Շուշաննա Թովմասյանի «զենքերը»

«Երբ տղամարդը վատ է, փնտրում է կնոջ, երբ լավ է, փնտրում է ևս մեկին»,- ասում է հայտնի առածն ու ևս մեկ անգամ փաստում, որ կանայք են տղամարդկանց ամենամեծ թուլությունն ու աշխարհի շարժիչ ուժը: Իսկ կանայք ունեն իրենց զենքներն այդ կարգավիճակում լինելու համար: Մեր այս անդրադարձից կարող ես պարզել՝ որո՞նք են կնոջ կարևորագույն զենքերը, դրանց օգտագործման կանոնները և, իհարկե, ինչպե՞ս է դերասանուհի Շուշաննա Թովմասյանն օգտագործում դրանք:

Արտաքին տեսք

Թեև մարդիկ սիրում են ասել, որ արտաքին տեսքը երկրորդական է, այն չի կարող ազդել հարաբերությունների վրա, քանի որ առաջնայինը հոգու գեղեցկությունն ու մարդկային արժեքներն են, փաստը մնում է փաստ, որ արտաքինն իր ազդեցությունն ունի հարաբերությունների հաստատման գործում: Չէ՞ որ սա այն գործոնն է, որով մարդը տպավորություն է թողնում դիմացինի վրա, իսկ առաջին տպավորությունը շատ կարևոր է, քանի որ եթե այն դրական լինի, հետագայում առաջին տպավորության դառը պտուղները քաղելու խնդիր չի լինի: Ընդ որում՝ արտաքին լավ տեսք ունենալը չի ենթադրում չափանիշային գեղեցկություն՝ 90/60/90 չափսերով կամ 1.75-ից բարձր հասակով: Դերասանուհի Շուշաննա Թովմասյանը չի համապատասխանում այս չափանիշներին, սակայն ունի իր գեղեցկությունը, որն անտարբեր չի թողել հազարավոր հեռուստադիտողների:

Շուշաննան չի բարդութավորվում իր ցածր հասակից. նա շատ շուտ է հասկացել, որ պետք է սիրել սեփական մարմինն ու ընդունել քեզ այնպիսին, ինչպիսին կաս: Ավելին՝ Շուշաննան չի ձգտում ավելի բարձրահասակ երևալ, ինչն ակնհայտ է. նրան գրեթե միշտ կարելի է տեսնել ցածրակրունկ կոշիկներով. բարձրակրունկներ նա հագնում է միայն հատուկ առիթներին: Դերասանուհին չէր ցանկանա ոչինչ փոխել իր արտաքինում, միայն մի քիչ հասակ կավելացներ, թեև իր փոքրամարմին լինելուց չի նեղվում: Նա շատ շուտ է հասկացել, որ կարելի է ճիշտ օգտագործել այն, ինչ բնությունն իրեն տվել է և նույնիսկ շոյվում ու փոքրամարմին լինելու հետ է կապում փաղաքշական այն ձևերը, որոնցով իրեն դիմում են :)

Մատուցման ձև

Ինչ խոսք, արտաքին տեսքը շատ կարևոր է, սակայն դա միայն առաջին տպավորությունն է ապահովում, որը կայուն պահելու համար պետք է կարողանաս քեզ ճիշտ ներկայացնել: Այս դեպքում ևս օգնության է հասնում այն հանգամանքը, որ դու սիրում ես քեզ այնպիսին, ինչպիսին կաս, հաշտ ու ներդաշնակ ես մարմնիդ հետ, ինչն ակնհայտ է դառնում քո շարժուձևերում: Շատ կարևոր է նաև, թե ինչպես ես քեզ դրսևորում այս կամ այն իրավիճակում. բարձր ծիծաղ, ձևականություններ, սրանք այն բաներն են, որոնք Շուշաննան չի սիրում: Իհարկե, սա չի նշանակում, որ պետք է կաղապարված ապրել: Տանը, ընկերներիդ հետ, հարազատներիդ շրջապատում կարող ես քեզ թույլ տալ նաև բարձր ծիծաղել, սակայն դա չպետք է հատի գռեհկության սահմանը: Իսկ երբ ձևականություններն ու բարձր ծիծաղն ուշադրություն գրավելու միտում ունեն, դա տանուլ տված ճակատամարտ է:

Ոճ

Թեև վերջին շրջանում շատ նորաձև են կեդրեն ու առօրյա ոճը, բարձրակրունկներն ու դասական հագուստը շարունակվում են համարվել ամենականացին, ինչն օրինաչափ է: Սակայն սա շփոթություն է առաջացրել շատ աղջիկների մեջ, ովքեր կարծում են, որ ամենուր պետք է գնալ բարձրակրունկներով և երեկոյան զգեստներով: Իրականում դա ծիծաղելի է, քանի որ հագուստի այդ ոճը պետք է կիրառել տեղին. շպարի ընձեռած հնարավորություններից ևս ոչ բոլորն են տեղին օգտվում:

Շուշաննան այն աղջիկներից է, ով առօրյայում հագնում է ցածրակրունկ կոշիկներ, «բալետկաներ», չի դիմահարդարվում, քանի որ գնահատում է, իսկ հագուստն ընտրում է՝ առաջնորդվելով դրա հարմարավետությամբ: Իհարկե, հարկ եղած դեպքում նա և՛ բարձրակրունկներ է հագնում, և՛ դասական ոճով է հագնվում, և՛ շպարվում է, և՛ օգտվում է աղջկական բոլոր թիթիզություններից, քանի որ կարծում է, որ աղջկա սեթևեթող չլինելը, նույնն է, ինչ տղամարդու անթասիբ լինելը, սակայն գիտի' որտեղ կարելի է դա կիրառել, որտեղ՝ ոչ: Առօրյայում այդ ամենը գործածելը նույնիսկ ծիծաղելի է:

Շատ կարևոր է նաև աղջկա խնամված լինելը, սակայն խմամքն ու շատ շպարը ընդհանուր ոչինչ չունեն: Շուշաննան խնամված է համարում այն աղջկան, ով մաքուր արտաքին ունի, կոկիկ է:

Ժպիտ

Ժպիտն արտաքին ամենակարևոր գործոններից մեկն է, որը հոգեվիճակ է արտահայտում: Ինչպես ասում են՝ ընկերությունը սկսվում է ժպիտից :) Սա կնոջ համար շատ կարևոր զենք է, որը պետք է ճիշտ օգտագործել: Քո մի ժպիտը կարող է խելքահան անել նրան, եթե լինի տեղին և, ամենակարևորը, լոկ ժպիտ չլինի :)

Մեղմ, խորհրդավոր ժպիտը կարող է պատմել աղջկա մասին այն, ինչ նա է ուզում: Ոչ մի տղամարդ չի սիրում մռայլ կնոջ, այնպես որ ժպտերես եղիր: Շուշաննան բավականին ժպտերես է, սակայն չի սիրում, երբ մարդիկ անիմաստ են ժպտում. այն պետք է լինի տեղին՝ ուղղված ճիշտ նշանակետին և ոչ ձևական: Աղջիկը չի սիրում ձևականություններ, սակայն որպես ելք այս կամ այն իրավիճակից, երբեմն կարող է օգտագործել նաև ժպիտը, հատկապես՝ խորհրդավոր :):

Ինտելեկտ

Ինտելեկտուալ կանայք միշտ իրենց ուրույն տեղն ունեն: Հոգեբանների համոզմամբ՝ տղամարդիկ սիրում են պարծենալ իրենց ընտրությամբ, իսկ պարծենալու շատ լավ առիթ է ոչ միայն սիրելիի գեղեցիկ, խնամված տեսքը, այլև ինտելեկտուալ լինելը: Հատկապես հայ տղամարդիկ իրենց կողակցին ընտրելիս հաշվի են առնում ոչ միայն այն, որ նա իրենց կինն է լինելու, այլև այն, որ նա լինելու է իրենց երեխաների մայրը, իսկ երեխաների դաստիարակության հարցում շատ կարևոր է կնոջ գիտելիքների պաշարը: Շուշաննան ևս ոչ միայն հաճելի, այլև խելացի է :) Նա սիրում է կարդալ, սակայն ոչ ամեն բան: Դերասանուհին չի սիրում կարդալ ֆանտաստիկ գրականություն և դիտել այդ ժանրի ֆիլմեր: Նա կարդում է այնպիսի գրքեր, որոնք մոտ են իրականությանը և կարող են իրեն դասեր տալ, քանի որ էությամբ ռեալիստ է: Շուշաննային շատ է տպավորել Դեյլ Քարնեգիի «Ինչպես ձեռք բերել ընկերներ և ազդել մարդկանց վրա» գիրքը, որում խոսվում է կին-տղամարդ հարաբերությունների մասին: Շուշաննան էլ է որոշ «օգուտներ» քաղել դրանից :)

Խորամանկություն

Յուրաքանչյուր կին տիրապետում է կանացի որոշակի խորամանկության: Թեև այս առումով կարծրատիպ կա, թե խորամանկությունը խաբեության նշան է, իրականում այն խելացիության նշան է, որը ճիշտ օգտագործելու դեպքում կինը կարող է տիրապետել յուրաքանչյուր իրավիճակի: Հայտնի խոսքում ասվում է, որ տղամարդը տան գլուխն է, կինը՝ պարանոցը, և վերջինն է ուղղություն որոշողն ու ղեկը պահողը: Կանացի խորամանկությունն օգնում է ճիշտ ղեկավարել և, ամենակարևորը, դա անել այնպես, որպեսզի տղամարդը կարծի, թե ինքն է որոշումներ կայացնողը :) Շուշաննան ևս օգտվում է փոքրիկ կանացի խորամանկություններից, քանի որ Աստված տղամարդուն ուժ է տվել, կնոջը՝ խորագիտություն :) Սակայն այդ զենքը նա չափի մեջ է գործածում, որպեսզի չվնասի դիմացինին:

Սրամտություն

Խելացիության ևս մեկ գրավական է սրամատությունը: Թեև տղամարդիկ չեն սիրում, երբ իրենց կողակիցն իրենցից խելացի է, սակայն առանց դիմացինին վիրավորելու արված սրամտությունները չեն խանգարի: Շուշաննան իր բնույթով հանգիստ է, բայց խեղճ չէ և կարող է նաև «խայթել», իսկ ճիշտ խայթելու և ակնարկը տեղ հասցնելու համար պետք է սրամիտ լինել:

Սրամտությունն ուղղակի կապ ունի նաև հումորի հետ, որը ևս պետք է ճիշտ գործածել: Սա ինչպես շրջապատ ընդգրկվելու, այնպես էլ այս կամ այն իրավիճակից ելք գտնելու ճանապարհներից մեկն է :)

Կոկետություն

Կնոջ այս զենքը պետք է շատ զգույշ գործածել, որպեսզի չհատես թեթևամիտ լինելու սահմանը. թեթև սեթևեթանքից վնաս չկա: Շուշաննան էլ, որպես աղջիկ, երբեմն օգտվում է կոկետությունից, սակայն նա դա անում է շատ զգուշորեն և նուրբ, որպեսզի չանցնի սահմանն ու գռեհկության չվերածվի: Շուշաննան կոկետության մեջ էլ է իրեն բնորոշ անկեղծություն դրսևորում. պետք է ոչ թե կոկետուհի դառնալ ու ձևական տպավորություն թողնել, այլ հարկավոր է քեզ բնորոշ քայլերը համեմել չափավոր կոկետությամբ և հաջողությունը քոնն է :)

Խոսելու և լսելու կուլտուրա

Բառարանային հայերենով խոսելու կոչ քեզ չենք անում: Եթե նկատել ես, ես էլ այդ ոճով չեմ գրում, քանի որ կարելի է խոսել խոսակցական հայերենով, բայց շատ գրագետ, առանց ժարգոնային հավելումների: Մի շարք զենքեր նշեցինք, որոնք կարելի է կիրառել և հաջողության հասնել, բայց հավատացնում եմ, որ բոլոր զենքերի կատարյալ գործածման դեպքում կարող ես քո մի խոսքով անգամ ամեն ինչ փչացնել: Դերասանուհին էլ իմ ու քո պես խոսում է խոսակցականով, չի գործածում բարձրագոչ բառեր, սակայն ժարգոնն էլ տեղ չունի նրա բառապաշարում:

Յուրաքանչյուր կին պետք է հավասարակշռված լինի, իսկ դա դրսևորվում է նաև նրա խոսքում: Կինը պետք է ունենա ժամանակին լռելու և լսելու կուլտուրա: Շուշաննան էությամբ այնպիսին է, որ կարող է այդ պահին լռել, լսել դիմացինին ու ասել իր ասելիքը՝ սկսած առաջին կետից: Այդ մասին նա կարող է հիշել նույնիսկ որոշ ժամանակ անց, ինչը նույնիսկ հետաքրքիր է համարում հարաբերություններում: Լռելու ունակությամբ Շուշաննան կարողանում է նախ՝ լսել նրան և համապատասխան արձագանք տալ, ապա նաև՝ ուշադիր լինել և օգտվել դիմացինի թույլ տված վրիպումներից, որոնք կարող է բաց թողնել դիմացինին չլսելու պատճառով:

esyes.am