Գիտնականները պարզել են, թե ինչպես են տեստոստերոնն ու կորտիզոլն ազդում կանանց սեռական ցանկության վրա

Փենսիլվանիայի նահանգի համալսարանի գիտնականները տղամարդկանց և կանանց սեռական ցանկության տարբերությունները վերագրել են տեստոստերոնի և կորտիզոլի փոխազդեցությանը: Հետազոտությունը հրապարակվել է Adaptive Human Behavior and Physiology ամսագրում:

Տեստոստերոնը սեռական հորմոն է, որը կարևոր դեր է խաղում օրգանիզմում: Այն հիմնականում արտադրվում է ամորձիներում՝ խթանում է տղամարդկանց երկրորդական սեռական հատկանիշների զարգացումը, բայց նաև կարգավորում է սեռական մղումը, ոսկրային զանգվածը, ճարպի բաշխումը, մկանային զանգվածը, ուժը և մի շարք այլ ֆիզիոլոգիական բնութագրեր:

Տեստոստերոնի մակարդակը կապված է մի շարք բարդ հոգեբանական վարքագծի հետ՝ ներառյալ սեռական ցանկությունը: Հետազոտողները կարծիք են հայտնել, որ մեկ այլ հորմոն՝ կորտիզոլը, փոխազդում է տեստոստերոնի հետ՝ կարգավորելու վարքը: Ենթադրվում է, որ կորտիզոլը փոխում է տեստոստերոնի ազդեցությունը մարդու վարքի և հոգեբանական գործընթացների վրա։

Հետազոտողները հավաքագրել են հետազոտության 831 մասնակիցների (որոնցից 646-ը՝ կանայք): Նրանք լրացրել են սեռական ցանկության գնահատման մասին հարցաթերթիկ: Գիտնականները նաև թքի նմուշներ են վերցրել՝ տեստոստերոնի և կորտիզոլի մակարդակը որոշելու համար:

Արդյունքները ցույց են տվել, որ մարդու օրգանիզմում տեստոստերոնի և կորտիզոլի մակարդակների փոխազդեցությունը կանխատեսում է կանանց սեռական ցանկությունը: Այս ազդեցությունն ավելի թույլ է եղել այն կանանց մոտ, ովքեր օգտագործել են հորմոնալ հակաբեղմնավորիչներ: