Սահմանամերձ Նռնաձոր գյուղում նոր թաղամաս կկառուցվի
Общество
Այսօր տեղի է ունեցել Նռնաձոր գյուղում կառուցվող նոր թաղամասի երկու առանձնատների հիմնարկեքի արարողությունը: Միջոցառմանը մասնակցում էին Սյունիքի համայնքապետեր, համայնքի վարչական ղեկավարներ, ավագանիների անդամներ, համայնքապետարանի ներկայացուցիչներ և գյուղի բնակիչներ:
Հիմնադրամի հոգաբարձուների խորհրդի նախագահ Արմեն Սաքապետոյանը ողջունել է ներկաներին և ներկայացրել ծրագրի շրջանակներում նախատեսվող աշխատանքները: Թաղամասի կառուցումն իրականացվում է վերջերս հիմնադրված «Մեղրիի զարգացման հիմնադրամի» կողմից: Ֆինանսավորումն իրականացվում է բարերարների միջոցներով:
Ծրագրով նախատեսվում է կառուցել 30 անհատական բնակելի առանձնատների թաղամաս՝ նախատեսված պատերազմի հետևանքով Արցախից տեղահանված բնակիչների համար: Օրերս հաջողությամբ ավարտվել են գեոդեզիական և հողահարթեցման աշխատանքները և արդեն իսկ մեկնարկել են երկու տների կառուցման աշխատանքները։
Սյունիքի բարեգործական հիմնադրամի տնօրեն Գուրգեն Գրիգորյանն իր խոսքում նշել է. «Ծրագիրն այսքանով չի սահմանափակվում, մեր հեռահար նպատակների շրջանակներում է ընդգրկված ամբողջ Մեղրի համայնքը: Բոլորս քաջ գիտակցում ենք, որ հայրենիքն սկսվում է սահմանից և հենց դրանով էր պայմանավորված, որ ընտրեցինք հայրենիքի վերջին, սահմանամերձ համայնքը՝ շենացնելու, նոր շունչ հաղորդելու ու վերաբնակեցնելու համար»:
Մեղրի համայնքի ղեկավար Մխիթար Զաքարյանը շնորհակալական խոսք է հղել հիմնադրամին՝ իրենց աջակցությունն ու զորակցությունը ցուցաբերելու համար, ինչի արդյունքում Նռնաձորը՝ հարավարևելյան ուղղության առաջին սահմանամերձ գյուղը, կվերաբնակեցվի և նոր շունչ կստանա:
Նռնաձոր բնակավայրի ղեկավար Ալիկ Բոյաջյանը նույնպես շնորհակալանքի խոսք է ուղղել ծրագրի աջակիցներին՝ նմանօրինակ նախաձեռնությամբ Արցախի մեր հայրենակիցներին սատար կանգնելու և գյուղը շենացնելու համար:
Միջոցառման ավարտին տեղի է ունեցել առաջին երկու առանձնատների հիմնարկեքի արարողությունը: Տարածաշրջանի հոգևոր հայր տեր Ռաֆայելի ձեռամբ օծվել են նոր կառուցվող առանձնատների հիմնաքարերը:
Самое популярное 
В Норатусе за сутки погибли двое мужчин – вследствие взрыва и огнестрельного ранения
