ 2,5 տարում փոխվել է 3 ԳՇ ղեկավար եւ Պաշտպանության բանակի 3 հրամանատար:

Պատասխանելով հարցին՝ արդյո՞ք ընդմիշտ են հանձնվել հողերը, նախկին նախագահը նշել է, որ չէր պնդի, որ ամեն ինչ կորած է: Նրա խոսքով՝ կա հնարավորություն, առնվազն բանակցային գործընթացում, քննարկել ԼՂԻՄ-ի կազմում ընդգրկված տարածքների հարցը: Նախկին նախագահն ընդգծել է, որ դա բարդ գործընթաց է, սակայն հնարավորություններ կան:

Ինչ վերաբերում է ռեվանշին, ապա, նա փաստել է, որ խոսքը չի վերաբերում ռեվանշին, սակայն հավերժ չափազանց անարդար չի կարող լինել աշխարհը: «Եթե ցանկանում ենք վերջ տալ հակամարտությանը, պետք է լուծում գտնել, որը կընկալվի արդարության տեսանկյունից բավականաչափ ըմբռնումով»,-նշել է Ռոբերտ Քոչարյանը: