Ուշադրություն․ հուլիսի 1-ից կարող եք տեսա-լուսանկարահանել վարորդների խախտումները և ուղարկել ոստիկանություն

Общество 29 Июнь, 2021 17:45

Հուլիսի 1-ից ուժի մեջ կմտնի և կգործի երթևեկության կանոնների խախտումները բջջային հավելվածով տեսա-լուսանկարահանելու և հաղորդում տալու կարգը: Փաստորեն, այսուհետ վարորդների խախտումները կարձանագրեն ոչ միայն տեսախցիկները և տեսուչները, այլև դրանք նկատած սովորական քաղաքացիները։ Վերջիններս բջջային հավելվածի միջոցով կարող են արձանագրել իրենց համար տեսանելի 12 տեսակի իրավախախտում՝ հանդիպակաց երթևեկության գոտի դուրս գալը, կանգառի կայանման կանոնները խախտելը, լուսացույցի ազդանշանին չենթարկվելը, ավտոմեքենայից աղբ նետելը և այլն: Հեռախոսով հնարավոր կլինի արձանագրել առավել հաճախ հանդիպող այս խախտումները և հատուկ հավելվածով դրանք ուղարկել ՃՈ մասնագետներին։

Ուսումնասիրելով համացանցային քննարկումները պարզ է դառնում՝ ՃՈ-ում կարծում են, որ նոր մեխանիզմը կսթափեցնի և լրացուցիչ զսպաշապիկ կդառնա իրավախախտ վարորդների համար, սակայն երթևեկության փորձագետների սպասելիքներն այնքան էլ մեծ չեն այս մեխանիզմից և փոքր-ինչ թերահավատ են։ Վերջիններս գտնում են, որ քաղաքացիներին «գործ տվող են սարքում»։

Իսկ խախտումներն արձանագրելու և այն ՃՈ մասնագետներին ուղարկելու համար նախ պետք է ներբեռնել համապատասխան հավելվածը։ Այնուհետև «Տեսանկարահանում» բաժինն ընտրելու դեպքում բացվող պատուհանում սկսում է տեսանկարահանել նկատված խախտումը։ Տեսանյութերի տևողությունը չի կարող գերազանցել 30 վայրկյանը, բացառությամբ տրանսպորտային միջոցների վարորդների կողմից կանգառի և կայանման կանոնները խախտելու դեպքերի, որոնց դեպքում տեսանյութի տևողությունը 61 վայրկյան է։ Ավարտելուց հետո օգտատերն ընտրում է խախտման տեսակը, խախտումների ցուցակից, ինչպես նաև մուտքագրում խախտումը կատարած տրանսպորտային միջոցի հաշվառման համարանիշը (ոչ պարտադիր): Համապատասխան գործողությունները կատարելուց հետո 3 րոպեի ընթացքում օգտատերը ստեղծված նյութը կարող է ուղարկել խախտումների արձանագրման կենտրոն։

«Լուսանկարահանում» բաժինը ընտրելու դեպքում բացվող պատուհանում սկսում է լուսանկարել նկատված խախտումը, բայց ոչ ավելի, քան 5 լուսանկար: Ավարտելուց հետո օգտատերն ընտրում է խախտման տեսակը, խախտումների ցուցակից, ինչպես նաև խախտումը կատարած տրանսպորտային միջոցի հաշվառման համարանիշը (ոչ պարտադիր): Համապատասխան գործողությունները կատարելուց հետո, 1 րոպեի ընթացքում օգտատերը որոշում է կայացնում նյութն ուղարկել խախտումների արձանագրման կենտրոն կամ ոչ։

Նկատենք, որ լուսանկարում կամ տեսանյութում խախտումը կատարած տրանսպորտային միջոցի հաշվառման համարանիշի ընթեռնելիությունը պարտադիր է և այն չնույնականացնելու դեպքում վարչական տույժ նշանակելու մասին որոշման կայացումը մերժվում է։ Սահմանված ժամկետում նյութը չուղարկելու դեպքում գործընթացը դադարեցվում է, իսկ արձանագրված նյութը ջնջվում է։

Հիշեցնենք, որ երթևեկության խախտումները տեսա-լուսանկարահանելու և ոստիկանություն ուղարկելու մասին որոշումն ընդունվել է 2020 թվականի հունիսի 11-ին կառավարության նիստում: Նախագիծը հեղինակել է իշխանական «Իմ քայլը» խմբակցության պատգամավոր Սիսակ Գաբրիելյանը։

Սոնա Հարությունյան