Fact check. Անահիտ Ավանեսյանը գնում է «վա-բանկ». օրենքի նոր խախտում՝ հանուն պատվաստման

Аналитический 8 Октябрь, 2021 19:21

Այս տարվա դեկտեմբերից չպատվաստված, բայց կորոնավիրուսով վարակված քաղաքացիների բուժումը կարող է դառնալ վճարովի: Այդ դեպքում կորոնավիրուսով վարակված քաղաքացիների բուժումը կարող է շուրջ 800 հազար դրամ արժենալ՝ ավելի կամ պակաս՝ կախված պացիենտի վիճակից:

«Ում մոտ որ հիվանդության ընթացքը թեթեւ է, նաեւ դեղորայքի օգտագործման տեսանկյունից միջամտության կարիք շատ չի լինում, եւ բուժման ծախսը 800 հազար դրամից քիչ է լինում, բայց կան քրոնիկ հիվանդություններ ունեցող բազմաթիվ հիվանդներ, որոնց մոտ բազմապրոֆիլ բուժում է կատարվում»,- պարզաբանել է ԱՆ խոսնակը:

Հասկանալի է, որ ԱՆ փորձում է շուտափույթ կերպով կյանքի կոչել վարչապետի հրամանը և պատվաստել այն ամենը, ինչ շարժվում է, իսկ ինչը չի շարժվում՝ շարժել ու պատվաստել: Եվ վաղուց արդեն էական չէ, որ այդ հրամանները կատարելու ընթացքում խախտվում են ՀՀ օրենքները և սահմանադրությունը: Դիցուք՝ ՀՀ Սահմանադրության 85-րդ հոդվածի 1-ին մասի համաձայն՝ «Յուրաքանչյուր ոք, օրենքին համապատասխան, ունի առողջության պահպանման իրավունք»: Փաստացի, եթե դու չունես 800 հազար դրամ քո գրպանում, հետևաբար ի վիճակի չես լինելու պահպանել առողջությունդ: Այսինքն՝ խախտվում է Սահմանադրության համապատասխան հոդվածը:

«Բնակչության բժշկական օգնության և սպասարկման մասին» ՀՀ օրենքի 13-րդ հոդվածի 1-ին մասի համաձայն՝ «Յուրաքանչյուր ոք, անկախ ազգությունից, ռասայից, սեռից, լեզվից, դավանանքից, տարիքից, առողջական վիճակից, հաշմանդամությունից, քաղաքական կամ այլ հայացքներից, սոցիալական ծագումից, գույքային կամ այլ դրությունից, Սահմանադրությամբ, սույն օրենքով և այլ օրենքներով, ինչպես նաև Հայաստանի Հանրապետության միջազգային պայմանագրերով սահմանված կարգով ունի բժշկական օգնություն և սպասարկում ստանալու իրավունք»:

Ի վերջո, գոյություն ունի պետության կողմից երաշխավորված անվճար և արտոնյալ պայմաններով բժշկական օգնություն և սպասարկում ստանալու իրավունք ունեցող բնակչության` սոցիալապես անապահով ու առանձին (հատուկ) խմբերի ցանկ. ինչպե՞ս են վարվելու այդ ցանկում ներկայացված քաղաքացիների հետ, եթե վերջիններս պատվաստված չլինելով հանդերձ՝ վարակվեն կորոնավիրուսով, նրանք բուժվելու են սեփական գրպանի՞, թե՞ պետության հաշվին: Սրանք հարցեր են, որոնց պատասխանները չկան: