Մենք ժամանակին քննադատել ենք ոչ թե թիմակցի, այլ քննիչի աշխատասենյակում երկրի ղեկավարի նկարը փակցնելը. Հրաչյա Հակոբյան
ВидеоՄենք ժամանակին քննադատել ենք ոչ թե գործադիրի ղեկավարի նկարն օրինակ՝ իր թիմակցի սենյակում փակցնելու համար, այլ շատ կոնկրետ դեպքով, երբ երկրի ղեկավարի նկարը փակցված է եղել քննիչի աշխատասենյակում։ Այս մասին «Ազատություն» ռադիոկայանի «Կիրակնօրյա վերլուծականի» եթերում ասել է իշխող «Քաղաքացիական պայմանագիր» խմբակցության պատգամավոր Հրաչյա Հակոբյանն՝ անդրադառնալով վերջին օրերին սոցկայքերում հայտնված մի լուսանկարի, որից պարզ է՝ ԱԺ իշխանական պատգամավորների սենյակներում փակցված են վարչապետ Նիկոլ Փաշինյանի լուսանկարները։
«Եթե մենք հիմա գնանք ու շրջայց կատարենք օրինակ՝ Քննչական կոմիտեում, ապա վստահ եմ, որ որեւէ քննիչի սենյակում մենք չենք տեսնի վարչապետի նկարը։ Նիկոլ Փաշինյանը մեր քաղաքական առաջնորդն է եւ յուրաքանչյուրն ինք է որոշում՝ Հայաստանի խորհրդանիշերի՝ գերբի, դրոշի հետ կփակցնի՞ նաեւ վարչապետի նկարը։ Կրկնում եմ՝ որեւէ քննիչի, ոստիկանի աշխատասենյակում նման բան չենք հանդիպի»,- ասել է պատգմավոր Հրաչյա Հակոբյանը։
Հարցին՝ նորմա՞լ է, եթե խորհրդարանի նախագահն իր սենյակում փակցնի Նիկոլ Փաշինյանի լուսանկարը, իշխող ուժի պատգամավորն ասել է, որ ինքը եղել է Ալեն Սիմոնյանի աշխատասենյակում եւ այնտեղ չի տեսել վարչապետի նկարը։
Հրաչյա Հակոբյանը հավելել է, որ Փաշինյանի լուսանկարը փակցնելը պարտադրանք չէ։
Նշենք՝ մի քանի օր առաջ լուսանկար տարածվեց համացանցում, որտեղ ԱԺ Պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանի սենյակում կախված էր վարչապետ Նիկոլ Փաշինյանի լուսանկարը։
Հիշեցնենք՝ տարիներ առաջ, երբ Նիկոլ Փաշինյանը պատգամավոր էր, ԱԺ ամբիոնից տարբեր առիթներով անդրադարձել էր Հայաստանի երրորդ նախագահ Սերժ Սարգսյանի լուսանկարը պաշտոնյաների աշխատասենյակներում փակցնելուն եւ օրինակ բերելով դատախազներին ու քննիչներին ասել էր՝ «նկարը մշտական կապի խնդիր ա, ամեն օր իրիկունները զեկուցում են, առավոտները հրահանգ են ստանում»։
2018թ․-ին իշխանության գալով, Փաշինյանը հրահանգել էր բոլոր աշխատասենյակների պատերից հանել նկարները եւ հայտարարել, որ այլեւս ՀՀ ղեկավարների նկարները պաշտոնյաների աշխատասենյակների պատերին չի լինելու։
Самое популярное 
Баграт Галстанян: Мы зафиксировали первую победу
