«Քոչարյա՛նն էլ, Սարգսյա՛նն էլ, ՀՅԴ-ն էլ Արցախը ճանաչել են Ադրբեջանի մաս»․ Փաշինյանը ապացույցներ ներկայացրեց

«Ռոբերտ Քոչարյանի օրոք՝ 1998-ի նոյեմբերին, երկրի իշխանությունները բանակցում էին այսպես կոչված «Ընդհանուր պետության» նախագծի հիման վրա, որը ենթադրում էր Լեռնային Ղարաբաղի ներկայությունն Ադրբեջանի կազմում». Այս մասին այսօր՝ հունիսի 15-ին, Ազգային ժողովում 2021 թ. պետբյուջեի կատարարողականի ներկայացման ժամանակ ասաց ՀՀ վարչապետ Նիկոլ Փաշինյանը՝ խոսելով ղարաբաղյան կարգավորման բանակցային գործընթացի մասին.

«Հիմա դառնալով ընդդիմություն, իշխանություններին մեղադրում են դավաճանության մեջ։ Եւ նրանից, որ Քոչարյանը, ինչպես իր համախոհները, այդ թվում՝ Դաշնակցությունը, պնդում են, որ Լեռնային Ղարաբաղը երբեք Ադրբեջանի կազմում չի հայտնվի, մեղմ ասած, խորամանկության հոտ է գալիս։ Նրանք ոչ միայն չէին բացառում, որ Ղարաբաղը կարող է հայտնվել Ադրբեջանի կազմում, այլեւ համաձայնել են բանակցային փաթեթի առանցքային տրամաբանության հետ, ըստ որի՝ Ղարաբաղն ի վերջո պետք է հայտնվի Ադրբեջանի կազմում։ Ավելին, նրանք դրանով իսկ անտեսեցին 1991 թ. սեպտեմբերի 2-ին ընդունված Ղարաբաղի անկախության հռչակագիրը, ինչպես նաեւ նույն թվականի դեկտեմբերի 10-ին կայացած անկախության հանրաքվեն»,- ասաց վարչապետը:

Փաշինյանի խոսքով՝ «Ընդհանուր պետության» գաղափարից հետո բանակցությունների սեղանին հայտնվեց տարածքների փոխանակման հարցը.

«Այդ նախագծի էությունն այն էր, որ Հայաստանը ստանում է Լեռնային Ղարաբաղը, իսկ դրա դիմաց Ադրբեջանին տալիս է Սյունիքի մարզում գտնվող Մեղրիի շրջանը»,- նշեց Փաշինյանը՝ ընդգծելով, որ ըստ այդ տարբերակի քննարկվելու էր Երեւանի համաձայնությունը, որն էլ ըստ էության, անուղղակիորեն նշանակում էր, որ Հայաստանը, թերևս այն ժամանակ, ԼՂ-ն ճանաչում էր Ադրբեջանի կազմում։