«Անկոշիկ կոշկակարները». Փաշինյանի «պրոֆեսիոնալ» կադրերը բարձրագույն կրթություն չունե՞ն

Аналитический 27 Май, 2022 20:37

Հեղափոխությունից անմիջապես հետո Նիկոլ Փաշինյանը հանդես եկավ հայտարարությամբ, որ իր թիմում չեն լինելու ոչ պրոֆեսիոնալ կադրեր, որ Հայաստանի ճակատագիրը այսուհետ կախված է լինելու միայն ու միայն իրենց գործի գիտակ մասնագետներից, իսկ նախկինների՝ յուրայիններին ամեն գնով պաշտոնի դասավորելու թայֆայական սկզբունքը միանշանակորեն մերժվելու է: Իշխանափոխությունից չորս տարի անց կարող ենք փաստել, որ պետական ապարատում որակյալ կադրերի մասին հպարտ քաղաքացիներին մնում է երազել, քանի որ նրանցից նույնիսկ ոչ բոլորն ունեն բարձրագույն կրթություն:

Դիցուք՝ մամուլը գրել էր, որ Սահմանադրական փոփոխությունների տխրահռչակ նախագծի հեղինակ, իշխանական «Իմ քայլը» ֆրակցիայի պատգամավոր Վահագն Հովակիմյանը, փաստորեն, պարզվում է, ոչ միայն իրավաբան չէ, բայց ԱԺ Պետաիրավական հանձնաժողովում լուրջ-լուրջ նախագծեր է ներկայացնում ու հիմա էլ երկիրը փոթորկած նախագծի հարակից զեկուցող է, այլև առհասարակ չունի բարձրագույն կրթություն: Այսպես, ըստ parliament.am կայքում տեղադրված պատգամավորի կենսագրության, նա 1991-1993թթ. սովորել է ԵՊՀ ռադիոֆիզիկայի ֆակուլտետում: 1996-2000թթ.՝ ԵՊՀ փիլիոսոփայության, սոցիոլոգիայի, հոգեբանության և քաղաքագիտության ֆակուլտետում: Ինչպես նկատելի է, Վահագն Հովակիմյանը երկու ֆակուլտետի անուն է նշել: Իր նշած 1-ին ֆակուլտետում նա սովորել մեկ տարի, իսկ այն, ինչ նշել է՝ որպես երկրորդ ֆակուլտետ, առհասարակ այդ անունով ֆակուլտետ չկա: Ճիշտ է` հետո մամուլը գրեց, որ Հովակիմյանին մեկ օրում հաջողվել էր բարձրագույն կրթությունը հաստատող փաստաթուղթ հայթայթել:

Ինչպես գիտենք՝ իշխող խմբակցության պատգամավոր Անուշ Բեղլոյանը վայր է դրել պատգամավորական մանդատը: Նրան փոխարինելու է «Իմ քայլը» խմբակցության ավագանու անդամ Գայանե Եղիազարյանը: Պարզվում է՝ Գայանե Եղիազարյանը չունի բարձրագույն կրթություն: Ավարտել է՝ Երևանի թիվ 175 դպրոցը, դրանից հետո՝ աշխատանքի անցել Երեւանի Հաստոցաշինական գործարանին կից գործող բնական քարերի արտադրամասում, ապա «Նարեկ» լիակատար տնտեսական ընկերությունում, այնուհետեւ` «Նարեկ Տոպազ» ՍՊԸ-ում՝ որպես որակի պատասխանատու:

Բառացիորեն վերջերս մանդատ ստացավ ոմն Հռիփսիմե Հունանյանը, որը ևս չունի բարձրագույն կրթություն, նա էլ մասնագիտությամբ բուժքույր է:

Մալաթիա Սեբաստիայի նախկին թաղապետ Դավիթ Կարապետյանը, կարծես թե, նույնպես չունի բարձրագույն կրթություն և հետևաբար նաև Հանրային ծառայության մասին օրենքով չունի այդ պաշտոնը զբաղեցնելու իրավունք։ (Հավանաբար այս է պատճառը, որ վերջինիս կենսագրականը բացակայում էր քաղաքապետարանի կայքից)։

Ավան վարչական շրջանի նորանշակ փոխթաղապետ Ջուլիետա Ազարյանն ընդհանրապես վոկալի մասնագետ է։

Մամուլը գրել էր, որ, կարծես թե, բարձրագույն կրթություն չունի նաև Սյունիքի արդեն նախկին մարզպետ Մելիքսեթ Պողոսյանը։

Լոռու մարզպետարանի Քաղաքաշինության վարչությունում խորհրդատու է նշանակվել Լոռու մարզպետ Անդրեյ Ղուկասյանի նախկին խորհրդական Լեւոն Տեր-Սիմոնյանը, որը, մի քանի ամիս զբաղեցնելով մարզպետի խորհրդականի պաշտոնը, աշխատանքից ազատվեց այն ժամանակ, երբ պարզ դարձավ, որ չունի բարձրագույն կրթությունը հաստատող դիպլոմ, ինչը պարտադիր պայման էր տվյալ պաշտոնն ստանձնելու համար:

Տեղ համայնքի ղեկավար Դավիթ Ղուլունցի որոշմամբ՝ Կոռնիձորի վարչական ղեկավար է նշանակվել 57-ամյա Լենտուշ Հակոբջանյանը, որը չունի բարձրագույն կրթություն։

Ինչպես տեսնում ենք՝ Փաշինյանն ու ՔՊ-ն չպահեցին անգամ այս խոստումը և առաջնորդվում են ՀՀՇ-ի հայտնի՝ «պոլի փայտ լինի, բայց մերը լինի» սկզբունքով: Իրականում կադրային նման քաղաքականությունը մատնում է առաջին հերթին կադրային սովը, որը կար և դեռ առկա է իշխող քաղաքական ուժի մոտ: