Հոգեբանները բացատրել են, թե ինչու են կանայք ավելի քիչ սեքս ուզում, քան տղամարդիկ

Օկլահոմա նահանգի համալսարանի հոգեբանները պարզել են, որ տեստոստերոնի ցածր մակարդակի պատճառով կանայք ավելի քիչ են ցանկանում, քան տղամարդիկ, զուգընկերոջ հետ սեքսով զբաղվել: Հետազոտության արդյունքները հրապարակված են Biological Psychology ամսագրում։

Գիտնականների կարծիքով՝ սեքսի ցանկության այս անհամապատասխանությունը կարող է նպաստել հարաբերություններում խնդիրների առաջացմանը։ Օրինակ, կանանց ցածր սեռական ցանկությունը կանխատեսում է ամուսնական դժգոհություն երկու զուգընկերների համար:

Հետազոտությանը մասնակցել են նորապսակների 48 զույգ: Բոլոր մասնակիցները անցել են ճանաչողական կարողությունների թեստավորում, արական և իգական սեռերի դերերի վերաբերյալ հարցում, նրանք նաև թքի թեստ են հանձնել՝ տեստոստերոնի մակարդակը որոշելու համար:

Այնուհետև կամավորները 14 օր հարցաշար են լրացրել իրենց ամուսնու նկատմամբ ունեցած սեռական գրավչության, ամուսնական բավարարվածության, սթրեսի, ինքնագնահատականի, սեքսի և տրամադրության մասին: Արդյունքները ցույց են տվել, որ տղամարդիկ ավելի ուժեղ սեռական գրավչություն են ունեցել իրենց զուգընկերուհու նկատմամբ, ինչպես նաև տեստոստերոնի բարձր մակարդակ:

«Մենք միաժամանակ ուսումնասիրեցինք կենսաբանական, ճանաչողական և էմոցիոնալ գործոնների դերը սեռական ցանկության մեջ սեռային տարբերությունները բացատրելու հարցում: Պարզվեց, որ տղամարդկանց և կանանց միջև տեստոստերոնի մակարդակի տարբերությունը միակ գործոնն է, որն օգնում է բացատրել տղամարդկանց մոտ բարձր սեռական ցանկությունը», - բացատրել են հոգեբանները:

Ստացված արդյունքները կարող են նշանակություն ունենալ զույգերի սեռական թերապիայի համար: Հետագայում գիտնականները կշարունակեն ուսումնասիրել այն գործոնները, որոնք ազդում են տղամարդկանց և կանանց գրավչության վրա։