Դանակահարություն՝ Արմավիրի մարզի Ալաշկերտ գյուղի կենտրոնական զբոսայգում

SHAMSHYAN.com-ի տեղեկություններով մարտի 8-ին, դանակահարություններ են տեղի ունեցել Արմավիրի մարզում։ Ժամը 23։40-ի սահմաններում ՀՀ Ներքին գործերի նախարարության ոստիկանության Արմավիրի մարզային վարչությունում և ոստիկանության Արմավիրի բաժնում օպերատիվ տեղեկություններ են ստացվել, որ Ալաշկերտ գյուղի զբոսայգու տարածքում վիճաբանություն է տեղի ունեցել և կան դանակահարված քաղաքացիներ։

Ինչպես հայտնում է ֆոտոլրագրող Գագիկ Շամշյանը, գյուղ են ժամանել ՀՀ ՆԳՆ ոստիկանության Արմավիրի մարզային վարչության պետ Արթուր Բդոյանը, վարչության պետի օպերատիվ գծով տեղակալ Հովհաննես Արիստակեսյանը, ոստիկանության Արմավիրի բաժնի պետ Վոլոդյա Գևորգյանը, բաժնի պետի օպերատիվ գծով տեղակալ Կարեն Թարվերդյանն ու քրեական հետախուզության բաժանմունքի պետ Ղանդիլյանը։

Մինչ ոստիկանները կժամանեին գյուղ «Արմավիր» բժշկական կենտրոնից ոստիկանության Արմավիրի բաժին ահազանգ է ստացվել, որ իրենց մոտ դանակահարված 2 քաղաքացի է բերվել։

Ոստիկանների մեկ այլ օպերատիվ խումբ էլ մեկնում է հիվանդանոց, որտեղ բժիշկները հայտնում են, որ վիրավորները գտնվում են վիրահատարանում և ի վիճակի չեն կատարվածի մասին բացատրություն տալու։

Մինչ բժիշկները պայքարում էին վիրավորների կյանքի համար, ոստիկանները պարզում են, որ նրանք են Արմավիրի մարզի բնակիչներ 42-ամյա Կարեն Վ․-ն, ով հիվանդանոց է տեղափոխվել «ձախից միջին անոթային թափանցող վերք» ախտորոշմամբ և 41-ամյա Սեթ Վ․-ն։ Վերջինս հիվանդանոց  է տեղափոխվել «կրծքավանդակի ձախից կտրած վերք, թիկունքային շրջանի ծակած, կտրած վերք» ախտորոշմամբ։

Ահազանգով դեպքի վայր են ժամանել ՀՀ Քննչական կոմիտեի Արմավիրի մարզային քննչական վարչության խումբը՝ օրվա պատասխանատու հերթապահ քննիչի գլխավորությամբ։

Դեպքի փաստով քննչական բաժնում նախաձեռնվել է քրեական վարույթ։

Ոստիկանները պարզել են, որ նշված զբոսայգում վիճաբանություն է տեղի ունեցել Կարեն և Սեթ Վ․-երի ու Արմավիրի մարզի բնակիչ 24-ամյա Նիկոլ Պ․-ի հետ, որի ժամանակ վերջինիս ծեծի են ենթարկել, ով էլ իր մոտ եղած սուր կտրող, ծակող գործիքով հարվածներ է հասցրել Կարեն և Սեթ Վ․-երին։

Ոստիկանությունը ձեռնարկում  է անհրաժեշտ օպերատիվ հետախուզական միջոցառումներ կասկածյալ Նիկոլ Պ․-ին և հանցագործության գործիք առարկան հայտնաբերելու ուղղությամբ։