Մարտիրոսյանը խոսել է մանկության տարիներին ընտանիքի ծանր վիճակի մասին

Հումորիստ և հեռուստահաղորդավար Գարիկ Մարտիրոսյանը պատմել է երիտասարդության տարիներին ընտանիքի ծանր ֆինանսական վիճակի մասին: YouTube-ում ստենդափ արտիստ Դմիտրի Ռոմանովի հետ զրույցում կատակերգուն խոստովանել է, որ մանուկ հասակում ընդհանրապես փող չի ունեցել։ Մարտիրոսյանի խոսքով՝ իր ընտանիքը մինչև 90-ականների կեսերն ապրել է աղքատության մեջ:

Ռոմանովը զրուցակցին հարցրել է, թե փողի նկատմամբ ինչպիսի վերաբերմունք կա կատակերգուի ընտանիքում, և ինչպես է նա վերաբերվում ֆինանսներին։ «Սա շատ տխուր պատմություն է, քանի որ իմ մանկության տարիներին ես փող չունեի։ Այստեղ խոսքը միայն տարիքի մասին չէ, երեխաների մոտ գործնականում փող չի լինում։ Բայց ես նույնիսկ խնայատուփ չունեի, որում մետաղադրամներ են լինում»,- պատասխանել է Մարտիրոսյանը։ Հումորիստը պարզաբանել է, որ իր ընտանիքը խնայողություններ չի ունեցել։

1974 թվականին ծնված կատակերգուի խոսքով` ֆինանսական ծանր վիճակը պահպանվել է մինչև 90-ականները։ «Մինչև 1993 թվականը մենք ապրում էինք բավականին ծանր պայմաններում, այն ժամանակ Հայաստանում սարսափելի տնտեսական վիճակ էր։ <...> Հիշում եմ, թե ինչպես հացի, ծխախոտի համար նույնիսկ կտրոններ կային, մարդիկ հերթեր էին կանգնում, իսկ հացն անգամ քիչ էր»,- հիշում է հումորիստը։ Մարտիրոսյանը հայտարարել է, որ այն ժամանակ կյանքը նման էր գոյատևման:

Կատակերգու դերասանն ավելացրել է, որ իր առաջին եկամուտը ստացել է հյուրախաղերից, իսկ ավելի լուրջ եկամուտը՝ հեռուստատեսությունում աշխատելու ընթացքում։ «Ես արժանապատիվ գումար ստացա, երբ սկսեցինք աշխատել Իգոր Ուգոլնիկովի «Լավ երեկո» շոուի վրա` СТС ալիքով», - ասել է նա: