ՀՀ ԿԳՄՍ նախարարությունը դիպլոմներ շնորհեց հանրապետական օլիմպիադայի առաջին կարգի 78 մրցանակակրի

Наука и культура 26 Апрель, 2022 16:57

Հայաստանի Հանրապետության կրթության, գիտության, մշակույթի և սպորտի նախարարությունն ապրիլի 26-ին դիպլոմներ հանձնեց դպրոցականների հանրապետական օլիմպիադայի առաջին կարգի մրցանակակիրներին: Դիպլոմների արժանացավ 78 աշակերտ:

ՀՀ ԿԳՄՍ նախարար Վահրամ Դումանյանը, ողջունելով մրցանակակիրներին, նշեց՝ օլիմպիադաներին մասնակցելն ու հաջողություններ գրանցելը ժամանակի ընթացքում վերածվում է ապրելակերպի ու հետաքրքրացնում է կյանքը: «Դա դրական իմաստով հիվանդություն է, որով ես ինչպես առաջ, այնպես էլ հիմա վարակված եմ: Օլիմպիադաներին մասնակցելու և հաղթելու համար մտքի սրություն, սպորտային կամք է հարկավոր»,-նշեց նախարարն ու աշակերտներին հորդորեց մշտապես մեծարել, հարգել, սիրել իրենց ուսուցիչներին, քանի որ նրանց ջանքերի շնորհիվ են հասնում հաջողության:

Նախարարի տեղակալ Ժաննա Անդրեասյանն էլ տեղեկացրեց՝ կան նաև երկրորդ և երրորդ կարգի դիպլոմակիրներ, որոնց պարգևատրումը տեղի կունենա նրանց դպրոցներում:

Նրա խոսքով՝ 16 առարկայական օլիմպիադա է կազմակերպվում և 5-րդ դասարանից աշակերտները կարողանում են մասնակցել: Սկզբում դպրոցական փուլն է, հետո՝ տարածքային, այնուհետև՝ հանրապետական: «Յոթ առարկայի գծով մասնակցելու ենք միջազգային օլիմպիադաների: Վերջին մի քանի տարում ավելի քան քառասուն մեդալ ենք նվաճել միջազգային օլիմպիադաներում: Այս տարի կենսաբանության միջազգային օլիմպիադան է Հայաստանում անցկացվելու: Հուսամ՝ լավ արդյունքներ կգրանցենք»,-շեշտեց փոխնախարարը:

Շուշիի Դանիել Ղազարյանի անվան դպրոցի իններորդ դասարանի աշակերտ Մհեր Համբարձումյանը, որը հաղթել էր «Հայոց պատմություն» առարկայից, ասաց, որ հայոց պատմությունն իրեն միշտ է հետաքրքրել: Նա կարծում է, որ հայոց պատմությունն ուսումնասիրելով՝ հայ ժողովուրդը ճիշտ ճանապարհի վրա կկանգնի: «Օլիմպիադայի ամենադժվար փուլը դպրոցականն էր: Իններորդ դասարանից մասնակցել է 21 հոգի, թեստը բաղկացած էր 40 հարցից, և ես 30 միավորից 27,5 միավոր եմ վաստակել»,-պատմեց Մհերն ու տեղեկացրեց, որ իրենց դպրոցն այժմ գործում է Ստեփանակերտում:

Երևանի թիվ 119 ավագ դպրոցի 12-րդ դասարանի աշակերտ Էդուարդ Երիցյանը հաղթել է «Ֆրանսերեն» առարկայից: Նա երկրորդ անգամ է մասնակցում օլիմպիադային և խոստովանում է, որ այս անգամվա հիմանական բարդությունը եղել է ոչ թե լեզվական, այլ մշակութային, որովհետև հարցաշարի վերջին հարցերը վերեբերել են Ֆրանսիայի և ֆրանկոֆոն աշխարհի մշակույթին, պատմությանը:

Նա որոշել է կրթությունը շարունակել Ֆրանսիայում ու նշում է, որ օլիմպիադաներում հաջողության հասնելն իմացության առումով բարձրացնում է ինքնավստահությունը, բացի այդ այլ երկրներում պետական օլիմպիադաներում հաղթանակը ձեռքբերում է համարվում: