Ակնկալում ենք Ռուսաստանից, որ ջանքերն ավելի առարկայական գործադրվեն․ Մարուքյանը՝ Լաչինի միջանցքի փակման մասին

Հայաստանն իր ձեռքի տակ եղած բոլոր գործիքները կիրառել, կիրառում եւ շարունակելու է կիրառել Լաչինի միջանցքի բացման ուղղությամբ, լրագրողների հետ զրույցում հայտարարեց հատուկ հանձնարարություններով դեսպան Էդմոն Մարուքյանը՝ անդրադառնալով Ադրբեջանի կողմից արդեն 26 օր Արցախի շրջափակմանն ու այն վերացնելու ուղղությամբ պաշտոնական Երեւանի ձեռնարկած քայլերին։

«Կառավարությունում փոխվարչապետին կից հումանիտար հարցերով խումբ է ձեւավորված։ Ամեն ինչ արվում եւ արվելու է, որպեսզի բլոկադան, այն ամենը, ինչ Ադրբեջանն անում է Լեռնային Ղարաբաղի հանդեպ, դրա դեմն առնենք։ Հիմա նորություն ունե՞նք՝ ես նորություն չունեմ ասելու՝ կլինի նորություն, կիմանաք այդ մասին։ Խնդիրը դիվանագիտական հարթակներում են քննարվկում, աշխատանքները տարվում են»,- ասաց Մարուքյանը։

Ինչո՞ւ մինչեւ տարեվերջ, ինչպես նախապես հույս էին հայտնում Հայաստանի իշխանությունները, Ադրբեջանի հետ չստորագրվեց խաղաղության պայմանագիրը։ Հայաստանը, Մարուքյանի խոսքով, միջազգային հանրությանն իր կամքն է հայտնել, որ պատրաստ է նման ժամկետներում գնալ պայմանագրի ստորագրմանը, բայց Ադրբեջանն, ըստ նրա, ամեն ինչ անում է, որ պայմանագիրը չստորագրվի։

«Տարին անցավ, եւ դա տեղի չունեցավ, նաեւ՝ Լաչինի միջանցքի փակման պատճառով բանակցությունների՝ Մոսկվայում նախատեսված հաջորդ ռաունդը տեղի չունեցավ։ Հետեւաբար, միջազգային հանրությունն էլ է տեսնում, որ դա Հայաստանի ոչ կառուցողական քայլերի արդյունք չէ, ընդհակառակը՝ Հայաստանը կառուցողական է եւ շարունակելու է լինել կառուցողական։ Դրան ի պատասխան ունենք Լաչինի միջանցքի փակում եւ շատ այլ բաներ»,- նշեց հատուկ հանձնարարություններով դեսպանը։

Հարցին՝ ո՞վ է Լաչինի միջանցքի փակման մեղավորը, եթե Հայաստանի իշխանությունները սլաքները Ռուսաստանի կողմն են ուղղում եւ հայտարարում, որ Ռուսաստանն է պարտավորված հսկել միջանցքը, Մարուքյանն արձագանքեց․ «Նոր բան չեմ կարող ասել՝ ամեն բան ասված է․ պարզ է՝ փակել է Ադրբեջանը, պարտավոր է ջանքեր գործադրել Ռուսաստանը, եւ այո՝ մենք ակնկալում ենք Ռուսաստանից, որ այդ ջանքերն ավելի առարկայական գործադրվեն»։