Խորհրդարան են այցելել Կոպենհագենի դպրոցներից մեկի 11-րդ դասարանի աշակերտները

Политические 24 Март, 2023 13:58

ՀՀ ԱԺ նախագահի տեղակալ Հակոբ Արշակյանը հյուրընկալել է Կոպենհագենի վալդորֆյան դպրոցներից մեկի 11-րդ դասարանի աշակերտներին: Հանդիպմանը մասնակցել են նաեւ Եվրոպական ինտեգրման հարցերի մշտական հանձնաժողովի նախագահ Արման Եղոյանը, պատգամավորներ Սոնա Ղազարյանն ու Արուսյակ Ջուլհակյանը, հայտնում է ԱԺ լրատվական ծառայությունը։

Ողջունելով խորհրդարան այցելած աշակերտներին` ԱԺ փոխնախագահը ներկայացրել է 2018 թվականի թավշյա, խաղաղ հեղափոխության արդյունքում ձեւավորված եւ գրանցված ժողովրդավարական ձեռքբերումները:

Նրա խոսքով ՀՀ կառավարությունը մեծ ուշադրություն է դարձնում գիտության եւ կրթության ֆինանսավորմանը. շարունակաբար ավելացվում է գիտության ֆինանսավորումը, բարձրացվում են ուսուցիչների աշխատավարձերը: Խոսելով կրթության ոլորտում իրականացվող ռազմավարական բարեփոխումների մասին` ԱԺ նախագահի տեղակալն անդրադարձել է դպրոցաշինությանը, մանկապարտեզների կառուցմանը, ուսուցիչների աշխատավարձերի բարձրացմանը:

««Արեգնազան» կրթահամալիրն ունի երկարատեւ համագործակցության պատմություն Կոպենհագենի վալդորֆյան դպրոցներից մեկի հետ: Ամեն տարի այդ դպրոցի 11-րդ դասարանի աշակերտներն այցելում են Հայաստան` ուսումնասիրելու Հայաստանի եւ քրիստոնեության պատմությունը»,- ներկայացնելով աշակերտներին` ասել է կրթահամալիրի ուսուցիչ Արա Աթայանը:

Կարեւորելով տարբեր երկրների երիտասարդների միջեւ ընկերական, ջերմ կապերի հաստատումը` նա նշել է, որ 2015 թվականից դպրոցականերն այցելում են նաեւ Հայաստանի Ազգային ժողով: 10 օրվա ընթացքում դպրոցականների համար կազմակերպվում են ճանաչողական էքսկուրսիաներ տեսարժան վայրեր, պատմամշակութային հաստատություններ:

Պատասխանելով աշակերտների հարցերին` Արման Եղոյանն անդրադարձել է տարբեր երկրների կողմից Հայոց ցեղասպանության ճանաչմանը եւ դատապարտմանը` նշելով, որ այն կարեւոր է հետագա ցեղասպան հանցագործությունները կանխելու համար:

Պատգամավոր Սոնա Ղազարյանը խոսել է Լաչինի միջանցքի փակման հետեւանքով Լեռնային Ղարաբաղում առաջացած ճգնաժամի հետեւանքների, էթնիկ զտման մասին:

Աշակերտների հարցերը վերաբերել են նաեւ Հայաստանի տնտեսության զարգացմանը, ապրանքների արտահանմանն ու ներմուծմանը, կոռուպցիայի դեմ պայքարին: Նրանք հետաքրքրվել են Հայաստան-Թուրքիա հարաբերություններով, կրոնների նկատմամբ հայ ժողովրդի վերաբերմունքով, սերնդափոխությամբ, անդրադարձել են կանանց ակտիվ ներգրավվածությանը տարբեր ոլորտներում:

Վերադառնալով Կոպենհագեն` աշակերտները կպատրաստեն զեկույցներ` ներկայացնելով նախագծային աշխատանքներ: